• 30 август — Конституция күни
• 03 Қыркүйек, 2020

Конституция күни нишанланди

Рашидәм РӘҺМАНОВА,
«Уйғур авази»

Өткән шәнбә күни Әмгәкчиқазақ наһийәси һакимийитиниң мәҗлисләр залида Қазақстан Җумһурийитиниң Конституцияси күнигә мунасивәтлик мәйрәмлик чарә-тәдбир өткүзүлди.
Униңда Әмгәкчиқазақ наһийәсиниң һакими Қуанышбек Қашқымбаев мәйрәм қатнашқучилирини ҚҖ Конституциясиниң 25 жиллиқ сәнәси билән тәбриклиди.
– «Көпниң сөзи – хасийәтлик» дәйду дана хәлқимиз. Асасий Қанунимизниң муәллипи – пүткүл Қазақстан хәлқи. Конституциягә асаслинип, биз мустәқиллигимиз билән дөләтчилигимизни риваҗландуруш йолида тилға аларлиқ ишларни атқурдуқ, – деди наһийә һакими өз сөзидә.

Қазақстан йеридә истиқамәт қилидиған барлиқ гражданларниң тәңһоқуқлуғи – Вәтинимизниң утуқлуқ тәрәққияти билән өсүшиниң капалити екәнлигини атап өткән наһийә рәһбири наһийәниң иҗтимаий вә ихтисадий тәрәққиятиға һәссә қошқан бир топ адәмләрни тәвәллудлуқ медальлар билән тәғдирлиди. Атап кетиш керәк, тәғдирләнгәнләр арисида миллитимиз вәкиллиридин – Әмгәкчиқазақ наһийәлик ички сәясәт бөлүминиң рәһбири Мөмүнҗан Исламов — «Қазақстан хәлқи Ассамблеясигә — 25 жил», Тәшкәнсаз йеза округиниң һакими Эльвира Мәсүтова — «Қазақстан Конституциясигә — 25 жил», Әмгәкчиқазақ наһийәлик Уйғур этномәдәнийәт мәркизиниң рәиси Сулайман Мәхсүтов (сүрәттә солда) — «Қазақстан Конституциясигә — 25 жил» вә «Қазақстан хәлқи Ассамблеясигә — 25 жил» тәвәллудлуқ медальлири билән тәғдирләнди.
Мәйрәмниң рәсмий қисми аяқлашқандин кейин наһийә һакими өй новитидә турған 60 иҗтимаий әһвали төвән, көпбалилиқ аилигә, баққучисидин айрилған ялғуз аниларға, шуниң билән биллә житим балиларға пәтирләрниң ачқучлирини тапшурди.
Қошумчә қилиш лазимки, бу пәтирләр наһийә рәһбәрлигиниң плани бойичә селинип, уларниң қурулушиға дөләт бюджетидин 709 миллион тәңгә бөлүнгән. Көпқәвәтлик өйниң йенида үч мәктәп, ағриқхана, полиция бөлүмчиси, хәлиққә хизмәт көрситиш мәркизи вә башқилар бар.
Әмгәкчиқазақ наһийәси.

***

Мәшүр САСИҚОВ,
«Уйғур авази»

Йеқинда Талғир наһийәсидә Конституция күнигә беғишлинип өткән чарә-тәдбиргә узун жиллар мабайнида наһийәниң тәрәққиятиға биркишилик үлүшини қошқан вә рәһбәрлик лавазимларни егилигән шәхсләр билән тәвәдә истиқамәт қиливатқан бирқатар этносларниң вәкиллири қатнашти.
Баш қошушта наһийә һакими Серикжан Ерекешев көпчиликни мәйрәм билән сәмимий тәбрикләп, уларға мустәһкәм саламәтлик вә утуқ тилиди. Андин натиқ елимизниң турақлиқ риваҗлинип, алға илгирилишидә Асасий Қанун – Конституция ролиниң алаһидә екәнлигини қәйт қилғач, җумһурийитимизниң һәрбир граждининиң қанун алдида һәммисиниң бирдәк жавапкәр екәнлигини тәкитлиди. Шундақла у наһийә һакими болуп техи йеқиндила сайланғанлиғини тилға елип, келәчәктә аһалиниң тәл-төкүз һаят кәчүрүши үчүн барлиқ билими билән тәҗрибисини сәрип қилидиғанлиғини ейтип өтти.

Һаким баш қошуш давамида пүткүл дуния әһлини һәләйкүмгә селиватқан таҗсиман вирус пандемияси пәйтидә турғунларни барлиқ санитарлиқ нормиларға риайә қилиш вә шу арқилиқ бу көзгә көрүнмәс ағриқни йеңип чиқишқа чақирди. Болупму адәмләр көп жиғилидиған җайларда җавапкәр хадимларниң ниқап тақаш, иҗтимаий мусапини сақлаш охшаш қаидиләрниң йүз пайиз орунлинишини тәминләш керәклигиниму әскәртип өтти. Буниңдин ташқири Серикжан Қазиулы ағриқниң кәскин овҗ еливатқиниға қаримай, йәни чәктин ешип, той-төкүн, нәзир-чирақларни өткүзүватқанлар арисида тоғра тәшвиқат ишлирини жүргүзүп, қаидигә беқинмиғанларни җавапқа тартиш лазимлиғини чүшәндүрди.
Баш қошушта һаким бирқатар шәхсләрни тәвәллудлуқ медальлар вә пәхрий ярлиқлар билән тәғдирлиди. Уларниң арисида Талғир наһийәлик Уйғур этномәдәнийәт мәркизиниң рәиси Иминҗан Тохтахунов (сүрәттә оңда) вә наһийәлик Анилар кеңишиниң рәиси Мария Сахибаева ҚХАниң 25 жиллиғи медали билән мукапатланди.
Тәкитләш лазимки, ушбу чарә-тәдбир барлиқ санитарлиқ қаидиләргә қәтъий риайә қилинған һалда өтти.