• Норуз һәққидә
• 31 Наурыз, 2021

Чариндики чарә-тәдбир

Сабирәм ӘНВӘРОВА,
«Уйғур авази»

Чаринда йезилиқ анилар кеңишиниң рәиси Жамал Оқаеваниң тәшәббуси билән Норуз мәйрими уюштурулди. Әнъәнимизгә айланған хасийәтлик мәйрәмдә қазақ билән уйғурниң миллий таамлирини, қедимий урпи-адәтлирини вә хәлиқ нахшилирини яш әвлатқа тонутуш мәхситидә уюштурулған мәрасимда, бүгүнки вәзийәткә бағлиқ адәм сани чәкләнсиму, видеолири Интернет арқилиқ көпкә тарап, җамаәтниң диққитини ойғатти. 
Авал йеза турғуни Бибинур Садиқованиң қутлуқ өйигә жиғилған жут анилири уйғур хәлқиниң миллий таамлирини пиширип, қолһүнәрвәнчилик буюмлиридин көргәзмә уюштуруп, кона нахшиларни ейтип, унтулуп қалған урпи-адәтлиримизни қайта тирилдурғандәк болди. Миллий усулда безәндүрүлгән бөлмидики мол йейилған дәстихан вә миллий кийимләрни кийип, җозини чөгиләп олтарған жут анилириға һәммә зоқ әйләшти. Аниларниң достлуғи – балилар достлуғиниң уютқисиға айлансун”, дәп дуа қилди ақромаллиқ анилар. 
Әнди мошундақ йәнә бир учришиш анилар кеңишиниң рәиси Жамал Оқаеваниң өйидә өткүзүлмәкчи екән. 
– Әндики новәттә қазақ анилар уйғур анилирини қарши елип, қазақ хәлқиниң урпи-адәтлири намайиш қилинидиған болиду. Бу ишниң әмәлгә ешишиға мениң ярдәмчилирим Света Сатымбекова, Матайхан Қыпшақбаева, Эльмира Қоқымбекова, Улжан Сатымбекова, Бибинур Садиқова, Реһан Авутова, Майгүл Қадирова, Зоһра Палтахунова, Шадийәм Сопахунова көп күч чиқарди, – деди Жамал Қожамбердиқизи. 
Хулләс, Жамал һәдиниң анилар кеңишиниң рәислигигә сайланғанлиғиға техи бари-йоқи үч ай болди. Ушбу қисқа вақит ичидә у нурғунлиған әһмийәтлик ишларни әмәлгә ашуруп, хәлиқниң алқишиға еришти. Наһийәлик мәслиһәтниң депутати вә «Уйғур наһийәлик накалар кеңиши» җәмийәтлик бирләшмисиниң рәиси Жамал Оқаеваниң анилар кеңишиниң рәиси сүпитидә йолға қойған ушбу башланмиси көпниң көңлидин чиқип, жуқури баһаланди.