• "Birgemiz"
• 20 Мамыр, 2020

Жутниң хизмитидә һәм һөрмитидә...

Инсан болуп яшашниң әһмийити – өзгиләргә қилған яхшилиқлириңдин ибарәттур. Чүнки ахирәттә жиққан мал-дунияримиз әмәс, бәлки яхши амаллиримиз таразиға селиниду. Бәхиткә яриша, Уйғур наһийәсидиму қолида барини бөлүшүп, кишиләргә яхшилиқ қилиштин ялиқмайдиған, қоли очуқ, жүриги кәң адәмләрму йоқ әмәс. Шуларниң бири – Нурнисәм Рәхмәтҗанова десәм, һеч хаталашмаймән. Нурнисәм Рәхмәтҗанова 2007-жилдин тартип 1-Чонҗа оттура мәктивиниң ашханисида икки миң оқуғучи, икки йүздәк устаз вә хадимиға тамақ тәйярлайду. Бармиғидин һәсәл тамған ашпәз мәзкүр мәктәптики 50 оқуғучиға һәқсиз тамақ бериду. Буниңдин башқа, Чарин, Таштиқарису, Довун, Рахат йезилиридики билим дәргаһлири билән А.Розибақиев намидики мәктәпниң ашханилирида турмуш тәминати начар аилидин чиққан төрт йүз балини һәқсиз тамақландуруп кәлмәктә. – Нурнисәм Рәхмәтҗанова тәйярлиған ләззәтлик тамақларни мәктәп оқуғучилири вә устазлири һөзүрлинип йәйду. Биз Нурнисәм һәдиниң хизмитидин толиму миннәтдар, – дәйду, 1-Чонҗа оттура мәктиви мудириниң вәзиписини вақитлиқ атқурғучи Алексей Абрамов. Мошу йәрдә Нурнисәм нурғунлиған адәмни иш билән тәминләп келиватқанлиғиниму тәкитләп өткүмиз келиду. Мәсилән, 2012-жили газ билән тәминләш ишханисини ечип, бәш адәмни, кейин чөшүрә тәйярлаш цехини ечип, алтә адәмни ишқа алди. «Довун» вә «Нурнисәм» кафелирида болса, әллик адәм әмгәк қиливатиду. Шуниң билән қатар төмүрчилик ишханисидиму бирнәччә адәм иш билән бәнт. Хулләс, бүгүнкидәк яхши ай, яхши күнләрдә адил әмгиги, изгү ишлири билән жут һөрмитигә бөләнгән сахавәтлик инсан Нурнисәм Рәхмәтҗанова һәққидә сөз қозғап, тенигә мустәһкәм саламәтлик, ишлириға утуқ тиләшни тоғра көрдүм. Абдуразақ ТОХТИБАҚИЕВ, Чонҗа йезисиниң жигитбеши.