• "30 Тәуелсіздік жылдары"
• 03 Наурыз, 2021

Киндик ана болуш — бәхит

— Киндик ана болуш һәркимниң қолидин келивәрмәйду. Пәқәт жүрәк әмри билән кәспини чин дилидин сөйүш, қорқумсиз вә җүръәтлик болуш лазим, — дәйду Панфилов наһийәлик пәрзәнтханиниң акушери Рошәнгүл Мәмәтсопиева. 

Гөһәрбүви  ИСМАЙИЛҖАНОВА,
«Уйғур авази»

 Рошәнгүл Мәмәтсопиева, 1991-жили елимиз мустәқилликкә қол йәткүзгән жили Яркәнттә дунияға кәлди. Шәһәрдики Билал Назим намидики мәктәптә оқуватқан чағлиридила әдәбият дәрисидә инша язғанда «Мән дохтур болимән» дегән мавзуни таллатти. Идрәклик қиз мәктәпниң 9-синипини әла баһаларға тамамлидидә, ата-аниси вә устазлириниң үмүтини ақлаш үчүн һөҗҗәтлирини шәһәрдики «Диана» медицинилиқ колледжиға тапшуруп, емтиһанлардин сүрүнмәй өтүп, студент аталди. Рошәнгүл курсдашлири билән шәһәрниң жуқарқи қисмидики туғутханида тәҗрибә ишлирини өткүзүшкә тиришти. Ундақ болғини у колледж босуғисини атлиған чағдила акушер болушни арман қилди. Шуңа дәрисләрдин бош вақитта, устазлири билән достлиридин йошурмай, туғутханиға келип, акушер-гинеколог вә акушер-дохтурлардин бу кәсипниң қир-сирлирини тинмай үгәнди. Идрәклик қиз келәчәк туғутханиға кәлгән җуганларға ана болушқа ярдәмлишиштинму қорқмиди. 
 “Арман алға башлайду” демәкчи, Рошәнгүл медицинилиқ колледжниму қизил дипломға тамамлап, өзи арман қилған туғутханиға акушер болуп ишқа орунлашти. Елимиз мустәқиллигиниң 20 жиллиғи нишанлиниватқанда ишқа орунлишиведи, он жилдин бери Яркәнттики әң чоң туғутханида әң аммибап киндик аниларниң биригә айланди. 
 – Наһийәмиздә130 миңдин ошуқ аһали бар. Жилдин-жилға аилә қуруватқанлар сани қанчә нурғун болса, ана болуш бәхтигә йетиватқан яш аниларму шунчә көп. Әмгәк паалийитимни башлиған дәсләпки жиллири пәрзәнт сөйүватқан аниларниң йеши жигирмә үчтә болса, бу күнләрдә ундақларниң йеши 18гә чүшкәнлигини тәкитлигүм келиду. Яш анилар сани интайин көп. Елимизниң демографиялик сәяситигә үн қошқан һалда яш анилар бир-икки пәрзәнт билән әмәс, төрт бәш, һәтта ахирқи вақитларда алтә, йәттә бала тепип, «Алтын» авә «Күміс алқа» егилири атиливатқанлиғи, әлвәттә, хошал боларлиқ иш. 
Әслидә Яркәнт туғутханисиға бошиниш үчүн кәлгән келәчәк аниларни қобул қилиш мениң беваситә вәзипәм болуп һесаплиниду. Йәни улар өзлирини бошандуридиған акушерларға йәткичә һөҗҗәтлирини рәсмийләштүрүш охшаш у-бу ишлар мениң зиммәмдә. Лекин толғақ билән кәлгән бәзи анилар қобул қилиш бөлүмидила бошинип қалидиған һаләтләрму йүз бериду. Мустәқилликниң тәңтуши киндик ана Рошәнгүл кәспи бойичә юрист жутдиши Нариман Закиряев билән 2013-жили аилә қуруп, икки пәрзәнт сөйди. 
 Мустәқил әлдә туғулуватқан пәрзәнтләр һәқиқәтәнму бәхитлик. Чүнки елимиз тәрәққий әткән оттуз әлниң қатариға кириши билән биллә башқа әлләрни милләтләрара достлуғи, бирлиги билән өзигә қаратқан, ихтисади күндин-күнгә тәрәққий етиватқан қудрәтлик әлгә айланди. Елимизниң келәчиги болған бүгүнки сәбиләрниң, уларни йоруқ дунияға елип келиватқан аниларниң тени сағлам болғай, дегән тиләкни ейтқумиз келиду. 
 Һә, Рошәнгүл Мәхсүмқизи охшаш пәрзәнтни аччиқ жиғиси билән дунияға көз ечишиға ғәмхорлуқ қиливатқан қоли йеник киндик анилар көп болсун демәкчимиз. 

Панфилов наһийәси.