• Соваплиқ иш
• 19 Мамыр, 2022

Өмлүк намайиш қилинған күн

Шәмшидин АЮПОВ,
«Уйғур авази»

Наурызбай наһийәсиниң «Қарағайлы» микрорайони — көпчиликниң бешини қошушқа, хәлиқләр достлуғини, бирлик вә милләтләрара разимәнликни мустәһкәмләшкә, миллий урпи-адәтлиримизни сақлашқа көп көңүл бөлүп келиватқан илғар жутларниң бири. Қазақ, уйғур, рус, түрк, чечен, корей вә башқиму милләтләр иҗил-инақ истиқамәт қиливатқан бу мәлидә жутиниң ғемидә жүргән мөтивәр атилар билән нураний анилар интайин нурғун. Жут активистлириниң ейтишичә, Қарағайлыда 300дин ошуқ уйғур аилиси истиқамәт қилидекән. Улар «Өлүк рази болмай, тирик бейимас» дегән ибаригә әмәл қилған һалда, һәр жили йеза қәбирстанлиғида аммивий тазилаш, аватлаштуруш, әтрапини рәткә кәлтүрүш ишлирини әнъәнигә айландурған. Яшлар жутта өткүзүлүватқан муһимлардиму дайим чоңларниң йенидин тепилиду. Жут мөтивәрлири болса, уларға мәслиһәт берип, йол-йоруқ көрситиштин һарған әмәс. 15-май күнки шәнбиликтә биз жутиға көйүнидиған 7 яштин 70 яшқа болған 300гә йеқин қарағайлылиқниң әмгигини көрдуқ. Уларниң һиммитигә апирин әйлигүмиз келиду.
Җамаәтчилик ишлириниң активистлири Бәхтияр Садиқов, Зайир Һашимов, Кенжебек Данылбаев, Сидиқҗан Әйсаев, Рашидин Исмайилов, Илияр Исмайилов, Полат Садиқов, Рустәм Мәшрәпов, Әкбәр Мамуров, Ренат Сетиев, Малик Сетиев (жигитбеши), Бәхтияр Исмайилов (Наурызбай наһийәлик Уйғур этномәдәнийәт мәркизиниң рәиси), Света Насирова (Ханим-қизлар кеңишиниң рәиси), Айшәм Садиқова (Анилар кеңишиниң рәиси), ақсақаллар Өмәрҗан Исмайилов, Бекежан Данылбаевниң жутиға нәқәдәр көйүнидиғанлиғини, униң ишиға һәқиқий түрдә берилгәнлигини байқидуқ. Қәбирстанлиқни тазилаш ишлирини тамамлиғандин кейин, жут әһли әҗдатлар роһиға беғишлап нәзир бәрди. Дәстиханға дуа берип, қуръан оқулуштин авал, жигитбеши Малик Сетиев жутдашлири алдида қилинған ишлар тоғрилиқ һесават бәрди. Жут мөтивәрлири Өмәрҗан Исмайилов, Бекежан Данылбаев, нураний анилар Айшәм Садиқова билән Турсунай Тейипова вә башқилар «Қазақстанда йүздин ошуқ милләт вәкили иҗил-инақ яшаватимиз. Бу бизниң умумий өйүмиз. Достлуғимизға тил тәгмисун!», дәп өзлириниң қәлб сөзлирини изһар қилғач, жутиниң ғемини ойлап жүргән жут оғланлириға, паалийәтчан ханим-қизларға җамаәтчилик намидин сәмимий миннәтдарлиғини билдүрди. 
Бу күни милләтпәрвәрлик роһта, көтирәңгү кәйпиятта ишлигән жут әһли өз­ара өмлүги билән бирлигини намайиш қилди. Ана жутини бир дәқиқә ядидин чиқармай, жут үчүн көйүнүватқан мана мошундақ ирадилик оғланлар, паалийәтчан ханим-қизлар көпәйсун! Буниңдин кейинму Қарағайлы жутида яхшилиқлар, изгү-ишлар, йеңилиқлар боливәрсун, илаһим!