• Иҗтимаий мәсилә
• 28 Қаңтар, 2021

Пенсия фондидики мәбләғни пайдилиниш үчүн қандақ һөҗҗәтләр һаҗәт

Жил бешидин тартип қазақстанлиқлар пенсия фондидин топланған мәбләғни елиш үчүн әризиләрни беришкә башлиди. Мәбләғни тегишлик мәхсәттә пайдилиниш тоғрилиқ һөҗҗәтләр әризиләр қобул қилинғандин кейин берилиду.
Пенсия фондидин мәбләғни пайдилинишқа әризә бериш үчүн электронлуқ рәқәмләр имза вә ахчини елиш үчүн йетәрлик дәрижидә мәбләғ болуши лазим. Тегишлик оператор вә бирпүтүн пенсия пулини жиғиш фонди әризини мақуллиғандин кейин соралған мәбләғ, әгәр у һаҗәт дәриҗидин ашмиса, мәхсус һесап-чотқа әвәтилиду. Мошуниңдин кейин ахчини алғучи қандақту-бир келишим-шәртләрни түзүштә униңға үмүт қилиши мүмкин. Лекин мәзкүр ахчини тегишлик һөҗҗәтләр рәсмийләштүрүлгәндин кейинла һесап-чотлардин елишқа болиду. Шуниң үчүн қозғалмайдиған мүлүкни сетивелишта, ипотека рәсмийләштүрүштә башқиму келишимләрни имзалиғанда бирқетимлиқ пенсия төлиминиң пайдилинилидиғанлиғи һәққидә унтимаслиғимиз керәк.
Төвәндә биз топланған пенсия пулини һәрхил мәхсәтләргә пайдилиништа берилидиған әризигә қошумчә қандақ һөҗҗәтләрниң һаҗәт болидиғанлиғини ейтип өтүмиз. Буларниң тизимини топланған пенсия пулини пайдилиниш бойичә онлайн-платформида таптуқ. Ипотекилиқ қәриз пулни Қазақстанниң һәрқандақ банкида йепишқа болиду. Буниң үчүн банкқа төвәндики һөҗҗәтләр билән мураҗиәт қилиш керәк: ахча салғучи вә иккинчи дәриҗидики банк яки ипотекилиқ тәшкилат оттурисида имзаланған қәризни төләш графиги билән банктин елинған қәриз келишими, банкниң вакаләтлик шәхсиниң мөри вә имзаси билән қәриз қалдуғиниң барлиғи вә қалған қисми тоғрилиқ ениқлимиси, униңда банк қәризиниң келишим номери, мәхсити, қәриз қалдуғи, реквизитлири көрситилиши тегиш. Мундақ ениқлима берилгән күндин тартип бәш күн күчкә егә.
Турушлуқ өйни һәм биринчи, һәм иккинчи базардин сетивелишқа, үлүшлүк қурулушқа беришкә болиду. Мошуниң өзидә төвәндики һөҗҗәтләр лазим: тегишлик вакаләтлик орган тиркигән турушлуқ өйни сетивалғанлиғи яки сатқанлиғи, хусусийлаштурулғанлиғи, қәрәлгә алғанлиғи тоғрилиқ келишим, менлар, топланған пенсия пули берилгән әһвалда алғучиға яки униң йеқин уруқ-туққанлириға рәсмийләштүрүлгән турушлуқ өйгә егә болуш һоқуқини тәстиқләйдиған башқиму һоқуқлуқ күчкә егә һөҗҗәтләр. Шундақла қозғалмас мүлүк һоқуқлири тиркәлгәнлиги вә униң техникилиқ характеристикиси тоғрилиқ тегишлик органниң һөҗҗити тәләп қилиниду.
Әгәр турушлуқ өй көппәтирлик турушлуқ өй қурулушиға үлүшлүк қатнишиш йоли арқилиқ елинған болса, вакаләтлик орган тәрипидин тиркәлгән турушлуқ өй қурулушиға үлүшлүк қатнишиш тоғрилиқ келишим һаҗәт.
Шундақла бу турушлуқ өй алғучиға яки униң йеқин уруқ-туққанлириниң намиға рәсмийләштүрүлгән цессия (йол бериш) келишими яки Қазақстан Җумһурийитиниң үлүшлүк қатнишиш тоғрилиқ қануниға мувапиқ көппәтирлик турушлуқ өйдә үлүшини бериш тоғрилиқ келишим болуши мүмкин. Мәзкүр хизмәтни көрситидиған Қазақстанниң һәрқандақ банкида ипотека рәсмийләштүргәндә пенсия фондида топланған пулни дәсләпки бәдәл сүпитидә пайдилинишиңиз мүмкин. Мошуниң өзидә қозғалмас мүлүкни биринчи һәм иккинчи базарда, шундақла һәрхил турушлуқ өй программисиниң ярдими арқилиқ алалайсиз. Банк қәриз пулиниң бир келишими даирисидә җөндәштин өткүзүш арқилиқ турушлуқ өйни елишқа болиду. Дәсләпки бәдәлгә пенсия фондида топланған ахчини пайдилиниш үчүн пәқәт бирла һөҗҗәт һаҗәт: банктин яки ипотека тәшкилатидин ахча алғучиға ипотекилиқ турушлуқ өй қәриз пулиниң мақулланғанлиғи тоғрилиқ хети керәк. Униңда ахча миқдари, мәхсити вә дәсләпки бәдәл миқдари көрситилиши керәк. Буниңдин ташқири банкниң реквизит һесап-чоти лазим. Униңда қәриз бойичә дәсләпки бәдәл сүпитидә әвәтилиши үчүн бир вақитлиқ пенсия төлими көрситилиши тегиш.
Банкқа мураҗиәт қилғанда мәзкүр һөҗҗәтниң бир вақитлиқ пенсия төлимини пайдилиниш арқилиқ дәсләпки бәдәлни төләш үчүн һаҗәтлигини тәкитләш зөрүр. Пенсия фондида топланған ахчини пайдилиниш бойичә онлайн-платформида пенсия ахчиси һесавиға давалиниш үчүн һаҗәт болидиған һөҗҗәтләр тоғрилиқ әхбаратниму тепишқа болиду. Мәсилән, ахча егисини медицина хизмитидин пайдилинишқа әвәтиш тоғрилиқ врачлар комиссиясиниң йәкүни. Уму пенсия фондида топланған ахча һесавиға төлиниду. Шундақла медицина тәшкилати билән имзаланған давалиниш бойичә хизмәтләрни көрситиш тоғрилиқ келишим (чәт әл клиникиси билән келишим имзаланған әһвалда дөләт яки рус тилиға тәрҗимә қилинған вә нотариуста тәстиқләнгән келишим), дора-дәрмәкләрни вә медицина әсвап-үскүнилирини сетивелиш тоғрилиқ келишим, һесап-чот яки һесап-чот-фактура лазим.