• Гезитимиз җанкөйәрлири
• 29 Маусым, 2022

Һәрикәтму, бәрикәтму бар

Алмута шәһиридики Нуршашқан микрорайониниң адәмлири бир-бири билән қувалишип, иҗил-инақ яшаватиду. Чоң жигитбеши Һакимҗан Турсунов баш болуватқан бу микрорайон активистлириниң бирлишип қолға алған хәйрихаһлиқ вә соваплиқ ишлириму һәрқачан илгири басқан. Әйнә шу Нуршашқан микрорайониниң күн чиқиш тәрипидә 158 уйғур, 30 қазақ вә 5 рус аилиси истиқамәт қилидиған, көпчилик еғизида «Йеңи мәлә» дәп атилип кәткән ихчам мәһәллә бар. Униң адәмлириму урпи-адәт, миллий әнъәнилиримизни, диний етиқатимизни сақлап, җамаәт болуп яшимақта. Бу жутта шундақла миллий мәдәнийитимиз вә мәтбуатимиз җанкөйәрлириму нурғун. Йеқинда мәзкүр мәһәллидә болуп, гезитимизниң бир топ җанкөйәрлири билән учраштуқ. Жигитбеши Абдукерим Яқупов бизгә ушбу Йеңи мәһәллиниң бүгүнки нәпәси тоғрилиқ төвәндикиләрни сөзләп бәрди.

Шәмшидин АЮПОВ,
«Уйғур авази»

— Нуршашқан микрорайони күндин-күнгә кәңийиватиду һәм гүллиниватиду десәм, ашуруп ейтқанлиқ болмайду. Йоллар ясалди, кочилар кечиси йоруқ, кәң вә азадә. Автобус тохтимай меңиватиду. Микрорайонда заманивий үлгидә селинған мәктәп, балилар бағчиси, ағриқхана паалийәт жүргүзүп келиватиду. Бир сөз билән ейтқанда, бу жутта хәлиққә керәк нәрсиниң һәммиси бар. Мана мошундақ тәрәққиятқа қарап йүзләнгән мәһәллидә яшаш – шәхсән мениң үчүн чоң бәхит. Худаға миң қатлиқ шүкри, жутумиз өм, инақлиқта яшаватиду. Жутумиз қут-бәрикәтлик, адәмлири меһмандост. Жут өмлүги билән турғунларниң мундақ инақ-иттипақлиғиниң һули мәһәллә бәрпа болған дәсләпки жиллирила қелиплашқан. Ана тилимизда чиқиватқан гезит-журналлиримизғиму бир кишидәк йезиливатимиз. Қисқиси, Нуршашқан микрорайонида һәрикәтму, бәрикәтму бар.
«Ялғуз атниң чеңи чиқмас...» дегәндәк, маңа һәр қәдәмдә қол-қанат болуп, пикир-мәслиһәтлирини берип келиватқан жигитбешиниң орунбасари Советҗан Насировтин, яшлар жигитбеши Зайир Кебировтин, Ханим-қизлар кеңишиниң рәиси Рахима Низамудиновадин, коча жигитбашлири Дилмурат Абдуллаевтин, Султан Илиевтин, Алимҗан Надировтин, Мурат Мәсимовтин, Ташполат Палтиевтин, Мурадил Қадировтин, Савут Розиевтин алаһидә миннәтдармән. Мошу йәрдә жутқа көйүнидиған, һаҗәт болса, ярдәм қолини сунушқа дайим тәйяр туридиған бир түркүм сехи қоллуқ инсанларниң исимлирини алаһидә тәкитләп өткүм келиду. Улар – Исрапул Хелилов, Ташмәмәт Һосманов, Алимҗан Сасиқов, Алимҗан Насиров, Асим һаҗим Гәраев, Шахмурат Дөләтов, Қурбан Мәҗит, Абдукерим Абдуллиновтур. Бу қәлби дәрия инсанлар жутниң отидин кирип, сүйидин чиқип, хәйрихаһлиқ ишларда паалийәтчанлиқ көрситип келиватиду. Улар «оң қолум бәргәнни, сол қолум билмисун» дәйдиған мәрт-мәрданә инсанлар. 
Уқушсақ, жуқурида исимлири аталған мәрт-мәрданә жигитләр вә мәһәллидә он адәмдин тәркип тапқан мәшрәп әһли һәр жили муштири топлаш мәвсүмидә жутдашлириниң миллий нәширлиримизгә йезилишини тәминләп, һамийлиқ қилип келиветипту. Шундақла улар һәр жили Йеңи жил һарписида жут мөтивәрлириниң көңлини елип, уларни тәбрикләшниму ядидин чиқармай келиветипту.
Умумән, бу мәһәллидики жут активистлириниң тилға алса, еғиз толғидәк ишлири, жутниң бәрикитини тәминләватқан чарә-тәдбирлири аз әмәскән. Биз бу мақалида уларниң әмәлгә ашуруватқан чоң-кичик соваплиқ ишлириға тәпсилий тохтилип кәтмидуқ. Ундақ болғини, гезитимиз сәһипилиридә у тоғрилиқ буниңдин илгириму йезилған. Җәмләп ейтқанда, мәзкүр жутниң активистлири һәқиқий виждани билән тәр төкүп, җамаәтчилик ишлирини йолға қоюп, миллий әнъәнилиримизни техиму риваҗландуруш йолида көп ишларни әмәлгә ашуруватиду. Умумән, Нуршашқан микрорайонида бүгүнки күндә йүз бериватқан барлиқ яхшилиқларда, изгү ишларда уларниң мунасип һәссиси бар.

СҮРӘТТӘ: гезитимизниң бир түркүм җанкөйәрлири.

Ялқун МӨМҮНОВ чүшәргән сүрәт.