• Әхбаратлар еқими
• 04 Сәуір, 2024

Ана вәсийитигә садақәтлик

Һәрқачан жиқилғанни йөләп, панасизни өйлүк қилиш үчүн қол учини созуп, хәйри-еһсанлиқ ишларда башламчи болған җумһурийәтлик Уйғур этномәдәнийәт мәркизи йенидики Нураний анилар кеңишиниң рәиси Җаһангир (Гүлҗаһан ) һаҗим Муратова һазир аримизда йоқ. Лекин анисиниң бу хилдики алийҗанап ишлирини көрүп өскән пәрзәнтлири униң роһини қорундурмастин, хасийәтлик Роза-Рамзан ейида муһтаҗ җанларни қоллап-қувәтләш мәхситидә хәйрихаһлиқ ярдимини көрсәтти. 

Гөһәрбүви ИСМАЙИЛҖАНОВА,
«Uiğur avazi»

 Һаҗимниң Яркәнт шәһиридә туруватқан чоң оғли Алимҗан, келини Дилмира қериндашлири билән бирликтә бу қетим 150 аилигә атиғанлирини тарқитип бәрди. Шуни тәкитләш керәкки, һели мәрһум ана бала-чақилири билән тапқан тапавитиниң мәлум бир қисмини мошундақ хәйрихаһлиқ ишқа сәрип қиливатқанлиғиға 30 жилдин ошуқ вақит болди. Дәсләпки жиллирида ун вә май билән чәкләнгән болса, ахирқи жиллири озуқ-түлүк севити хелила кәңәйди. 
– Гүлҗаһан һаҗим Муратова барлиқ аңлиқ һаятини наһийә ихтисади билән мәдәнийитини тәрәққий әткүзүшкә сәрип қилди. Анимизниң пәрзәнтлириму өзи охшаш әмгәксөйгүч, кишиләргә меһриван, муһтаҗларға ярдәм қилишқа дайим тәйяр екәнлигини һәммә билиду. Бүгүн Алимҗан ака вә Дилмира һәдиләр башлиған қериндашлар жутдашлирини йәнә бир мәртә соваплиқ ишлири билән хошал қилмақта. Биз көпчилик намидин аилә әзалириниң иш-оқитигә бәрикәт тиләймиз. Анимизниң роһи бизни қоллисун, – деди мәрһумниң хәйирлиқ ишлиридин вақип қилған Яркәнт шәһириниң һакими Айдар Исаев.
– Һәр жили мошундақ тапавити төвән аилиләргә қол учини бериватқан һаҗим анимизниң пәрзәнтлири «Біз біргеміз» акцияси даирисидә йәнә келип, хасийәтлик Роза-Рамзан ейида бу алийҗанап ишни әмәлгә ашурушни нийәт қипту. Җай-җайларда бу хилдики акцияләр йәниму давамлишиватиду. Аилә тиҗарәтни кәң қанат яйдуруп, туғулған елигә, жутиға болған ғәмхорлуғини дәлилләп кәлмәктә, – деди өз сөзидә Жетису вилайәтлик Уйғур этномәдәнийәт мәркизиниң рәиси, Панфилов наһийәлик мәслиһәтниң депутати Турғанҗан Зайитов. 
Шуниңдин кейин мәһәллиләрдин кәлгән жут атилири һаҗәтмәнләргә атиған озуқ-түлүк севитини елип, тарқитип беришкә киришти. Җаһангир һаҗим Муратова пәрзәнтлири бу қетим 150 аилигә ун, май, чай, гүрүч, рожки охшаш озуқ-түлүкләрни елип кәпту.  

Жетису вилайити, 
Панфилов наһийәси 

Турсунмәһәмәт МӘШҮРОВ чүшәргән сүрәт