• Йеңилиқлар
• 30 Шілде, 2020

Намзатлар ройхәткә елинди

Өткән җүмә күни Қазақстан Җумһурийити Мәркизий сайлам комиссиясиниң мәҗлиси өткүзүлүп, униң йәкүни бойичә Қазақстан Парламенти жуқарқи палатисиниң депутатлиғиға намзатлар тәстиқләнди. Қазақстан Җумһурийити Парламенти Сенатиниң депутатлиғиға намзатларни ройхәткә елиш йәкүни тоғрилиқ территориялик сайлам комиссиялириниң рәислири доклад қилди. Шундақ қилип, вилайәтлик, Нур-Cултан, Алмута вә Чимкәнт шәһәрлик сайлам комиссиялири Қазақстан Җумһурийити Парламенти Сенатиниң 17 мандатиға 94 үмүткардин 58 намзатни ройхәткә алди. Оттура һесапта бир орунға 3 намзат үмүткар болуватиду. Ройхәткә елинған намзатларниң 48 яки 82,8 пайизини әр кишиләр вә 10 яки 17,2 пайизини аяллар тәшкил қилиду. Уларниң арисида 19 адәм мутәхәссислиги бойичә инженер, 13 – ихтисатчи, 8 – педагог, 7 – аграр саһа хадими, 5 – врач, 3 – юрист, 1 – сәясәтшунас, 2 – башқа мутәхәссислик егилири. 21 адәм коммерциялик қурулумларға, 16 – дөләт тәшкилатлириға, карханилириға вә мәһкимилиригә вакаләтлик қилиду, 12 – дөләт хизмитиниң хадимлири, 5 – җәмийәтлик тәшкилатларниң вәкиллири вә 4 – әмәлдики сенаторлар. Һазир Сенат депутатлиғиға намзат сүпитидә ройхәткә елинғанлар сайлам алдидики тәшвиқат ишлириға киришти, у мошу жилниң 11-август күни саат 00.00ғичә давамлишиду. Регионлар бойичә алғанда Нур-Cултан шәһиридин — бәш, Алмута шәһиридин — үч, Чимкәнт шәһиридин — үч, Ақмола вилайитидин — бәш, Ақтөбә вилайитидин — үч, Алмута вилайитидин — үч, Атырав вилайитидин — үч, Шәрқий Қазақстан вилайитидин — төрт, Җамбул вилайитидин — үч, Ғәрбий Қазақстан вилайитидин — үч, Қарағанда вилайитидин — үч, Қостанай вилайитидин — төрт, Қизилорда вилайитидин — төрт, Маңғистав вилайитидин — үч, Павлодар вилайитидин — үч, Шималий Қазақстан вилайитидин — үч, Түркстан вилайитидин үч намзат ройхәткә елинди. Мәмликәттики таҗсиман вирусқа бағлиқ вәзийәт көздә тутулуп, Қазақстан Җумһурийитиниң баш санитар врачи вә Мәркизий сайлам комиссиясиниң рәиси Сенат депутатлири сайлиминиң санитариялик бехәтәрлигини тәминләш тоғрилиқ тохтам чиқарди. Тохтамға мувапиқ, вилайәтләр, җумһурийәтлик әһмийәткә егә шәһәрләр вә пайтәхт территориялик сайлам комиссиялиригә вилайәтләр, җумһурийәтлик әһмийәткә егә шәһәрләр вә пайтәхтниң баш санитар врачлири билән бирликтә регионлардики санитария-эпидемиологиялик вәзийәтни һесапқа алған һалда сайлам җәрияниниң санитариялик бехәтәрлигини тәминләш жүкләнди.