• Дин вә җәмийәт
• 20 Шілде, 2022

Алий пәзиләт егиси

Өткән һәптидә Яркәнт шәһиридики «Ғалип» мечитиниң имами Юнус қари Әйсаев саламәтлигигә мунасивәтлик имамлиқни яш диний зат Абай Ибраимовқа тапшурди. Мечитта имамни узитиш мәрасими өтүп, униңға жут-җамаәтчилик вәкиллири қатнашти. 
Мәрасимда Панфилов наһийәсиниң баш имами Серик Шәрип сөзгә чиқип, Юнус қариниң узун жиллиқ үнүмлүк әмгигигә миннәтдарлиқ изһар қилип, Қазақстан Мусулманлири диний башқармисиниң рәиси, Баш муфти Наурызбай һаҗи Тағаноғлиниң Тәшәккүрнамисини тапшуруп, учисиға миллий чапан япти. Шундақла Дөңмәлиниң жигитбеши Ғилаждин Бақиев, мечитқоминиң әзаси, Шынтаев намидики мәһәллиниң жигитбеши Нурлан Сайитқанов сөзгә чиқип, өзлириниң иллиқ ләвзилирини билдүрди. 
 Юнус қари Әйсаев наһийәдики инавәтлик инсан, изгүлүк дәвәтчиси, алий пәзиләт егиси. У 1934-жили тарихий Вәтинимизниң Чилпәңзә йезисида туғулған. Дәсләп Илһам қариниң қолида оқуп, Ислам дининиң тәлиматлирини үгәнди. Қуръанни ядқа билиш дәриҗисигә көтирилишкә вә униң тәпсирини үгинишкә барлиқ вуҗуди билән тиришти. Кейин пәний мәктәптә оқушини давамлаштурди. Или вадиси аһалиси арисида көч-көч долқуни башланғанда,уларниң қатарида Әйсаевларниң аилисиму Қазақстан дияриға көчүп чиқип, Талдиқорған шәһири әтрапиға орунлишиду. Бир жил шу йәрдә һәрхил саһаларда ишләйду. Шуниңдин кейин Яркәнт шәһиригә көчүп келиду. У жиллири наһийәниң шәһәр вә йезилирини аватлаштуруш үчүн қурулуш ишлири кәң қанат яйдурулған еди. Уларни әмәлгә ашуруш «Межколхозстрой» мәһкимиси қурулушчилириниң зиммисигә чүшүп, униң бирқанчә көчмә механикилаштурулған колоннилири моҗут еди. Һаятиниң оттузинчи даваниға көтирилгән Юнус Әйсаевму мәзкүр мәһкимигә ишқа орунлишиду. 
Қабилийәтлик вә тәдбирчан жигит қурулушчи кәспини чапсан өзләштүрүп, әстаидил әмгиги, инсаний сүпәтлири билән көзгә чүшиду. Яғашчилиқниң қир-сирлирини убдан өзләштүриду. Иззәт-һөрмәткә еришкән уни мәһкимә рәһбәрлиги қурулушчилар бригадисиниң бригадири қилип тайинлайду. У рәһбәрлик қилған коллектив мурәккәп қурулушларда әмгәк қилип, илғарлар қатаридин көрүниду. Юнус Әйсаев башқурған бир топ чевәр, маһир қурулушчилар әшу жиллири Веливай мечитини қайта җөндәш ишлириғиму қатнишип, өз маһаритини намайиш қилди. Юнус қари өзиниң әстаидил әмгиги билән наһийәниң ихтисадий вә мәдәний тәрәққиятиға мунасип үлүшини қошти. Юнус қари яркәнтлик Турсунай Зордунова билән аилә қуруп, алтә пәрзәнт сөйүп, тәрбийиләп қатарға қошти. Улардин нәврә-чәврә сөйди.
 Һөрмәтлик дәм елишқа чиққандин кейин у мечит имами сүпитидә һәртәрәплимә паалийәт жүргүзүп, нурғунлиған яшларға дәрис берип, уларниң қәлбини ислам тәлиматлири билән нурландурди. У шундақла мечитниң таза, сәрәмҗан болуши, әтрапиға гүл көчәтлирини тикип, гүлзарлиқни бәрпа қилған инсан. Шундақла милләтләрара разимәнликниң, достлуқниң, иттипақлиқниң тәрғибатчиси болди. Юнус қариниң узун жиллиқ әмгиги мунасип баһалинип, Қазақстан Мусулманлири диний башқармисиниң Пәхрий ярлиғи вә башқиму мукапатлар билән тәғдирләнди. 
 Барлиқ аңлиқ һаятини муқәддәс динимизни кәң хәлиқ аммиси, болупму яшлар арисида тәрғип қилип, диний саватини чоңқурлаштуруш, динға болған сағлам көзқарашни шәкилләндүрүшкә сәрип қилған алий пәзиләт егисигә мустәһкәм саламәтлик тиләймиз.
  Бәхитҗан РАЗИЕВ.
Панфилов наһийәси.

Турсунмәһәмәт МӘШҮРОВ чүшәргән сүрәт.