• Қәлб төридики инсанлар
• 31 Наурыз, 2021

Мениң хошнам

Мениң удул хошнам Дилбәр Әлаеваниң он бәш нәвриси, тоққуз чәвриси бар. Уларни Дилбәр һәдә анилиқ меһри билән чоң қилди, һәрбириниң һаяттин өз орнини тепишиға толуқ мүмкинчилик яратти. Һә, пәқәт пәрзәнтлириниңла әмәс, нәврә-чәврилириниңму ғәм-тәшвишсиз һаят кәчүрүшини тиләп күни өтүватқан Дилбәр һәдигә қарап, бәзидә зоқлинип кетимән вә “Бәхитни қериғанда бәрсун” дегән нәқилниң нәқ мошу һәдимизгә қарита ейтилғанмекин дәп қалимән.
“Бәхит” демәкчи, Дилбәр һәдә һәқиқий бәхтини өз аилисидин тапти. 1961-жили йәттә жиллиқ Пәнҗим оттура мәктивини тамамлап, Иврайим ака Тейипов билән аилә қурди. Шундин буян йезидики әң инавәтлик аилиниң һәм түврүги, һәм чириғи болуп кәлмәктә. Биз, жутдашлири, шуни яхши билимизки, Дилбәр һәдә Калинин намидики колхозниң ихтисадий тәрәққиятиға биркишилик һәссисини қошқан йолдиши Иврайим ака билән һаятниң иссиқ-соғини биллә тартип, өзлириниң нәмунилик ишлири билән көпчиликни қайил қилған инсанлардур. Әр-аял ишләшниму, дәмелишниму биләтти. Әву бир жиллири, кеңәш дәвридә, улар өзлириниң тәшәббуси билән СССРниң бирнәччә шәһирини, җүмлидин Москва билән Ленинградни зиярәт қилғанлиғи, кейинки жиллири болса, тарихий Вәтинимизниң Турпан шәһиридә өтидиған әнъәнивий “Үҗүм мәйримигә” берип кәлгәнлиги сөзүмизниң испатидур.
 Бийил Дилбәр һәдә билән Иврайим акиниң аилә қурғиниға 60 жил толди. Улар бу мәрикини атап өтүш тәрәддутини қолға алғанлиғини шәхсән мән – хошниси яхши биләттим. Бирақ, амал нечүк, Иврайим ака вапат болдидә, бу иш әмәлгә ашмай қалди. Ейтмақчи, Иврайим ака Тейипов 30 жил колхозниң төртинчи терилғу бригадисини башқурди. Башқурғанда шундақ башқурдики, иши һеликәм әл ағзида, жутдашлириниң ядида. Мундақ дейишимниң сәвәви, наһийәгә тонулған тиҗарәтчи, “Беширов” дехан егилигиниң башлиғи Йолдаш Беширов пүткүл аңлиқ һаятини деханчилиқ билән өткүзгән дадиси Мәсим Бешировниң 100 яшқа толуши мунасивити билән өткүзгән мәрасимида Калинин намидики колхозниң баш агрономи Әғзәм Мәрүпов билән Иврайим Тейиповқа һөрмәт көрситип, чапан япқини бекар әмәс еди. Һә, мәрһумни жутдашлири әйнә шундақ һөрмәт қилатти.
 Мән әйнә шундақ инсанларға хошна болғанлиғим билән пәхирлинимән вә уларниң ибрәтлик һаят йолини яш әвлатқа үлгә қилип көрситишни пәрзим дәп билимән.

 Ризванәм РОЗИЕВА.
 Төвәнки Пәнҗим йезиси, 
Панфилов наһийәси.