- Йеңилиқлар
- 29 Қазан, 2012
Билим асаси — башланғучта
Җәннәтқиз Исмайилова Яркәнт шәһиридики Б.Назим намидики мәктәптә алдинқи қатарлиқ устазларниң бири. Униң педагогика саһасидики оттуз бәш жиллиқ иш-паалийитиниң жигирмә жили бизниң мәктивимиздә өтүватиду. Мана шуниң үчүнму бу пешқәдәм кәсипдишимизниң әмгәк йоли бизгә бәш қолдәк аян.
Җәннәтқиз һәдә әсли Челәк тәвәсиниң Қорам йезисидин болуп, шу йәрдики оттура мәктәпни тамамлиған. Муәллим болушни арман қилғанлиқтин, һеч бир иккиләнмәстин, Яркәнт педагогикилиқ училищесиға оқушқа чүшиду. 1977-жили мәзкүр билим дәргаһини әла баһаларға тамамлиған униң башланғуч синип муәллими сүпитидики дәсләпки қәдими һазирқи Н.Крупская намидики оттура мәктәпниң асаси болған ВЛКСМниң 50 жиллиғи намидики башланғуч мәктәптин башлиниду. Кейинирәк Х.Һәмраев намидики оттура мәктәпкә авушуп, өз ишини давамлаштуриду. Жуқурида ейтқинимиздәк, ахирқи жигирмә жил давамида Б. Назим намидики мәктәптә ишләп кәлмәктә.
«Билим асаси — башланғучта» дегән уқум бекар қелиплашмиған. Балиниң оқушқа болған қизиқиши билән тәртип-интизами вә әдәп-әхлақи мәктәп босуғисини атлиған дәсләпки күнләрдин, йәни башланғуч синипта оқуватқан чағлиридин шәкиллинидиғанлиғи әмәлий һәқиқәт. Мана шуңлашқиму башланғуч синиплар муәллимлириниң зиммисигә жүклинидиған вәзипиниң салмиғи еғир, җавапкәрлиги жуқури.
Җәннәтқиз һәдә мошу җавапкәрликни муәллим болуп ишлигән дәсләпки жиллардин тартипла чоңқур һис қилип, та һазирғичә униңға изчил әмәл қилип келиватиду. Һәр бир дәрисни балиларниң яш өзгичилигигә мувапиқ көрнәклик қуралларни пайдилинип, аддий һәм чүшинишлик, күндилик турмуш билән бағлаштурған һалда қизиқарлиқ қилип өтүш униң вуҗудиға сиңгән адити. Тәрбийәвий әһмийити зор синиптин ташқири ишларғиму көп көңүл бөлиду. Синип саатлирини мәзмунлуқ һәм җанлиқ түрдә өткүзүп, уларға балиларниң толуқ һәм паал қатнишишини диққәт мәркизидин чиқармайду. Шуниң нәтиҗисидә синипидики оқуғучиларниң үлгириши яхши, тәртип-интизами үлгилик.
Җ.Исмайилова топлиған бай иш-тәҗрибисини кәсипдашлири, болупму яш муәллимләр билән бөлүшүшкә һәр қачан тәйяр. Бу җәһәттин һәр бир оқуш жилида очуқ дәрисләр билән тәрбийә саатлирини өткүзүп келиватқанлиғини тилға елишқа әрзийду. Булардин ташқири, башланғуч синип муәллимлириниң наһийәлик һәм вилайәтлик семинарлири билән кеңәшмилиригә мәзмунлуқ докладлири билән қатнишип келиватқанлиғиниму атап өткән орунлуқ.
Пешқәдәм педагог өткән жиллар җәриянида йүзлигән шагиртларни тәрбийиләп, қатарға қошти. Улар бүгүнки күндә җәмийәттин мунасип орнини тепип, һәрхил саһаларда әмгәк қиливатиду. Шундақла өзиниң изини бесип, әвлат тәбийиләштәк шәрәплик ишниң һөддисидин оңушлуқ чиқип келиватқанларму аз әмәс.
Бийилқи оқуш жили Җәннәтқиз һәдә үчүн алаһидә бир хошаллиқ билән башланди. Бала тәрбийиләштики узун жиллиқ йемишлиқ әмгиги мунасип баһалинип, Қазақстан хәлқи Ассамблеяси вә «Уйғур анилар кеңиши» җәмийәтлик фонди тәрипидин тәсис қилинған Айшәм Шәмиева намидики мукапатниң саһиби аталди. Кәсипдишимизни бу хошаллиғи билән тәбрикләп, йәниму чоң муваппәқийәтләргә йетишигә сәмимий тиләкдашлиғимизни билдүримиз.
Майминәм САДИҚОВА,
Б.Назим намидики оттура мәктәпниң муәллими.
Яркәнт шәһири.
585 рет
көрсетілді0
пікір
