• Концерт
• 07 Қыркүйек, 2023

Мәйрәмлик кәйпият беғишлиди

Йеқинда Қуддус Ғоҗамияров намидики җумһурийәтлик дөләт академиялик Уйғур музыкилиқ-комедия театрида Қазақстан Җумһурийити Конституцияси күнигә беғишланған концерт болуп өтти. Униңда театрниң драма артистлири, «Нава» фольклор ансамбли билән «Рухсарә» уссул ансамбли әзалири нахша-сазлар иҗра қилип, тамашибинларға жуқури кәйпият һәдийә қилди.

Мәшүр САСИҚОВ,
«Uiğur avazi»

Миллий сәнъитимизни қәдирләйдиған тамашибин, өз новитидә, Қазақстан Җумһурийитиниң хизмәт көрсәткән әрбаби Нуралим Варисов вә униң изини бесип келиватқан Мехрат Рәхмәтҗан вә Луиза Розахунова, Саламәт Һевуллаева, Дилбәр Бурһанова, Эмина Рәхмәтҗан вә Саһиб Абдумайин кәби яш нахшичиларниң иҗрасидики муқамлар билән хәлиқ нахшилирини алаһидә қарши ачоңқур һиссиятлар илкидә қобул қилди. Әлвәттә, бу күни концерт давамида елимиздики милләтләрара достлуқму кәң даиридә ипадиләнгән һалда, һәрхил милләтләрниң нахша-уссуллириму орунланди. Шуни алаһидә тәкитләш керәкки, театр сәһнисигә чиққан һәрбир артистниң талант-қабилийитидин сирт, кийгән кийимлириниң сүпәт җәһәттин яхшилиниватқанлиғиниму атап өткән орунлуқ. Бу, әлвәттә, театрда тәләпниң бирқәдәр күчийиватқанлиғиниң испати болса керәк.
Тамашибинниң көңлигә арамбәхш дәмләрни беғишлиған концертта дуния хәлиқлириниң сәнъитигиму көңүл бөлүнгәнлиги бизни қайил қилди. Һә, уларни сәһнигә елип чиқишқа җүръәт қилған яшлиримиз болса, әлвәттә, өзлиригә жүкләнгән вәзипиниң һөддисидин чиқишқа тиришқан. Мәсилән, мәзкүр концертта яш нахшичи Саһиб Абдумайинниң иҗрасидики «Синяя вечность!» (Сөзи Геннадий Козловскийниң, музыкиси Муслим Магомаевниң) вә Эмина Рәхмәтҗан билән Ризат Мамутов орунлиған Андреа Бочеллиниң «Vivo Per Lei» нахшилирини тамашибинлар гүлдүрлигән алқишлар илкидә қарши алди. Әнди уссулларға кәлсәк, уссулчиларниң һәрқандақ милләтниң уссулини һеч қийналмай, жуқури дәриҗидә сәһнә төригә елип чиққанлиғи, әлвәттә, тамашибинларда чоңқур тәсират қалдурди.
 Умумән, Қазақстан Җумһурийити Конституцияси күнигә беғишланған концерттин тамашибинлар жуқури кәйпият илкидә қайтти. Чүнки театр коллективиниң мәйрәмлик соғисидин һәқиқәтәнму уларниң көңли су ичкән еди.