• Дидар ғенимәт
• 29 Маусым, 2022

«Дәм ғенимәт, дидар ғенимәт»

Адәттә, синипдашлар дегәндә беғубар балилиғиң, мәктәптики хошаллиқ дәмлириң, оюн-күлкилириң ядиңға келиду. Әгәр синипдашлириңни учритип қалсаң, худди дуниядики әң йеқин адимиңни тепивалғандәк, хошал болуп, мәктәптики күнлириңни әсләйсән, кинәйсән. 
Мана, бийил бизниң мәктәпни тамамлиғинимизға 50 жил толупту. Вақит немә дегән жүгрүк десиңизчу? Әллик жил илгири әндила чоң һаятқа қәдәм ташлиған қиз-жигитләр бүгүнки күндә бешидин талай иссиқ-соғ өткән бовай-момай боптимиз. 
Биз мошу сәнәни, йәни мәктәпни тамамлиғинимизниң 50 жиллиғини нишанлаш тәрәддутини жил бешидила башлиған едуқ. Униң үчүн ватсап торида мәхсус топ қуруп, мошу тәшәббусни оттуриға салдуқ. Синипдашлиримизниң һәммиси бу тәклипни йәкдиллиқ билән қоллап-қувәтлиди. Әлвәттә, биринчи новәттә, йезидики синипдашлиримиз, ана мәктивимиз М.Тейипов намидики оттура мәктәпни зиярәт қилди. Бизгә билим бәргән қутлуқ дәргаһниң алдиға орнитилған “Хәлиқ қәһримани” М.Тейиповниң һәйкилигә гүлчәмбәрләр қоюп, жутумизниң, мәктивимизниң тарихиини әскә алди. Мана, барлиқ тәшкилий ишларни әмәлгә ашуруп, өткән һәптидә синипдашлар билән учраштуқ. 
1962-жили Уйғур наһийәси Кичик Дехан йезисидики Октябрь оттура мәктивиниң (һазирқи М.Тейипов намидики мәктәп) босуғисини 25 бала атлиған едуқ. 1972-жили мәктәпни тамамлап чиқтуқ. Мәктәптә бизгә елипбәни оқутқан, билимниң мәккәм һулини салған устазимиз Патимәм Надирова болди. Жуқарқи синипларда бизгә Мәрдан Һәмраев, Абдуллам Мәһәмәтов, Мөрдүн Тейипов, Хәйруллам Авакриев, Селимахун Розиев, Сайден Жолдасбаев, Меймангүл Баратова, Имин Ваҗитов, Ян Анайәтов, Бәкназар Тохтахунов вә башқиму тәҗрибилик устазлар пухта билим бәрди. Әйнә шундақ устазлар бәргән билим түпәйли һәммимиз өзимизгә чушлуқ кәсип егиләп, һаяттин орнимизни таптуқ, һөрмәт қазандуқ. Хошал қилидиғини бизни оқутқан устазлиримиз Әхтәрхан Худайбәрдиева, Алийәм Һәмраева, Мәрийәм Ниязова һазир һаят. Биз уларни көргәндә, худди мәктәп оқуғучилиридәк, әркиләп кетимиз. 
 Әпсус, мошу жиллар ичидә йәттә синипдишимиз бевақит дуниядин өтүпту. Учришиш тәнтәнисини башлаштин илгири дуниядин өткән синипдашлиримиз Полат Һәмәев, Нурмәһәмәт Абдурусулов, Гүлбанәм Илиясова, Мубарәк Мунаров, Һекимҗан Закиров, Һаким Җаһанов вә Ғиясидин Абдукәримовни әсләп, бир минутлуқ сүкүнат сақлап, әскә алдуқ. Кәч давамида синипдашлар мәктәптики чағлиримизни, йүз бәргән қизиқ вақиәләрни әсләп күлүштуқ, муңдаштуқ, сирлаштуқ. Әлвәттә, йерим әсир инсан үчүн чоң мусапә. Шунчә жиллар өткинигә қаримай, балилиқ чағлиримизниң әслимилири һәммимизни чоңқур һис-туйғулар илкидә қойди. Бу күни биз вақитниң қандақ өткининиму билмәй қаптимиз. Әнди йәнә он жилдин кейин учришиш өткүзүшниму вәдилишип қойдуқ. Илаһим, шу күнләргичә һәммимизниң аман болушини тиләп, синипдашлар билән бир-биримизни қиймай хошлаштуқ.

 Гүлминәм ТЕЙИПОВА.

Алмута шәһири.