• Елини сөйгән Елбасы!
• 02 Шілде, 2020

Инавити үстүн Елбасы

Мәшүр САСИҚОВ, «Уйғур авази» Бүгүнки гүлләнгән ана вәтинимиз – Қазақстан Җумһурийитиниң асасини салғучи Тунҗа Президент – Елбасы Нурсултан Әбишоғли Назарбаев екәнлиги сир әмәс. Бу һәрбир қазақстанлиқтин ташқири, пүткүл дуния әһлигә яхши мәлум. Елимизни бари-йоқи оттуз жил ичидә өзиниң дана ички вә ташқи сәясити, чоңқур пәлсәпә һәм билими билән йәр шариға тонутқан бу шәхсниму таҗсиман вируси айлинип өтмигәнлиги тоғрилиқ әхбарат таралғанда, униң вәтәндашлирила әмәс, бәлки дуниядики әң чоң империяләр билән көплигән әлләрниң рәһбәрлири һисдашлиғини билдүрди. Елимизниң Президенти Қасым-Жомарт Тоқаевтин тартип, аддий пухрасиғичә елимизни аз вақит ичидила иштик сүръәт билән тәрәққий қиливатқан дөләтләр қатариға киргүзүп, турмушимизниң паравәнлигигә түрткә болған Нурсултан Назарбаевниң тез-арида сақийип кетишини тилиди. Әнди Америка Қошма Штатлириниң дөләт кативи, Түркия, Россия, Өзбәкстан, Қирғизстан, Исраил, Индия вә Иордания охшаш башқа мәмликәтләрниң рәһбәрлири болса, ушбу хәвәрдин толиму тәшвишләнгәнлигини йәткүзгәч, хәлиқара сәясәт сәһнисидә тонулған Милләт Лидериниң дунияниң барлиқ җайлирида дайим течлиқниң һөкүм сүрүшини истигән аброй-инавити үстүн шәхс екәнлигини алаһидә қәйт қилди. Шундақла улар пүткүл һаяти күрәш билән өткән Нурсултан Әбишоғлиға мустәһкәм саламәтлик тиләп, униң бу хәтәрлик ағриққа бәрдашлиқ берипла қалмай, уни асан йеңип чиқидиғанлиғиға ишәнчә билдүрди. Һәтта АҚШ дөләт кативи Майк Помпео өзиниң изгү нийитини қазақ тилида «Аман болыңыз!» дәп йәткүзгәнлигини етиварға алсақ, Тунҗа Президентимизниң әшундақ бүйүк шәхсләр билән достанә мунасивәттә екәнлигигә көз йәткүзимиз. Буниңдин шундақ хуласә чиқиришқа болидуки, хәлқигә, йәни қазақстанлиқларға адил хизмәт қилған Елбасыниң иззәт-һөрмити чәтәлликләр арисидиму алаһидә жуқури. Демәк, яш Қазақстанниң йүксәк келәчиги үчүн барлиқ талант-қабилийитигә сәрип қилиш арқилиқ, уни бүгүнки дәриҗигә йәткүзгән у яқ бизниң пәхримиз екәнлиги ениқ. Шуңлашқа биз җумһурийитимиздә истиқамәт қиливатқан йүз оттуздин ошуқ милләт билән еләтниң өзара разимәнликтә яшап, миллий урпи-адәт, әнъәнилирини, мәдәнийитини сақлашқа шараит яритиватқан Дөләт рәһбиригә саламәтлик тиләп, униңға чәксиз миннәтдар екәнлигимизни йәткүзүш гражданлиқ борчимиз болса керәк. Чүнки шу Тунҗа Президент – Елбасыниң шәхсий тәшәббуси түпәйли қурулған Қазақстан хәлқи Ассамблеяси милләтләрара достлуқниң капалити болуп қалғанлиғи барчиға яхши мәлум. Әнди униң елимиздики течлиқ билән баравәрликтә атқуруватқан ролиға тохталсақ, у өз алдиға бир мавзу. Болупму алға илгириләш бир яқта турсун, пат-пат тоқунушлар билән қан төкүшләрдин жирақ болалмайватқан әлләрниң рәһбәрлири «шунчә милләтни бир Ассамблея арқилиқ течлиққа чақириш мүмкинму?» дәп ишәнгүси кәлмәйватқанлиғи бар техи. Мана биз, әйнә шундақ рәһбәргә йолуққан тәләйлик хәлиқ.