• Норуз һәққидә
• 31 Наурыз, 2021

Сәһәрлик студиядә — “Баһар ансамбли”

Бәхтишат СОПИЕВ,
«Уйғур авази»

Алмута шәһиридики «Қайрат» микрорайонида бәрпа болған уйғур жутиниң адәмлири наһайити өм. Бу жутта җумһурийәтлик Уйғур этномәдәнийәт мәркизиниң шөбиси сүпитидә қурулған мәдәнийәт мәркизи моҗут. Анилардин тәркип тапқан «Баһар» намлиқ ансамбль бар. Акилиримиз рәнҗимәс, бу жутта ханим-қизлиримиз паалийәтчан. Шуңлашқа “Жутумизда жилниң төрт пәслидә баһар” дәп һәзиллишиду қайратлиқ уйғурлар. Булту елимиздә җарий қилинған карантинға мунасивәтлик қайратлиқлар бир жил «дәм алди». Бийил, адәттикидәк, йәнә баһар билән тәңла ойғанди. Әлвәттә, карантин тәләплиригә әмәл қилинди.
Бу қетимқи мәрасимларниң бешида адәттикидәк, җумһурийәтлик Уйғур этномәдәнийәт мәркизи йенидики «Нураний анилар» кеңишиниң рәиси Гүлҗаһан Муратова, мәзкүр мәһәллидики мәдәнийәт мәркизиниң рәиси Хәлимәм Шаваева, униң орунбасари Җөһәрбүви Абдрахманова туруп, уларға мәһәллиниң активист ханим-қизлири яр-йөләк болди. Баһарниң дәсләпки күнлириниң биридә улар нураний аниларни 8-Март мәйрими билән тәбрикләп, дәстихан йейип, концертлиқ программа көрсәтти. 
Қайратлиқ ханим-қизлар Норуз мәйримигә тәйярлиниватқан бир пәйттә уларға «Алматы» телеканалидин тәклип чүшиду. «Таңғы студия» программиси бир уйғур аилисиниң Норузға қандақ тәйярлиқ көридиғанлиғини чүшәрмәкчи екән. «Достлуқ» өйидә өтидиған һәрқандақ мәйрәмләрдә паалийәтчанлиқ көрситиватқан қайратлиқ ханим-қизларни яхши билидиған журналистлар уддул «Қайрат» микрорайониға кәпту. 
– Мәйрәмлик программимиз билән меһманларни күтүвататтуқ, ишиктин бир қаракөзүмиз «әссалам» дәп кирип кәлди, – дәйду Хәлимәм Шаваева. – У «Алматы» каналида ишләйдиған уйғур қизи Дилнара Зәйнулла екән. Униңға биз билән «ишләш» йеник болди. Алди билән миллий оюнлиримизни намайиш қилдуқ. «Төрт ташни» өзимизму сеғинип қалған екәнмиз. Кейин бир-биримизгә һосма қойдуқ. Аңғичә «көк чөшүримиз» тәйяр болди. 
Иккинчи иссиқ тамаққа саһипханлар норуз еши – сүмәләкни тәйярлапту. Бу тамақниң дәмиму меһманларниң «ағзида қалди». Андин анилар билән ханим-қизлар миллий урпи-адәтлиримиз һәққидә билгәнлирини сөзләп бәрди.
Өзиниң кәң хәйрихаһлиқ паалийити билән  мәлум Гүлҗаһан анини журналист қиз бирдинла тонуди. Талай аҗизниң баш-паналиқ болушиға ярдәм қолини сунған аниниң мундақ мәрасимларни уюштуруш қабилийитигиму өзлириниң жуқури баһасини бәрди. 
– Биз өзимизниң қазинидила қайнимай, башқиларғиму мошундақ өзимизниң яхши тәрәплиримизни көрситишимиз керәк, – дәйду Гүлҗаһан ана. – Қайратлиқ ханим-қизларға миннәтдарлиғим чәксиз. Төрт-бәш минутлиқ көрситиш арқилиқ уйғурни көпкә тонутти.
Шундақ қилип, мәрасимниң ахирида уйғурниң қаймақлиқ әткәнчейи кәлтүрүлди. «Әткәнчай, кәткән чай», дәп күлүшти саһипханлар. Бу әсли чақчақ. Амма әткәнчайни бир қетим ичкән адәм, иккинчи қетим ичмәй қалмайду. Демәк, йәнә мундақ учришишлар болуп туриду. Көрситишни видеоға чүшәргән оператор жигитләр әйнә шундақ хуласигә кәлди.