• Достлуқ риштилири
• 30 Сәуір, 2020

Өткән күнләрни сеғинип әсләймиз

Биз, Атырав шәһиридә истиқамәт қилидиған бир топ уйғурлар карантин елан қилиништин бираз вақит илгири «Шарбак» кафесида җумһурийәтлик Уйғур этномәдәнийәт мәркизиниң Атырав вилайәтлик шөбисиниң рәиси Гүлназ Имированиң рәһбәрлигидә шөбә әзалири Нурлан вә Эльвира Нодәровлар, Сәнәм Ибрагимова, Бәхтияр Шәрипов, Сухраб Зайиров, Дилбирим Адекова, Абдукерим Мәмәтов, Руслан Шаймәрданов, Бибигүл Ерболатқызы, Әзиз Нәврузов, Мартин Пәрһатов, Гүлнарә Мухпулова вә Бахтияр Қусаинов баш қошуп, «Уйғур мәдәнийити күнлирини» уюштурған едуқ. Мәдәнийәт күнлиригә Қазақстан хәлқи Ассамблеясиниң Атырав вилайити бойичә кативат рәиси Гүлмира Шакирова, «Қоғамдық келісім» җәмийәтлик бирләшмисиниң рәиси Нуржан Ермуханов, Атырав шәһиридики «Достлуқ өйиниң» мудири Жанар Ильясова, хадими Надежда Есова, ҖУЭМниң ғәрбий региондики вәкили Тохтасун Әйсаров, вилайәтлик «Прикаспийская коммуна» вә «Атырау» гезитлириниң мухбирлири вә вилайәттики барлиқ миллий мәдәнийәт мәркәзлириниң рәислири һәм вәкиллири тәклип қилинди. Қошумчә қилиш лазимки, Атыравдики банкларниң биридә 14 жил ишләп, бирнәччә жилдин бери қурулуш компаниясидә хизмәт қилип келиватқан Гүлназ һәрдайим өз миллитиниң мәдәнийити билән сәнъитигә һәвәс бағлап жүрди. Әлвәттә, бу қизиқиш уни шәһәрдики шөбә тәркивигә елип кәлди. 2016-жилдин тартип у шөбә паалийитигә қоюқ арилишишқа башлиди вә шөбиниң бурунқи рәиси Али Алиевниң рәһбәрлигидә тилға аларлиқ ишларни атқурди. Гүлназдики җошқун милләтпәрвәрлик униң шөбә рәһбәрлигигә мунасип екәнлигини көрсәтти. Шуниң билән уни өткән жилниң 1-ноябрь күни ҖУЭМ Атырав вилайәтлик шөбисиниң рәиси қилип сайлидуқ. Шуниң билән Гүлназниң рәһбәрлигидә «Уйғур мәдәнийити күнлиригә» һәртәрәплимә тәйярлинип, миллий мәдәнийитимизни, сәнъитимизни, таамлиримизни кәң намайиш қилдуқ. Уйғур хәлқиниң миллий урпи-адәтлирини тонуштуруп, «қиз билән жигитниң некасини қийиш» әнъәнисини сәһнигә елип чиқтуқ. Ләззәтлик таамлардин еғиз тегип, йеқимлиқ нахша-сазлиримиздин бәһримән болған меһманлар бизгә миннәтдарлиғини билдүрүп, тарқашти. Һазир у күнләрни сеғинип әсләватимиз. Буниңдин кейинкиму реҗилиримиз көп. Уни вақит көрситиду. Барлиқ қазақстанлиқларни 1-Май достлуқ мәйрими билән атыравлиқ уйғурлар намидин қизғин тәбрикләймән. Гүлванәм ҚАЖЕНБАЕВА. Атырав шәһири.