• Редакция почтисидин
• 02 Қыркүйек, 2021

Биздиму яхши ишлар көп

«Уйғур авази» гезитиниң сәһипилирини варақлап, башқа жутлардики яхши ишларни, хусусән миллий мәктәплиримизниң әмәлгә ашуруватқан аламәт яхши ишлиридин вақип болғинимда, бизниңму йезидики, болупму мәктивимиздики изгү ишлар тоғрилиқ  башқиларму билсекән дәп ойлап қалимән. Ундақ дейишимниң сәвәви, Қизил Ғәйрәт — Талғир наһийәсидики 8620 адәм яшайдиған чоң йезиларниң бири. Йезимизда қурулғиниға 97 жил болған, 1750 оқуғучи билим алидиған 19-көпсаһалиқ гимназия бар. Шуңлашқа бүгүн мән маарип ақсақили сүпитидә, йезимиздики һәм мәктивимиздики бүгүнки таңда әмәлгә ешиватқан изгү ишлар һәққидә төвәндики қурларни йезишни мувапиқ көрдүм.
2020-2021-оқуш жилида 19-көпсаһалиқ гимназияни пүтәргән 53 учумкарниң йәттиси — Мөлдир Алаувадин, Аяулым Бейсен, Малика Дугашева, Назугум Һаҗиева, Динара Жданова, Айшагүл Молдаханова, Аружан Сейсембек «Алтун бәлгү», иккиси — Альмира Имирова вә Раһиләм Ғазиева – «Алаһидә үлгидики шаһадәтнамә» билән тамамлиди. 
 1958-жили илгәрки йәттә жиллиқ мәктәпләр сәккиз жиллиққа өзгәртилди. Әшу жилдин башлап мәктәпләр анатиллиқ, рустиллиқ синипларға бөлүнүшкә башлиди. Биз, шу чағдики КазПИниң уйғур бөлүмини 1960-жили пүтәргәнләр та бүгүнки күнгичә «Пәрзәнтлиримизни ана тилимизда оқутайли» дәп келиватимиз. Бу ишларда шундақла жут мөтивәрлири, жигитбеши Тохтахун Ибрагимов, Ханим-қизлар кеңишиниң рәиси Гүлбанум Бақиева һәм Ақсақаллар кеңишиниң рәиси Җамалдин Әлиев паалийәтчанлиқ көрситип келиватиду. Шу нәрсиниму алаһидә тәкитлигүм келидуки, мөтивәрлиримиз мәктәпни «Алтун бәлгү» билән пүтәргән Назугум Һаҗиеваға 100 миң тәңгә, «Алаһидә үлгидики шаһадәтнамә» саһиби Рәһиләм Ғазиеваға 30 миң тәңгә, шундақла синип йетәкчиси Алийәм Һашимоваға мукапат сүпитидә 50 миң тәңгә ианә қилди. Йәнә бир бәҗирилгән соваплиқ иш — жуқурида исимлири тилға елинған жутдашлиримизниң рәһбәрлигидә йезимиздики қәбирстанлиқни сүпәтлик санаәт плитилири билән қоршаватиду. 

Һосман ҺАШИМОВ, 
пешқәдәм мәрипәтчи.

Қизил Ғәйрәт йезиси, 
Талғир наһийәси.