• Концерт
• 22 Маусым, 2023

Әл сөйүнидиған «Әвлат»

Оқурмәнлиримизниң ядида болса, Уйғур наһийәсидә қурулған «Әвлат» ансамбли тоғрилиқ гезитимизда бирқанчә мақалә йезилди. «Әвлат» һәққидә тәкрар-тәкрар қәләм тәвритишимизгә униң йәткән утуқлири түрткә болуп келивататти. Бу қетимму шундақ болди. Йеқинда Уйғур наһийәсиниң мәркизи Чонҗа йезисидики Мәдәнийәт өйидә «Әвлат» уссул ансамблиниң қурулғиниға бәш жил толуши мунасивити билән, һесават концерти уюштурулуп, икки күн мабайнида сәнъәтсөйәр амминиң алқишиға бөләнди. 

Сабирәм ӘНВӘРОВА, 
«Uigur avazi»

ШУАРдики Сәнъәт өмигидә «миллий уссул» факультетини тамамлап, Алмутиға қайтип кәлгәндин кейин тонулған сәнъәткар Полат Һезимов вә миллий мәдәнийитимизниң җанкөйәрлири Дилшат Насиров билән Сүрийәм Һезимованиң рәһбәрлигидә «Ирадә» ансамблини қуруп, таланти билән талайларни қайил қилған кәспий уссулчилар Пәрһат Дуганов билән униң өмүрлүк җүпти Камиләм Киризова буниңдин бәш жил илгири ана жути Ақтам йезисиға қайтип келип, наһийәдики уссулға шәйда яшларни жиғип, «Әвлат» ансамблиниң асасини салған еди. «Үгәнгән һесап әмәс, үгәткән һесап» демәкчи, яшларниң наһийәгә келиштики мәхсити – бар билимини, топлиған тәҗрибисини яш әвлатқа үгитип, сәнъитимизниң риваҗлинишиға өз үлүшини қошуш болған. Мана шуниң үчүнму ансамбльниң намини һеч иккиләнмәй, «Әвлат» дәп қойған яш сәнъәткарлар бәш жил мабайнида һәқиқәтәнму қедимий сәнъитимизни яшартидиған йеңи бир әвлатни тәрбийиләп чиқалиди. 
 Бүгүн исми җисмиға лайиқ мәзкүр ансамбльниң тәркивидә чоң-кичик болуп, 150тин ошуқ талантлиқ жигит-қиз бар. Пәрһат Дуганов билән Камиләм Киризованиң тинимсиз әмгиги вә тиришчанлиғи түпәйли «Әвлат» ансамбли һазир Қазақстандила әмәс, чәт әлләрдиму тонулуп, бирқатар утуқларни қолға кәлтүрди. Шуңлашқа концерт уюштурулған икки күн мабайнида Мәдәнийәт өйиниң залида жиңнә санчиғидәк орун болмиди. Яш әвлатниң талантиға зоқланған тамашибин икки саатниң қандақ тез өтүп кәткинини туймай қалди. Сәһниниң безилиши, уссулларниң сәһниләштүрүлүши, уссулчиларниң үстидики һәр нахшиниң мәзмуниға лайиқлинип тикилгән кийимлири, һәммиси көпчиликниң көңлидин чиқип, тамашибинниң алқишиға еришти. 
Қисқиси, мошундақ «Әвладимиз» барда, әтимизгә әнсиримәйдиғанлиғимизға көзүмиз йәтти. Сәһниниң қудритини сезингән яшлиримиз устазлириниң әҗрини ақлап берәлиди, бәшжиллиқ әмгәкниң нәтиҗисини көрситәлиди. Концертта пәқәт уйғур хәлқиниңла әмәс, қазақ, һинд қатарлиқ милләтләрниңму уссули иҗра қилинип, көпқирлиқ ансамбль сәнъәттә чегара болмайдиғанлиғини йәнә бир қетим испатлиди. Болупму миллий кийимлиримизни кийип, сәһнини чаң кәлтүргән омаққина гөдәклиримизгә қарап бәк зоқландуқ, ғурурландуқ.
