• "Birgemiz"
• 20 Мамыр, 2020

Кәң болсаң, кам болмайсән

Шәмшидин АЮПОВ, «Уйғур авази» Наурызбай наһийәсиниң Қарағайлы мәһәллисидә сахавәтлик ишлири билән көпкә тонулуватқан, жут абройини көтириватқан, жути үчүн көйүнидиған, Аллаһқа шүкүрлүк билдүридиған, соваплиқ, хәйрихаһлиқ ишларға майил, ақ көңүл пәрзәнтләр интайин нурғун. Атилар сөзини әқилниң көзи, дәп чүшинидиған мәһәллә яшлири өз жутини вә униң адәмлирини қәдир тутмақта. Уларниң яхши ишлири дайим давамини тепип келиватиду. Мәсилән, йеқинда, йәни Қәдир түни һарписида мошу жутниң паалийәтчан яшлириниң бири, Алмута шәһәрлик Йәкму-йәк күрәш федерациясиниң вице-президенти, «Дартим» спорт клубиниң баш мәшиқләндүргүчиси Әзиз Разиевниң уюштуруши, Наурызбай наһийәлик һакимийити вә наһийәлик Уйғур этномәдәнийәт мәркизиниң (рәиси Бәхтияр Исмайилов) йеқиндин қоллап-қувәтлиши вә баш һамий — «Дар» ширкитиниң асасини қурғучи Алидар Утемуратовниң маддий җәһәттин яр-йөләк болуши билән наһийәдики тәминати начар көпбалилиқ аилиләргә, накалар билән житим-йесирларға, баққучисидин айрилған қериларға, җәми 175 аилигә озуқ-түлүк севитини вә иссиқ таамларни ианә қилди. Севәт тәркивидә ун, гүрүч, май, қәнт, нан, макарон вә қәндәләт мәһсулатлири вә башқиму күндиликтә көпләп истимал қилинидиған озуқ-түлүк севәтлирини яшлар ярдәмгә муһтаҗ аилиләрниң өйлиригә йәткүзүп бәрди. Пак нийәт билән әмәлгә ашурулған ушбу соваплиқ ишқа жут адәмлири миннәтдар болушти. Жут рази — Худа рази. Кәң болсаң, кам болмайсән.