• COVID - 19
• 30 Шілде, 2020

Вәзийәт турақлишиватиду

Премьер-министр Асқар Маминниң рәислигидә өткән Һөкүмәтниң селекторлуқ мәҗлисидә башқа мәсилиләр қатарида мәмликәттики эпидемиологиялик вәзийәтни турақлаштурушқа қаритилған чариләр қаралди. Саламәтликни сақлаш министри Алексей Цойниң мәҗлистә хәвәр қилишичә, 5-июльда мәмликәттә карантин чарилири киргүзүлгәндин тартип таҗсиман вирус ағриғиниң 35 951 әһвали тиркәлгән. Бүгүнки күнгә бир тәвлүктә 1 600 адәмдә ағриқ ениқлинип, вәзийәт бирқәдәр турақлашти. Шундақла ағриқханилардики орунларниң 43 пайизи бошиди, җүмлидин қайта җанландуруш бөлүмлиридики орунларниң 27 пайизи бошиди. Сақайған бемарларинң сани 63 пайиз өсти. – Шундақ қилип, саламәтликни сақлаш системисиға болған жүклиминиң асасий көрсәткүчлирини төвәнлитиш қолға кәлтүрүлди. Шундақ болсиму мәмликәттә COVID-19 инфекцияси билән ағриш вә униңдин вапат болуш бойичә умумий әһвал көп җәһәттин ихтисатниң барлиқ саһалириниң, бизнес вә җәмийәтниң мошу ишқа җәлип қилинишиға бағлиқ, –дәп билдүрди министр. Униң сөзичә, иҗабий көрсәткүчниң пәқәт 30 пайизила медицинилиқ ярдәм сүпитигә вә эпидемиологиялик чариләргә бағлиқ. Қалған 70 пайиз гражданлар ниқап тақаш тәртивигә вә гигиена, шундақла иҗтимаий арилиқни сақлаш қаидилиригә риайә қилғанда қолға кәлтүрүлиду. Башқичә ейтқанда, көп нәрсә адәмләрниң аң-сезимиға вә җавапкәрлигигә бағлиқ. Министрниң тәкитлишичә, мәмликәттә толуқ эпидемиологиялик бехәтәрликни тәминләш үчүн санаәт, сода вә башқа объектларда ниқап тақаш тәртивигә риайә қилинишини назарәт қилиш, барлиқ җәмийәтлик орунларда қол жуюш үчүн санитайзерларни орнитиш, барлиқ әхбарат каналлири бойичә аһали билән чүшәндүрүш ишлирини жүргүзүш керәк. Мәҗлистә Нур-Султан, Алмута, Чимкәнт шәһәрлириниң, шундақла Маңғыстав вә Қостанай вилайәтлириниң һакимлири өзлири рәһбәрлик қиливатқан регионлиридики эпидемиологиялик вәзийәт тоғрилиқ һесават бәрди. Премьер-министр Асқар Мамин қаралған мәсилиниң йәкүнини чиқирип, карантин тәртиви вақтида Қазақстанда эпидемиологиялик вәзийәтни турақлаштурушниң, шундақла медицина тәшкилатлириға болған жүклимини төвәнлитишниң мүмкин болғанлиғини тәкитлиди. – Биз эпидемиологиялик вәзийәтниң һазирқи көрсәткүчлирини яхшилишимиз керәк. Саламәтликни сақлаш министрлиги карантин чарилирини пәйдин-пәй елип ташлаш планини тәвсийә қилди. Биз Дөләт комиссиясиниң мәҗлисидә мәзкүр планни қарап чиқип, тегишлик қарар қобул қилимиз, – деди Премьер-министр.