• Мәрипәт беғиниң бағвәнлири
• 27 Қазан, 2021

Адил әмгәк вә абройлуқ аилә...

Инсан һаятиниң он жилини мәктәптә, кейинки 4-5 жилини институт-университетларда өткүзсә, қалған 30 — 40 жилини, йәни пүткүл аңлиқ һаятини меһнәт-әҗир үчүн сәрип қилидекән. «Һаятниң әһмийити – әмгәк» дегән сөз шуниңдин чиқса керәк. Һөрмәтлик дәм елишқа чиқиватқанлар көп, амма һөрмәткә сазавәр болуватқанлар толиму аз. Немишкә десиңиз, пүтүнсүрүк өмрүмиздә қанчә жил яшиғинимиз яки қандақ өйдә яшап, қандақ машина мингинимиз әмәс, қандақ әмгәк қилғинимизла әһмийәткә егә болидекән... 

Сабирәм ӘНВӘРОВА,
«Уйғур авази»
 
Җүмлидин бу күнләрдә һөрмәтлик дәм елиш йешиға йәткән Октябрь Һезмахуновниң (сүрәттә оттурида) кәсипдашлири вә әл-жут алдида һөрмити үстүн. Сәвәви, у шуниңға лайиқ әмгәк қилди. «Устаз» дегән улуқ намға дағ чүшәрмәй, кәспигә садиқлиғини сақлап, җанпидалиқ билән әмгәк қилди. Қириқ жиллиқ әмгәк йолида муәллим, мудирниң орунбасари вә мудир болуп паалийәт елип барди. Мәйли қандақ лавазимни егилимисун, өзини һәртәрәплимә қабилийәтлик мутәхәссис сүпитидә тонуталиди. Кәспий билими, тиришчанлиғи, тәдбирчанлиғи түпәйли утуққа йәтти, шөһрәт қазанди. Мана, шуңлашқиму шагиртлири вә кәсипдашлири униң исмини һәрқачан пәхирлиниш илкидә тилға алиду. 
Пәйғәмбәр йешиға йәткән Октябрь Турғаноғли Абай намидики Қазақ педагогика институтиниң химия-биология факультетини муваппәқийәтлик тамамлап, әмгәк йолини өзи билим алған ана мәктивидин башлайду. Йәни, 1983-жили Ақтам оттура мәктивигә химия пәниниң муәллими болуп ишқа орунлишиду. Яш һәм билимлик хадим әмгәксөйгүчлүги билән көзгә чүшүп, 1987-жилдин 2000-жилғичә мәзкүр билим дәргаһида илмий мудир болуп паалийәт елип барса, 2000-жилдин 2020-жилғичә, йәни топ-тоғра жигирмә жил мабайнида Ақтам оттура мәктивиниң мудири хизмитини атқуриду. 
2002-жили, йәни илмий мудир болуп ишләватқан вақтида «Оқуш вә тәлим-тәрбийә ишлирини диагностика асасида уюштуруш» намлиқ әмгиги нәшир қилинип, вилайәт муәллимлири вә илмий мудирлар арисида иш-тәҗрибиси кәң тәрғип қилиниду. 
Октябрь ака башқурған жиллири Ақтам оттура мәктиви наһийәдики алдинқи қатардики билим дәргаһлириниң биригә айланди. Муәллимләр билән оқуғучилар наһийәлик, вилайәтлик вә җумһурийәтлик мусабиқиләргә паал қатнишип, мәктәпниң шәнини қоғдиди. 2002-жили вә 2007-жили Ақтам оттура мәктиви вилайәтлик «Әң илғар йеза мәктиви» конкурсида иккинчи вә үчинчи орунлардин көрүнсә, 2012-жили җумһурийәтлик «Илғар 100 мәһкимә» конкурсиға қатнишип, җумһурийәтлик илғар 100 мәктәпниң қатариға кириду. Шу жиллири мәктәпни «Алтун бәлгү» вә алаһидә шаһадәтнамә билән тамамлиған шагиртларниң қатари көпийип, муәллимләрниң иш-тәҗрибиси өзгә мәктәпләргә үлгә сүпитидә таритилди. 
Октябрь Һезмахуновниң көпжиллиқ мевилик әмгиги мунасип баһалинип, көплигән медальлар, пәхрий ярлиқлар билән мукапатланди. Әлвәттә, униң үчүн әң жуқури мукапат – әл-жутиниң һөрмити. Һә, у бу һөрмәткә пәқәт маңлай тәри билән йәтти. 
Аңлиқ һаятини бир саһаға, бир хизмәткә, бир мәктәпкә бәхш әткән Октябрь Турғаноғли өмүрлүк җүпти Патигүл һәдә билән үч пәрзәнт тәрбийиләп, қатарға қошти. Қизлириниң һәммиси алий билим елип, һаяттин өз орунлирини тапти. Тунҗиси Замира – қазақ вә инглиз тилиниң мутәхәссиси. Оттуранчиси Эльмира билән кәнҗә қизи Наргиза – медицина саһасиниң хадимлири.
 Октябрь ака билән Патигүл һәдиниң аилә қурғиниға қириқ жилдин ашти. Бир қизиғи, әр-аял – мәктәп босуғисини тәң атлап, он бир жил бир синипта оқуған синипдашлар. Хош, мәктәп партисидин бағланған ришти жилдин-жилға мустәһкәмлинип, бу күнләрдә улар үч қизидин үч нәврә сөйүп, жутниң һөрмитигә бөлинип яшимақта. 
Һәқиқий бәхит бари-йоқи икки қәдрийәттин ибарәттур. Адил әмгәк вә абройлуқ аилә... Октябрь ака Һезмахуновта буниң һәр иккилиси бар. Әндиликтә, униң шу мәшәқитигә чушлуқ һалавәт көрүшигә тиләкдашлиқ билдүримиз. 

Уйғур наһийәси.