• Мөтивәрләр
• 02 Наурыз, 2023

Мән көйәрмән баламға...

Бәхтишат СОПИЕВ,
«Уйғур авази»

Товва, дәймәндә: «Ана, қисқичә өзиңизниң өмүрбаяниңизни сөзләп бериң» десәм, йәнила балиларниң гепини қилиду.
— Балиларниң тунҗиси мәрһум Пәрһатҗан истипадики капитан еди. Шофер болуп ишлигән. Кейин чоң хизмәтләрни атқурди. Келин Саҗидәм өйдә, үч оғул, алтә нәврә тәрбийиләп қатарға қошти. Қисқиси, мениң...
— Алди билән өзиңиз тоғрилиқ сөзләп бериңа.
— Мән 1938-жили Уйғур наһийәсиниң Кичик Ачиноқа йезисида дунияға кәлдим. Атам Низамдун Мәҗрунов Улуқ Вәтән урушиға қатнашқан. Уруштин кейин Довун йезисида колхоз рәиси болиду. Анам Бүвинур Билалова колхозда ишлиди. У әтигән һаяттин өтүп, дадам иккинчи қетим баш қошқан Шерхан Турдахунованиң қолида чоң болдум. Белим қатмай, әтигәнла колхозниң ишлириға арилишишқа башлидим. Биз көргәнни һазирқи яшлиримиз көрмисун. Кәч йетип, әтигән қопуп тиләйдиғиним шу, — деди ана еғир уһ! тартип.
Һәқиқәтәнму анимизниң бесип өткән йоли еғир һәм мәшәқәтлик. Амма у дуч кәлгән қийинчилиқларға бәрдашлиқ беришни билди. Һаятниң иссиқ-соғиға чидиди, көнди. Еғир синақлардин сүрүнмәй өтүп, Қутлуқ Розиев билән аилә қуриду. Тәғдирниң язмиши билән Алмутиға көчүп келип, шәһәрлик болуп қалиду. Шәһәрдики «Химчистка» кийим тазилаш карханисида та һөрмәтлик дәм елишқа чиққичә ишләйду. 
— Чоң қизим Пәридәм «Мерей» мәһкимисидә ишләйду. Пәйзиләм — қизим муәллим. Башланғуч синипларға дәрис бериду. Оғлум Шаяхмәт — шофер. Һәр үчилисиниң иккидин балиси бар. 
Йәнә шу балиларниң гепи. Аниниң дегиничә болсун. Аңғичә, сөзүмизгә Пәрһатҗанниң оғли полиция подполковниги Дияр арилашти. Уму гепимизгә пишаң селип, анимизни сөзләтмәкчи болди. 
— Йошуридиған немиси бар, балилар бәхитлик һаят кәчүрүватиду. Кийидиғанға — учи, йәйдиғанға қосиғи йоқ. Бизниң бешимиздин өткән дәһшәтлик күнләр силәрни айлинип өтсун, балилирим. 
Анимизниң ядиға өтмүшниң қизиқ вақиәләрниму селип бақтуқ. Бәрибир дегинини қилди. Бүгүнки парлақ заманимизниң гепини қилиду. «Уруш болмисун, йоқсизчилиқтин Алла сақлисун, тәбиий апәтләрни көрсәтмисун» дәп бизгә дуасини бериватиду.
Дияр өзиниң вә башқа нәвриләрниң қол йәткүзгән утуқлири билән бөлүшти. 
— Наргиз «Халық банкта» ишләйду. Мадина билән Руфат «Қазахтелекомда» чоң мутәхәссис...
У шундақла өзиниң оғуллириниң утуқлириниму тилға алди. 
Ана нәврисиниң гепини раһәтлинип тиңшаватиду. Дана әҗдатлиримизниң «Мән көйәрмән баламға, балам көйәр балисиға...» дегини шу болса керәк, әтималим.