• Һакимлар һесавити
• 28 Қаңтар, 2021

Тағ бағридики мәлиләрдә су тапчил..

Уйғур наһийәсидә һакимларниң хәлиқ алдида һесават бериш жиғини Ғалҗат йезисидин башлинип, тағ бағриға орунлашқан йеза округлирида давам қилди. Наһийә һакими вә йеза округлириниң һакимлири өткән жилниң йәкүни бойичә атқурулған ишлар тоғрилиқ һесават бәрди. 

Сабирәм ӘНВӘРОВА,
«Уйғур авази»

«Суниңму сориғи бар» демәкчи, бюджеттин бөлүнгән һәр тийинниң ишлитилиши вә наһийәдә дөләт программилириниң орунлиниши һәққидә ейтип өткән наһийә һакими Шөһрәт Нурахунов, өз новитидә, турғунларниң соаллириғиму җавап бәрди. Һәр әсвапниң өз аһаңи болғинидәк, һәр йезида һәрхил мәсилә көтирилди. Асасән, йәнила шу йәр-су проблемилири қозғалди. Илгири-кейин ейтилип келиватқан бу проблемиларға бийил айрим йезилардики Интернетниң начарлиғиму қошулған. Чүнки жирақтин оқуш җәриянида оқуғучиларниң билим елишиға Интернетниң начарлиғи сәлбий тәсирини тәккүзмәктә. 
Тағ бағриға җайлашқан йезиларда терилғу ишлири үчүн асасән су тапчил. Су йоқ йәргә ашлиқ тәрмәк, ериқ сүйидин белиқ тутмақ билән баравәр. Шуңлашқа Ғалҗат, Дардамту, Шуңқар, Кичик Дехан қатарлиқ йезиларниң хәлқи тосма мәсилисини оттуриға қойди. Дөләт тәрипидин яритилған мүмкинчиликләрни пайдилинип, йәргә тәр төкүшкә тәйяр турғунларға суниң тапчиллиғи тосалғу болуветипту.
 Әнди ичидиған су мәсилисигә кәлсәк, бүгүнки күндә наһийәдики 23 йеза (88 пайиз) мәркәзләштүрүлгән ичидиған су билән тәминләнгән. Хош, ғалҗатлиқлар «Йезимизға қачан су киргүзилиду?» дегән соалини бийилму йоллиди. Жиғинда Ғалҗат йезисини таза ичидиған су билән тәминләш системиси қурулушиниң башланмиси үчүн бюджеттин 250 миллион тәңгә қараштурулғанлиғи мәлум болди. Ваһаләнки, ғалҗатлиқлар тәрипидин қозғалған йәнә бир муһим мәсилә – электр симлири билән бой талашқан дәрәқләрни кесиш проблемиси болди. «Қаттиқ боран чиққан күни дәрәқ ток маңидиған симларға өрүлүп, отниң астида қалармизму?» дегән әндишидә екән турғунлар. Наһийә һакими җавапкәр шәхсләргә мәзкүр мәсилини тез-арида һәл қилишни тапшурди. 
Ғалҗат вә Кичик Дехан йеза округлири турғунлиридин «Йезилиқ дохтурханимизда анализ елинса» дегән тәклип келип чүшти. “Анализ тапшуруш үчүн Чонҗиға қатнавәрмәй, қолумизда бар мүмкинчиликтин пайдилансақ”, дәйду аһали. Бәзи хизмәтләр үчүн Кичик Деханға қатнашқа мәҗбур болған Чоң Дехан йезисиниң турғунлири почта мәсилисини көтәрди. 
Мәдәнийәт өйини мурәккәп җөндәштин өткүзүп, сүйи киргүзүлүп, йоли ясалған кәтмәнликләрниң көңли тоқ. Лекин мәктәптики билим сүпитиниң төвәнлиги жут чоңлирини ғәшкә салмақта. Шундақла Кәтмән йеза округиға қарашлиқ Кепебулақ йезисида Интернет йоқлуғи ейтилди.
Дардамтулуқлар «Йезимизға заманға лайиқ почта, клуб вә ФАП селинса» дегән тәкливини йоллиса, шуңқарлиқлар кочилирини асфальтлаш мәсилисини көтәрди. Дөләт программилири асасида техника, субсидия елишқа вә тиҗарәтчилигини тәрәққий әткүзүшкә тәйяр турғунларниң нийитидин хурсән болған наһийә рәһбәрлиги ишләймән дегән адәмгә қолдин келәр ярдимини айимайдиғанлиғи ейтип, алдики вақитта турғунлар тәрипидин ейтилған ой-пикирләрни асасқа алған һалда, паалийәт елип баридиғанлиғиға ишәндүрди. 
Умумән, жиғинлардики бар гәп пәқәт проблемилар билән чәклинип қалмиди, хәлиқ турмушиниң жилдин-жилға яхшилиниватқанлиғини ейтип, йәрлик һакимларниң һесаватиға «қанаәтлинәрлик» дәп баһа бәрди.