• Йеңилиқлар
• 22 Қазан, 2020

Карантинни күчәйтиш вә йениклитиш чарилири көрүлиду

Қазақстан Җумһурийитиниң Премьер-министри Асқар Маминниң рәислигидә җумһурийәт территориясидә таҗсиман вирусниң тарқилишиға йол қоймаслиқ бойичә Идариләрара комиссияниң (ИАК) селекторлуқ мәҗлиси өткүзүлүп, униңда COVID-19 инфекциясигә қарши туруш бойичә қошумчә чариләр қаралди.
Мәҗлистә саламәтликни сақлаш министри Алексей Цой мәмликәттики санитария-эпидемиологиялик әһвал, Риқабәтчиликни һимайә қилиш вә тәрәққий әткүзүш агентлиғиниң рәиси Серик Жуманғарин лабораториялик хизмәтләр вә айрим қоғдиниш васитилиригә мунасивәтлик баһа сәяситини мониторинг қилиш, ички ишлар министри Ерлан Турғумбаев санитариялик тәләпләргә риайә қилинишини назарәт қилиш, әхбарат вә җәмийәтлик тәрәққият министри Аида Балаева әхбарат-чүшәндүрүш ишлири, Шималий Қазақстан вә Павлодар вилайәтлириниң һакимлири – Қумар Ақсақалов билән Әбилқайыр Сқақов – регионлардики әһвал тоғрилиқ доклад қилди.
Кейинки үч һәптидә мәмликәттә 17 миңға йеқин рейд жүргүзүлүп, карантин тәртиви бузулғанлиғиниң 7 миңдин ошуқ факти ениқланди.
Һөкүмәт рәһбири аһалиниң таҗсиман вирусниң хәтәрлик екәнлигини чүшиниш дәриҗисиниң төвән екәнлигини, иҗтимаий арилиқ вә санитариялик тәләпләргә, болупму җәмийәтлик орунларда вә транспортта мәҗбурий ниқап тақаш тәртивигә йетәрлик һалда риайә қилинмайватқанлиғини тәкитлиди.
Әйнә шуниңға бағлиқ Һөкүмәт рәһбири гражданлар арисида әхбарат-чүшәндүрүш ишлирини җанландурушни һәм санитариялик тәләпләргә риайә қилинишини назарәт қилишни күчәйтишни тапшурди вә ИАК бирқатар қарарларни қобул қилди:
1. Чегаридин өткүзүш пунктлирида санитария-эпидемиологиялик назарәт күчәйтилсун. Бийил 26-октябрьдин башлап чәт әлләрдики эпидемиологиялик әһвал һесапқа елинип, чәтәллик авиарейслар сани қисқартилсун. Қазақстан территориясигә кәлгәнләрниң һәммиси (җүмлидин Қазақстан Җумһурийитиниң гражданлири) шундақла иккитәрәплимә хәлиқара жүк тошушни әмәлгә ашуруватқан һайдиғучилар мәҗбурий ПЦР-тесттин өткүзүлсун. Чәт әлләрдин келиватқанларниң, шу җүмлидин Қазақстан Җумһурийити гражданлириниң ПЦР-тесттин өткәнлиги тоғрилиқ ениқлима қәрәли үч тәвлүккичә бәлгүләнсун.
2. ПЦР-тестлаш. Бийил 19-октябрьдин башлап Қазақстан Җумһурийитиниң регионлуқ лабораториялириниң көпчилигидә ПЦР-тест баһаси 9 миң тәңгигичә төвәнлитилди.
3. «Йешил» турақлиқ эпидемиологиялик әһвалға егә регионларда ағриқниң өсүши болмиған әһвалда, бизнес субъектлириниң паалийити басқучлуқ башлансун.
24-октябрьдин тартип сода-оюн-тамашә мәркәзлири, сода өйлири, йепиқ базарлар шәнбә күнлири саат 17.00чә ишләйду.
26-октябрьдин тартип кинотеатрлар арилиқни сақлиған вә ниқап тақаш тәртивигә риайә қилған һалда зални 30 пайиз толтуруп, ишини башлайду.
4. Чәклимә чариләрни сақлаш. Мәктәп йешиғичә болған балилар мәһкимилириниң, бильярд вә компьютер клублириниң, оюн-тамашә мәһкимилириниң, банкет заллириниң, түн клублириниң паалийити мәнъий қилиниду. Вилайәтләрара йолувчиларни тошуш вә умумий вагонларни қураштуруш мәнъий қилиниду.