Концертқа жирақ-йеқиндин кәлгән меһманларниң ичидә тәбриги билән қошуп нахша һәм музыкилиқ салимини йәткүзгәнләрму болди. Шу җүмлидин ансамбль йетәкчилириниң кәсипдашлири, дост-қурдашлири болған Меһирдин Йүсүпов, Әзизҗан Ғаппаров, Бәхтияр Қурбанниязовниң, шундақла яш талант егиси Артур Идаевниң орунлишидики нахша-сазлар кәчни техиму җанландурувәтти. Ансамбль әзалириниң вә меһманларниң орунлишидики уссул-нахшилардин бәһирлинип, көтирәңгү кәйпиятқа бөләнгән тамашибин кәч ахирида йәнә бир тәсирлик пәйтниң гувачиси болди. Йәни концерт ахирида һөрмәтлик меһманлар сәһнигә көтирилип, ансамбль йетәкчилири билән яш талантлиримизни тәбрикләп, кәчтин алған тәсирати билән бөлүшти. 
 Тәбриклигүчиләрниң қатарида Чонҗа йеза округиниң һакими Ромэн Суджеков, Пәрһат Дуганов билән Камиләм Киризованиң устази Полат Һезимов, Қазақстанниң хизмәт көрсәткән әрбаби, нахшичи-композитор, академик Шәмил Әбилтай, «Уйғур авази» гезитиниң баш муһәррири Ершат Әсмәтов, наһийәлик Уйғур этномәдәнийәт мәркизиниң рәиси Арлен Һосманов вә мәзкүр мәркәзниң йенидики «Нураний анилар» кеңишиниң рәиси Зиләхәм Җәлилова, ата-анилар һәм шагиртлар ансамбль йетәкчилиригә дегән чәксиз миннәтдарлиғини йәткүзүп, концертниң интайин жуқури дәриҗидә өткәнлигини қәйт қилди. 
Полат Һезимов шагирт тәрбийиләйдиған дәриҗигә йәткән шагиртлиридин сөйүнсә, Шәмил Әбилтай «Сәнъәтни һөрмәтлигән милләт – бәхитлик милләт» дегән сөзини асасқа елип, бәхитлик милләтниң бәхитлик яшлирини көргәнлигини тәкитлиди. Өз вақтида бүйүк композитор Қуддус Ғоҗамияровниң дуасини алған Шәмил Әбилтай чоң башланмини йолға қоюп, жуқури җавапкәрликни зиммисигә алған Пәрһат Дуганов билән Камиләм Киризоваға вә улар тәрбийиләватқан шагиртлириға дуасини бәрди. Шундақла домбриси билән устазиниң хатирисигә беғишлап язған «Қуддус» күйини алаһидә тәвриниш билән иҗра қилди. Хош, наһийәлик Уйғур этномәдәнийәт мәркизиниң рәиси Арлен Һосманов, Пәрһат Дугановни мәзкүр җәмийәтлик тәшкилат тәрипидин тәсис қилинған «Мәдәнийәт җанкөйәри» медали билән мукапатлиса, Зиләхәм Җәлилова икки йүзгә йеқин қаракөзниң анисидәк болуп кәткән Камиләм Киризоваға бир дәстә гүли билән хатирә соғисини тапшурди.
 Бир-биригә улашқан иллиқ тәбрикләрдин кейин, концертниң уюштурғучилириға сөз берилди. Пәрһат Дуганов билән Камиләм Киризова қиммәтлик вақтини бөлүп, әмгигини баһалап кәлгән барчә тамашибинға миннәтдарлиғини изһар қилғач, концертниң көңүлдикидәк өтүшигә күч чиқарған барчә инсанларға, шу җүмлидин шагиртлириға вә уларниң ата-анилириға, йеқиндин қоллап-қувәтлигән наһийә рәһбәрлиригә чәксиз рәхмитини ейтти. Шуниң билән қатар, омақ шагиртлирини тәшәккүрнамиләр билән рәғбәтләндүрди. 

ИЛАВӘ: хулләс, инсан һаяти билән алғанда, бәш яшқичә бала тамақлинишни, меңишни, сөзләшни үгинип чиқиду. Йәни, бу арилиқ униң қелиплишиш басқучи. Қурулғиниға бәш жил болған «Әвлат» ансамблиму, ушбу бәш жилда һәртәрәплимә шәкиллинип, убдан пишип-йетилгән, тәл-төкүз ансамбльға айлинипту. Нурғунлиған қаракөзлиримиз сәһнигә чиқип, уссул ойнашнила әмәс, сәнъәтни сөйүшни, мәдәнийитимизни қәдирләшни үгинипту. Өзлириниң кимниң «әвлади» екәнлигини тонупту һәм башқиларғиму тонуталайдиған дәриҗигә йетипту. Концерттин кейин, биз мана шундақ хуласигә кәлдуқ.