• Ишбиләрмәнләр
• 08 Қыркүйек, 2022

Тонур ясаш маһири

Панфилов наhийәсигә қарашлиқ Төвәнки Пәнҗим жутида 291 аилә истиқамәт қилиду. Уйғур билән қазақ миллитидин тәркип тапқан, достлуғи билән өмлүги ярашқан, қиз елип қиз бәргән hәр иккила милләт вәкиллири иҗил-инақ яшап кәлмәктә.Төвәнки Пәнҗим йери мунбәт, сүйи сүзүк, hаваси таза есил жутлардин болуп, hәрхил кәсип егилири маканлиған чоң жутлардин hесаплиниду.
Жутумизға келип қалсиңиз, қайсила hойлиға кирмәйли, мәйли уйғур, мәйли қазақ миллити болсун, чоң hойлиниң бир четигә яки бағ тәрәпкә сәрәмҗан қилип әҗдатлиримиздин бизгә упримас ялдама болуп келиватқан, гүлдәк нанлар пишиватқан тонурға көзүңиз чүшиду. Бу қетим әйнә шу тонур ясашниң маһири, чоң аилиниң әзаси, он балиниң ичидин чиқкан ишләмчан, бир ишни башлиса, униң hөддисидин чиқмиғулуқ тиним тапмайдиған әҗайип инсан Җәнәм Бақиевани гезитханларға тонуштурмақчимән. Униң тонур ясаш билән шуғуллинип келиватқиниға хелә жиллар болуп қалди.
— Тонур ясашниңму өзигә чушлуқ җапаси хелә бар — дәп башлиди сөзини Җәнәм. — Авал қумлуқтин чиптан дегән өсүмлүк бар, шуниңдин елип келимиз. Йолдишим уни палта билән чепип, ушшақ қилип тәйярлайду. Андин топиниң үстигә чечип, су қуюп лай етимиз, андин лайни яхшилап арилаштуруп, дүмләп қойимиз. Бир hәптидин кейин тәйяр лайни ләңмәнни пилтилиғандәк яхшилап пилтилап, лай тонурни ясашни башлаймиз. Тонур ясашта маңа hәрқачан ярдәмдә болуватқан йолдишим Йолдаш Розиевниң әмгиги зор. Ясалған тәйяр тонурни алғучилар елип кетиду. Болупму хошна йезилардин Қорғас, Алмалы, Пәнҗим, Алтөй, Винзавод жутлиридин буйрутма бәргүчиләрниң сани жилдин-жилға көпийип келиватиду. Йеқинда Алмута шәhиридә яшаватқан бир яш қиз, hойлисида навайхана ечиш мәхситидә әң йоған бәш тапанлиқ тонурни елип кәтти. Хошна наһийәләрдинму буйрутмилар чүшүп туриду. 
Ризванам РОЗИЕВА.
Панфилов наһийәси.