• Мәнавият
• 13 Сәуір, 2022

Йеңи әсәрләр билән толуқланди

Һәқиқәтәнму китапсиз билим йоқ. Ахирқи вақитларда китапханиларда ана тилимиздики бәдиий әсәрләрниң йетишмәслиги тоғрисида көп аңлайдиған болдуқ. Йеқинда мана шу бошлуқни толтуруш мәхситидә Панфилов наһийәсигә қәдәм тәшрип қилған «Бейбітшілік әлемі» хәлиқара қазақ иҗадий бирләшмисиниң әзалири наһийәдики 13 мәктәпниң китапханичилири билән учрашти. 
Яркәнт шәһиридики Хелил Һәмраев намидики оттура мәктивиниң китапханисида өткән баш қошушта «Бейбітшілік әлемі» иҗадий бирләшмисиниң «Устаздар одағы» лайиһисиниң рәһбири Аят Мылтықбаев мәзкүр иҗадий бирләшминиң җай-җайларда мәктәпләр билән һәмкарлиқта елип бериватқан чарә-тәдбирлири, җүмлидин фестиваль, байқашлар вә уларниң әһмийитигә тәпсилий тохталди. Мәзкүр бирләшминиң вице- президенти Турсун Разиев болса, Махмут Қәшқәрий, Йүсүп Хас Һаҗип, Хелил Һәмраев, Илия Бәхтия вә башқиму шундақ мәрипәтчи, намайәндиләр язғучи, шаирлар иҗадийитигә беғишлинивақан чариләр һәққидә ейтип бәрди. Шуниңдәк бу күни атиси, һели мәрһум Нуралим Розиниң 100 жиллиқ тәвәллудиға беғишлинип нәширдин чиққан «Ойлан, издән, тап» намлиқ китавини китапханиларға соға қилиш үчүн кәлгәнлигини изһар қилди. Панфилов наһийәсидики оқутуш уйғур тилида жүргүзүлидиған 13 мәктәпләр китапханилириға китаплар соға қилди. Шундақла бу күни Өмәрҗан Исмайилов, Пәридәм Тейипова, Әкрәм Әхмәтниң әсәрлириниму тапшурди. 
Учришишта «Бейбітшілік әлемі» иҗадий бирләшмисиниң Яркәнт тәвәсидики вәкиллири Абдумеҗит Мусәлимов, Аблеким Дамоллаев, Ташмәһәмәт Мәмләков, наһийәлик Уйғур этномәдәнийәт мәркизи рәисиниң орунбасари Турғанҗан Зайитов, баш жигитбеши Аблеким Қурбанов вә Хелил Һәмраев намидики оттура мәктәпниң муәллими Гүлназ Еләмова вә башқилар балиларниң китап оқуши үчүн давамлиқ ғәмхорлуқларни яритиш лазимлиғи һәққидә қәйт қилишти. 

Сүбһидин МӘҢСҮРОВ.

Панфилов наһийәси.