- Йеңилиқлар
- 20 Мамыр, 2020
Қазақстанниң үлүшини жуқури баһалиди
Қазақстан Президенти Қасым-Жомарт Тоқаев вә БМТ Баш кативи Антониу Гутерриш телефон арқилиқ сөһбәтлишип, таҗсиман вирусқа қарши күришишни, шундақла Қазақстанниң 2020 – 2021-жилларда деңизға чиқиш йоли йоқ тәрәққий етиватқан әлләр топиға рәислик қилишини муһакимә қилди.
Сөһбәт давамида COVID-19 пандемиясини вә униң ақивәтлирини тохтитиш даирисидә БМТ вә Қазақстан тәрипидин көрүлүватқан әмәлий чариләр муһакимә қилинди.
Қасым-Жомарт Тоқаев БМТ Баш кативиниң пандемияниң миллий саламәтликни сақлаш вә ихтисат системилириға йәткүзүватқан сәлбий тәсирини йениклитиш бойичә җүръәтлик иш-һәрикитигә жуқури баһа бәрди. Президент шундақла һазирқи әһвалниң аләмшумул боһранға қарши күч чиқиришларниң бешида туруватқан Тәшкилатниң вә униң агентлиқлириниң мәркизий роль ойнаватқанлиғи тәстиқләватқанлиғини тәкитлиди.
– Қазақстан БМТниң хәлиқара бехәтәрликни күчәйтишкә вә ихтисатни әслигә кәлтүрүшкә қаритилған тәшәббуслирини қоллап-қувәтләйду, – дәп тәкитлиди Қасым-Жомарт Тоқаев.
Антониу Гутерриш өз новитидә Қазақстан Президентиға БМТниң күн тәртивини изчил қоллап-қувәтләватқанлиғи вә регионлуқ дәриҗидә таҗсиман вирусқа қарши күрәшкә салмақлиқ һәссә қошуватқанлиғи үчүн миннәтдарлиқ билдүрди. Баш катип Қазақстанниң гражданлар саламәтлигини қоғдаш, аһалиниң һал-оқити төвән қатламлириға малийәвий ярдәм қилиш, бизнесни қоллап-қувәтләш һәм боһрандин кейинки вақитта йеңи ихтисадий йолни бәлгүләш саһалирида көрүватқан чариләрни жуқури баһалиди.
Антониу Гутерриш шундақла 2020 – 2021-жилларда Қазақстанниң деңизға чиқиш йоли йоқ тәрәққий етиватқан әлләр топиға рәислик қилишиға иҗабий баһа бәрди.
Баш катип сөһбәт давамида Қасым-Жомарт Тоқаевни “COVID-19 вақтида вә униңдин кейинки тәрәққиятни мәбләғ билән тәминләшниң жуқури дәриҗилик сегментиға” қатнишишқа тәклип қилди.
Чарә-тәдбир 28-майға бәлгүләнди вә видеоконференция тәртивидә өтүши керәк. Униңға бирқатар мәмликәтләрниң лидерлири вә көптәрәплимилик институтларниң рәһбәрлири қатнишиду.
Қасым-Жомарт Тоқаев онлайн-форумға қатнишидиғанлиғини тәстиқләп, пикирдашлиқ роһиниң вә дуния бирләшмисиниң бирлишип күч чиқиришиниң инсанийәткә пандемияниң комплекслиқ ховуплирини йеңип чиқиш вә БМТниң 2030-жилғичә бәлгүләнгән турақлиқ тәрәққият мәхсәтлириниң әмәлгә ашурулушини тәминләш имканийитини беридиғанлиғиға ишәнчә билдүрди.
Телефон арқилиқ сөһбәт БМТ Баш кативиниң тәшәббуси билән өткүзүлди.
476 рет
көрсетілді0
пікір