• Мөтивәрләр
• 02 Наурыз, 2023

Аман болуң, ана!

Шәмшидин АЮПОВ, 
«Уйғур авази»

Хәлқимиздә «Көп яшиғандин сорима, көпни көргәндин сора» дегән тәмсил бар. Майминәм Сабирова һәм көп яшиған, һәм көпни көргән нураний ана. Сирттин қаримаққа силиқ өткән униң һаят йолида талай қийинчилиқлар, еғир җудалиқлар, паҗиәлик әһваллар, мәңгү әстә қалғидәк вақиәләрму йүз бәргән. Әйнә шундақ еғир қисмәт қайнамлиридин у егилмәс ирадиси, биси қайтмас ғәйрәт-шиҗаити, тинимсиз әмгиги вә һаятқа муһәббити, парлақ келәчәккә дегән соғулмас ишәнчиси арқилиқла тәл-төкүз аман чиқти.
Майминәм Нәсридинқизи Сабирова 1928-жили Алмута шәһириниң Султанқорған мәһәллисидә туғулған. Униң ата-аниси «Париж коммуниси» колхозиниң һәрхил саһалирида әмгәк билән өмрини өткүзди. Майминәм аниму 15 йешидин тартип егилик ишлириға арилашти. Гөзәл яшлиғи уруш жиллириға тоғра кәлгәнликтин, қиш-йези тиним тапмай, җапалиқ әмгәк билән өтти. Қисқиси, колхозниң тирикчилигигә қоюқ арилишип, Ғалибийәтни йеқинлаштурушқа биркишилик һәссисини қошти. 1949-жили колхозда илғарлар қатарида ишләватқан Хәйридин Сабиров билән турмуш қурди. Һәр иккилиси ишләмчан, инақ, меһриван җанлар болғачқа, колхозниң һәрқандақ ишлирини атқуруп жүрүп, турмушиниму йолға қоювалди. Арида бала-чақилиқ болди. Улар икки оғул вә икки қизни тәрбийиләп, қатарға қошти. Пәрзәнтлири чоң болуп, мәктәп йешиға йәткәндин кейин Майминәм ана шәһәрдики «Жетису» аяқ-кийим фабрикисиға ишқа орунлишип, шу йәрдин һөрмәтлик дәм елишқа чиқти. Сөзара ейтип кетиш керәкки, ғәмгүзар ана 2002-жили йолдиши Хәйридиндин, 2013-жили чоң оғли Сонурбәктин айрилип қалди. Бу ана үчүн еғир җудалиқ болди...
 Майминәм ана бу күнләрдә Султанқорған мәһәллисидә истиқамәт қилидиған келини Гүлнисәниң (мәрһум оғли Сонурбәкниң рәпиқиси) мәслиһәтчиси сүпитидә чоң аилиниң аниси болуп олтириду. Мошу күнләрдә ғәмгүзар ана йәттә нәврә вә он йәттә чәвриниң қизиғини көрүп яшаватиду.
Әлахан султанниң әвладидин болуп келидиған Майминәм аниниң тәвәллудиниң 95 жиллиғиға беғишланған ихчам зияпәттә пәрзәнтлири билән уруқ-туққанлири һәм нәврилири тәрипидин изгү тиләкләр изһар қилинди. Бүгүнкидәк мубарәк яшқа йәткичә тартқан җапа-мәшәқәтлирини ейтип, өмригә өмүр қошулушини тилиди. У күни көплигән иллиқ тиләкләр ейтилип, тәвәррүк аниға чоңқур һөрмәт-илтипат көрситилди. Қисқиси, аниниң шатлиғи қериндаш һәм пәрзәнтләр шатлиғиға айлинип кәтти...