• Саламәтлик сақчилири
• 04 Маусым, 2020

Аз учришидиған кәсип егиси

Рашидәм РӘҺМАНОВА, «Уйғур авази» Медицина саһасиниң хадимлири һәққидә гәп қозғалғанда, асасән көз алдимизға аммибап врачларниң қияпити келиду. Бирақ, ақ халатлиқ әвзәл җанлар арисида иши көзгә анчә челиқмайдиған йәнә бир мутәхәссислик егилири бар. Сөзсизки, уларму, башқа тиббий хадимлар охшаш, һөрмәт-еһтирамға лайиқ. Улар – рентген дохтурлири билән рентген лаборантлири. Ишиктә шәһиридики «Табиб-мед» шипаханисиниң хадими Әкрәм Бәһриев – һаятиниң тәңдин-толисини саламәтликни сақлаш саһасиға беғишлиған жуқури дәриҗилик рентгенолог-дохтур. Әкрәм Бәһриев Уйғур наһийәси Кичик Ақсу йезисида дунияға кәлди. Униң дадиси Бәһри Исламов – Улуқ Вәтән уруши башланғанда Вәтәнни азат қилиш үчүн фронтқа дәсләпкиләрдин болуп атланған әрләрниң бири еди. Шиддәтлик җәң мәйданлирида жүрүп, Ленинград шәһириниң қоршавдин азат қилинишиға қатнашқан. Уруштин кейин ана жутида йеза кеңишиниң рәиси болған. Алтә пәрзәндиниң төрти урушқичә, иккиси униңдин кейин туғулған Бәһри ата билән Зиләйха кәнҗә оғли Әкрәмни «дохтур қилимиз» дәп арман қилаттекән. Әкрәм Бәһриоғли ата-анисиниң еқидисини ақлаш үчүн оттура мәктәптин кейин Шәмәй медицина институтида тәһсил көрүп, 1974-жили әмгәк паалийитини Уйғур наһийәсиниң Кичик Дехан йезисиниң шипаханисида участкилиқ баш дохтури сүпитидә башлиди. Икки жилдин кейин Уйғур наһийәлик мәркизий ағриқханисиға йөткилип, фтизиатр вә Чарин йезисиниң ағриқханисида участкилиқ баш дохтур болуп ишләп, Уйғур наһийәлик мәркизий ағриқханисиниң баш врачи А.Әмитахунов, фтизиатр дохтур Е.Александрова вә башқилардин саһаға мунасивәтлик көп нәрсиләрни үгәнди. Андин аиләвий шараитларға бағлиқ Әкрәм Бәһриоғли Өзбәкстанға көчүп берип, Ширин шәһиридики медицинилиқ санитарлиқ бөлүмидә 15 жил ишлиди. Мәлумки, аппаратлардин бөлүнидиған шолилар адәм саламәтлиги үчүн интайин зиян. Шуңлашқиму уларниң әтигән һөрмәтлик дәм елишқа чиқиши қануний түрдә қобул қилинған еди. Шу йеникчиликләр билән Әкрәм Бәһриев, 1995-жили 45 йешида пенсиягә чиқти. Арилиқта 10 жил тиҗарәт билән шуғулланди, андин Қазақстанға қайтип келип, Әмгәкчиқазақ наһийәсигә орунлашти. Саламәтлиги яр бәргәнликтин, өз кәспи бойичә қайта ишқа орунлишип, бир жил Челәк йезисидики мәркизий ағриқханида, андин Ишиктә шәһиридики мәркизий ағриқханида әмгәк қилди. 15 жил давамида рентген дохтури, рентген бөлүминиң башлиғи, кейинирәк заман тәләплиригә бенаән, компьютерлиқ томографияниң қир-сирини өзләштүрди. Компьютер арқилиқ ағриқни ениқлашни өзила үгәнмәй, кәсипдашлири Оралбек Қабыл, Рустәм Идрисов, Қалибек Мусанов кәби яшларғиму үгәтти. Һазир Қалибек устазиниң орнини бесип, рентген бөлүмини башқурса, Рустәм Челәк йезиси мәркизий ағриқханиниң баш врачиниң орунбасари болуп тайинланди. Икки жилдин бери Әкрәм Бәһриев «Табиб-мед» шипаханисида, шундақла Ишиктә шәһириниң туғутханисида рентген дохтури болуп ишләп кәлмәктә. – Рентгенология – диагностикилиқ шолилар бөлүми. Мәхсус аппаратлар арқилиқ чүширилгән пленкилардин адәмниң ички органлиридики ағриқлар ениқлиниду. Һазир ағриқни ениқлайдиған томография саһаси бәрпа болди. Мундақ технология – медицина саһаси үчүн бебаһа утуқ. Һазир техника тилини үгинишкә интилған адәмла рентгенологиядики ишини давамлаштуруши мүмкин. Шуңлашқиму мән «қерип қалдим» демәй, уни толуқ үгинип чиқтим. Алтә жил томогроф болуп ишлидим. Билгинимни шагиртлиримға үгәттим. Ата-анамниң мәхсәтлирини толуқ орунлидим. Мәрһумларниң өз вақтида бәргән дуа-тиләклири мени һели қоллап кәлмәктә, – дәйду Әкрәм ака Бәһриев. Кәспий тәҗрибилик дохтур Әкрәм Бәһриоғлиниң исмини наһийәлик медицина саһасидики барлиқ кәсипдашлири һөрмәт билән тилға алиду. Чүнки Әкрәм Бәһриев – өз кәспигә чәксиз муһәббәт бағлиған мутәхәссис. Әмгәкчиқазақ наһийәси.