• Кәсипдаш һәққидә сөз
• 24 Қыркүйек, 2020

Исми әбәдийләштүрүлди

Ершат ӘСМӘТОВ,
«Уйғур авази» 

Бир йерим әсирлик тарихқа егә «BASF» компаниясиниң бренди – «Master Buіlders Solutіons» җавапкәрлиги чәкләнгән йолдашлиғиниң Қазақстанда паалийәт елип бериватқиниға йәттә жилға йеқин вақит болди. Мошу җәриянда у елимиздики көплигән шериклирини қурулуш химияси материаллири билән тәминләп кәлмәктә. Пайтәхтимиз Нур-Султан шәһиридики Abu Dabі Plaza, Назарбаев Университет, Хан Шатыр, Алмутидики Есентай парк, “МЕГА 2”сода-дәм елиш комплекси, метрониң йәрасти линияси қатарлиқ лайиһәләрдиму гәп болуватқан ширкәтниң из-тамғиси бар.

Йеқинда «Master Buіlders Solutіons» ҖЧЙниң Алмутидики шөбисиниң қум қурутуш цехиға униң қурулушиға салмақлиқ үлүш қошқан Бәхитҗан Мәмировниң нами берилди. Әйнә шуниңға мунасивәтлик кәсипдашлири уюштурған тәнтәнигә мәрһумниң ата-аниси, аилә әзалири вә қериндашлири тәклип қилинди.
Ширкәтниң ишләпчиқириш бойичә рәһбири Серикжан Раимқанов буниңдин бираз вақит илгири мәзгилсиз аләмдин өткән Бәхитҗан Закироғлиниң тәрҗимиһали вә әмгәк паалийити тоғрилиқ ейтип өткәндин кейин сөз «Master Buіlders Solutіons» ҖЧЙниң баш мудири Али Дора Йылмазға берилди.
– Бәхитҗан Закироғли наһайити әһмийәтлик, заманивий иш орниниң ечилишиға беваситә сәвәп болған инсан, – дәп сөзини башлиди баш мудир. – У завод һули селинғандин тартип, қурулуши толуқ аяқлашқичә, һәтта униң һөҗҗәтлирини рәсмийләштүргичә ишниң бешида болди. Униңға заманивий қурал-җабдуқларни орнитип, паалийитиниң җанлинишиға көп күч чиқарди. Шуңлашқиму биз, кәсипдашлири, бир еғиздин мәзкүр иш орнини униң намида аташ қарариға кәлдуқ.
Тәнтәнә давамида сөз новитини алғанлар мәрһумниң кәспий салаһийити билән биллә алий инсаний хисләтлириниму алаһидә қәйт қилди. Андин кәсипдашлири тәрипидин униң роһиға атап нәзир бәрди.
Ахирида сөз алған Бәхитҗанниң ата-анилири – миллий мәдәнийитимизниң җанкөйәри, Уйғур наһийәсиниң Пәхрий граждани Закир Мәмиров билән Қазақстанниң маарип әлачиси, пешқәдәм устаз Гүлпәрәм Турсунова (сүрәттә) оғлиға һөрмәт билдүрүп, исмини әбәдийләштүргән кәсипдашлириға чәксиз миннәтдарлиғини изһар қилди.
Мошу йәрдә Бәхитҗан Мәмировниң қисқичә тәрҗимә һалиға тохтилип өтәйли. У Уйғур наһийәсиниң Чонҗа йезисидики уйғур оттура мәктивини тамамлиғандин кейин Өскәмән йол-қурулуш институтиниң қурулуш инженери факультетида тәһсил көриду. Әмгәк паалийитини машина ишләпчиқириш вә пайдилиниш карханисида механик, бөлүм башлиғи хизмәтлиридин башлайду. Андин «Ясен» ширкитидә вә «Алматыкоммунэнерго» мәһкимисидә – механик, «Желдорстрой – Жезқазған жол» мәһкимисидә – инженер, әнди 2005-жилдин башлап «BASF – Центральная Азия» ширкитидә ишләпчиқириш участкисиниң башлиғи болуп ишлиди. Бәхитҗан Закироғли қәйәрдә хизмәт қилмисун, өзиниң кәспий салаһийитини вә жуқури җавапкәрлигини биринчи орунға қоюшни билди. Миллий мәдәнийитимизни қоллап-қувәтләштинму сирт қалмиди. Униң шиҗаәтлик һәм тинимсиз әмгиги мунасип баһалинип, һәрхил мукапатларға, кәсипдашлириниң иззәт-еһтирамиға еришти. Рәпиқиси Надиҗәм билән пәрзәнтлири Бәхтияр вә Наргизани заман тәливигә лайиқ инсанлардин қилип тәрбийиләп, қатарға қошти.Үч нәврә сөйди. Әпсус, мәрһумға уларниң қизиғини көрүш несип болмиди...