• "Birgemiz"
• 15 Мамыр, 2020

Ассамблея – чоң аилә

Бәхтишат СОПИЕВ, «Уйғур авази» Қазақстан хәлқи Ассамблеясиниң чоң аилә екәнлигигә бу қетим йәнә бир мәртә көз йәткүздуқ. Йүздин ошуқ милләт вәкиллиридин тәркип тапқан бу аилә елимиздә карантин елан қилинған күндин башлап, «Біз біргеміз» акцияси даирисидә 376 миллион тәңгә аҗритип, 515 миң ниқапни һәқсиз таратти. Мошу қетим Түркстан вилайити, Мақтарал наһийәсиниң бирқатар йезилирида йүз бәргән су бесиш ақивитидин зәрдап чәккәнләргиму биринчиләрдин болуп ярдәмгә кәлди. Йәнә шу «биз биллә!» шиари астида этномәдәнийәт мәркәзлири бу ишқа ат селишип, Түркстан вилайитигә жүк бесилған автокарванларни әвәтиватиду. Әйнә шундақ жүк бесилған автокарван сешәнбә күни Алмутидики АЗТМ заводиниң һойлисидин сәпәргә атланди. Автокарванни узитиш мәрасимиға Нур-Султан шәһиридин ҚХА Рәисиниң орунбасари –Кативатиниң рәһбири Жансейит Түймебаев алайтән қәдәм тәшрип қипту. Меһман мәрасим башлиништин йерим саат бурун келип, жүк тошуш машинилиридики турмушқа һаҗәтлик нәрсиләрни көздин кәчүрүп, мәзкүр акциягә қайси мәркәзниң қанчилик үлүш қошқанлиғини билишкә қизиқти. Жансейит Қансейитоғлини қарши алған җумһурийәтлик Уйғур этномәдәнийәт мәркизи Алмута шәһәрлик шөбиси рәисиниң орунбасари, ҚХА әзаси Долқунтай Абдухелил униңға ҖУЭМ тәрипидин мәзкүр акция даирисидә әмәлгә ашурулуватқан ишлардин қисқичә һесават бәрди. У шәхсән өзи 11 миллион 300 миң тәңгә хиражиәт қипту. Шундақла у меһманға өзиниң паалийәтчанлиғи билән көзгә чүшиватқан мәркәз йенидики Жигитбашлири кеңишиниң рәиси Ярмәһәмәт Кибировни тонуштурди. Уму өз новитидә бу ишқа жигитбашлириниң қошқан үлүши һәққидә ейтип бәрди. Баш жигитбешиниң ейтишичә, улар җәми 837 600 тәңгә жиғипту. Атап ейтқанда, Бостандық наһийәси — 205 100, Алмалы наһийәси — 30 000, Медев наһийәси — 50 000, Достлуқ мәһәллиси — 150 000, Заря Востока мәһәллиси — 100 000, Һөҗҗәт мәһәллиси — 100 000 вә Талғир наһийәси 202 500 тәңгә мәбләғ топлиған. Мошундақ йеқимлиқ йеңилиқлардин бәкму хурсәнт болған Жансейит Қансейитоғли мәрасим башланғичә журналистларниң соаллириға җавап берипму үлгәрди. – Бүгүнки күнгә қәдәр Түркстан вилайитигә ҚХА тәрипидин 23 миллион 300 миң тәңгилик ярдәм әвәттуқ, – дәп сөзини башлиди у журналистлар билән болған сөһбәттә. – Бүгүн 180 тонна турмушқа һаҗәтлик нәрсиләр, җүмлидин қурулуш материаллири, озуқ-түлүк бесилған 16 машина сәпәргә атлиниш алдида туриду. Пурсәттин пайдилинип, мән өзбәк, уйғур, түрк, қурд, туңган, әзәрбәйҗан этномәдәнийәт мәркәзлиригә чәксиз миннәтдарлиғимни изһар қилмақчимән. Тәнтәнини ҚХА Рәисиниң орунбасари киришмә сөз билән ечип, этномәдәнийәт мәркәзлириниң әзалириға бирлик вә бәрикәт тилиди. Шуниңдин кейин сөзгә чиққан уйғур, түрк, туңган, өзбәк этномәдәнийәт мәркәзлириниң рәһбәрлири «бу бизниң умумий паҗиәмиз, қарап турушқа һәққимиз йоқ. Чүнки биз бир аилә» дәп сөзлирини йәкүнлиди.