• Тәнтәнә
• 11 Наурыз, 2021

Йәр қәдрини билгән ана

Панфилов наһийәсидә Социалистик Әмгәк Қәһримани мәрһум Мәрийәм Ниязованиң туғулғининиң 90 жиллиғиға даир чарә-тәдбирләр давамлашмақта. Җүмлидин йеқинда Панфилов наһийәлик китапхана хадимлириниң тәшәббуси билән наһийәлик Уйғур этномәдәнийәт мәркизиниң мәҗлисләр залида «Жер қадірі бағаласаң артады» мавзусида кәч болуп өтти. 
 
Гөһәрбүви ИСМАЙИЛҖАНОВА,
«Уйғур авази»

Яркәнт шәһәрлик китапхана хадимлири Сауле Қайрақова, Айгүл Жетписбаева Мәрийәм Әсқәрқизиниң һаяти вә әмгәк паалийити тоғрисида доклад билән сөзгә чиқти. Шуниңдин кейин сөз новити уни тонуп билидиған кәч меһманлириға берилди. 
 Яркәнт шәһириниң һакими Болат Омаров тәвәдә көмүқонақ өстүрүш арқилиқ исми илгәрки Кеңәш Иттипақи даирисигә тонулған дехан Ниязовлар аилиси һәққидә тәпсилий тохталди. Әмгәк ветеранлири – Панфилов наһийәсиниң пәхрий гражданлири Турсун Семәтов билән Қурманҗан Ахметқалиев болса, көпмилләтлик тәвә хәлқиниң достлуғини, әмгәктики төһпилирини, йеза егилиги ишләпчиқиришиниң маһир тәшкилатчилири тоғрисида тәвринип ейтип бәрди. Уйғур қизи Мәрийәмниң таңниң етиши билән күнниң петишини етизлиқта қарши елип, ата кәспигә садақити түпәйли кәтмән чепип, “етиз мәликиси” аталған дарамити көп көмүқонақтин алған мол һосули һәққидә ейтип өтти. Натиқлар Мәрийәм Ниязованиң Ленин, Әмгәк Қизил Туғи, Хәлиқләр достлуғи орденлири билән тәғдирләнгәнлигини һәм буниңдин 40 жил бурун Социалистик Әмгәк Қәһримани аталғанлиғини мәмнунийәт билән тилға алди. Панфилов наһийәлик мәслиһәтниң депутати Алмас Батырхан болса, йеза егилиги саһасида өчмәс из қалдурған әмгәк мәрданилириниң исим-шәрипини улуқлап, бүгүнки әвлатқа үлгә қилиш лазимлиғини қәйт қилди. Минбәргә көтирилгәнләр асасән дехан ана һәққидә хатирилири билән ортақлашти. 
 Наһийәлик китапхана мудири Дәрия Бекжигитова туғулуп өскән елиниң, йериниң қәдрини ашурған, униң һәрхил саһалиридики тәрәққиятиға тегишлик үлүшини қошқан әдипләр, әмгәк мәрданилириға беғишланған бу хилдики чариләрниң жил ахириғичә уюштурулидиғанлиғини тәкитлиди. 
  
Панфилов наһийәси.