• Һакимлар һесавити
• 28 Қаңтар, 2021

Йоллар җөндилип, кочилар йорутулиду, мәктәпләр селиниду

Панфилов наһийәсиниң һакими Талғат Өмирәлиев тәвәдики 13 йеза округиниң вә Яркәнт шәһириниң турғунлириға биржиллиқ иш-паалийити һәққидә онлайн-форматта һесават бәрди. 

Гөһәрбүви ИСМАЙИЛҖАНОВА,
 «Уйғур авази» 
 
Наһийә һакиминиң һесавити һәққидә наһийәлик «Яркәнт тәвәси» гезитида жиғинларниң қачан вә қандақ түрдә өткүзүлидиған вақти алдин-ала елан қилинди. Дәсләпки онлайн-һесават жиғин Басқунчи йезисидин башланди. 
 Талғат Өмирәлиев әң алди билән бу күнләрдә Қазақстан Җумһурийитиниң Тунҗа Президенти — Елбасы Нурсултан Назарбаевниң «Келәчәккә нишан: мәнивий йеңилиниш» намлиқ стратегиялик мақалиси һәм җумһурийәт Президенти Қасым-Жомарт Тоқаевниң қазақстанлиқларға йоллиған «Қазақстан йеңи реаллиқта: иш-һәрикәт вақти» намлиқ Мәктүбидә көрситилгән муһим вәзипиләргә тохталди. Талғат Әбеноғли вәзипә-көрсәтмиләрниң наһийәдә қандақ әмәлгә ешиватқанлиғини саһалар бойичә тизип ейтип өтти. 
Докладта атап көрситилишичә, өткән жили наһийәдә ишләпчиқиришниң асасий саһаси болған аграр секторида 51 млрд. 200 миллион тәңгилик мәһсулат йетиштүрүлди. У өткән жилдики билән селиштурғанда 2 млрд. 500 млн. тәңгигә өскән. Наһийәдә 43,6 миң гектар мәйданға йеза егилиги зираәтлири терилди. Вилайәтлик көрсәткүчләргә асасланған һалда шуни тәкитләш керәкки, көмүқонақниң 33 пайизи Панфилов наһийәсидә өстүрүлиду. Наһийәдә 27193 гектар мәйданға “етиз мәликиси” терилип, униңдин 167,600 тонна ашлиқ йетиштүрүлди. 
Наһийәдә санаәт саһаси бойичә 17 млрд. 600 млн. тәңгилик мәһсулат елинди. Буниңда «Яркәнт крахмал-ширнә заводи» «Мишкап заводи» ҖЧЙ — «Сүръәтлик индустриаллиқ-инновациялик тәрәққият» программиси тәләплиригә толуқ җавап бериватқан Оттура Азиядә тәңдиши йоқ заводларниң бири болуши билән елимизниң ихтисадий тәрәққиятиға қошуватқан һәссисиниң салмақлиқ екәнлигини тәкитләш орунлуқ.
Наһийәдики кичик вә оттура тиҗарәт субьектлириниң сани — 8769, уларда 14811 адәм ишләватиду. Өткән жили 17 объект ишқа қошулуп, 120 йеңи иш орни ечилди. 629 миллион тәңгилик инвестиция тартилди. 
«Ақбулақ» программиси бойичә аһалини ичидиған су билән тәминләш ишлири изчиллиқ билән жүргүзүлгәнлигини тәкитләш орунлуқ. Саламәтликни сақлаш вә билим бериш саһалирини тәрәққий әткүзүп, дуниявий дәриҗигә йәткүзүш - дөләтлик әһмийәткә егә мәсилә сүпитидә қарилип келиватиду. Елимиз Президентиниң һәр жили хәлиққә йоллаватқан мәктүплиридиму бу һәқтә алаһидә қәйт қилинип, ениқ вәзипиләр билән тапшурмилар оттуриға қоюлмақта. 
Һаким өз һесавитида Дөләт рәһбириниң Мәктүплиридә «100 ениқ қәдәм» Милләт планида алға сүрүлгән вәзипиләрниң миқияслиқ екәнлигини, уларни орунлаш үчүн қолға кәлтүрүлгән утуқлар билән чәклинип қалмай, йеңи пәллиләргә қол йәткүзүш үчүн әмгәк қилиш лазимлиғини атап өтти. Җүмлидин медицина саһасидиму медицина мәһкимилириниң һаҗәтлик автомашина вә йеңи қурал-җабдуқлар билән тәминләнгәнлигини атап көрсәтти. Болупму бу жили пандемия вақтида ағриқханиларни керәклик әсвап-үскүнә, дора-дәрмәк билән тәминләш ишлири үзлүксиз, өз вақтида әмәлгә ашурулди. Җүмлидин мошу жили наһийәлик ағриқханиниң 4 тез ярдәм машиниси билән толуқтурулғанлиғини тәкитлиди. 
Докладта тәкитләнгинидәк, мәдәнийәт, спорт, җәмийәтлик тәртипни сақлаш вә башқа саһалар бойичә мәхсәтчанлиқ иш елип берилди. 
 Һесават жиғинлар бүгүнки күнгә қәдәр Басқунчи, Пәнҗим, Бирлик, Чоң Чиған, Чулуқай, Үчарал йезилирида болуп өтти. 

Панфилов наһийәси.