• Әхбаратлар еқими
• 04 Сәуір, 2024

Етизға атлиниш алдида

Рашидәм РӘҺМАНОВА,
«Uiğur avazi»

Баһар пәсли келип, аста-аста йәр-җаһанму ойғиниватиду. Қишичә күнниң қизишини тақәтсизлик билән күткән деханлар бир күнниму зайә кәлтүрмәй, етиз-ериқ ишлириға киришиш алдида туриду. Чоң аграрлиқ тәвә – Әмгәкчиқазақ наһийәсидә 86 миң гектарға йеқин мәйданда терилғу ишлирини жүргүзүш реҗилиниватиду. Шуниңға бағлиқ наһийә деханлири икки миң тонна мәхсус әрзәнлитилгән йеқилғу майлаш материаллири билән тәминлинидиған болди. Шундақла улар ишләпчиқириш сүпитини ашуруш үчүн инновациялик технологияләрни, җүмлидин тамчилитип суғириш усулини пайдилинишни қолға еливатиду.
– Наһийәдә 4659 йеза егилиги техникиси, униң ичидә 2000дин ошуқ трактор, 950 прицеп, 600 соқа, 250 культиватор, 200 тирна вә 510 сеялка бар. 2023-жили 2 миллиард 661 миллион тәңгигә 141 йеңи һәм заманивий техника сетивелинди, – дәйду наһийәлик тиҗарәт вә йеза егилиги бөлүминиң рәһбири Ермек Жакеев.
Бийилму, жилдиқидәк, мал озуғи ретидә майлиқ зираәтләр билән көмүқонақни көпирәк териш һаҗәт. Наһийәниң йеза егилиги мәһсулатлирини ишләп чиқарғучилири гербицид вә минераллиқ оғутларни йәткүзүп беридиған 25 мәһкимә билән шәртнамә түзүп ишләватиду. Минерал оғутларниң наһийә үчүн һаҗәтлик көләми – 9160 тонна, гербицидлар – 16 200 литр вә органикилиқ оғутлар 300 тоннини тәшкил қилиду. Керәклик оғутлар билән тәминлигүчи мәһкимиләр вәкиллириниң ейтишичә, қоймиларда униң барлиқ түри йетәрлик дәриҗидә сақланмақта.
Әнди йеқилғу мәсилисигә кәлсәк, 2023-жили 20-көнәккичә тәвә деханлиридин 2220 тонна дизель елишқа 76 әризә келип чүшти. Уларға йеқилғу норуз ейидин башлап баһарғичә берилиду.
Әтиязлиқ терилғу ишлирини мәбләғ бил»н тәминләш үчүн «Кең дала» программиси бойичә «Аграрлық несие корпорациясы» АҖ арқилиқ сәккиз йеза егилиги мәһсулатини ишләп чиқарғучи мәһкимисигә умумий көләми 47,2 миллион тәңгә несийә берилди. Чүшкән әризиләргә бағлиқ несийә бериш давамлишиватиду. Һазир қошумчә 236 миллион тәңгилик 14 әризә қобул қилинип, мәсилиси қариливатиду.
Язичә «йәр татлап», тапқан-тәргинини қишичә йәйдиған деханларға «Ишиңиз илгири болсун!» дәймиз. Тиләйдиғинимиз – ойдикидәк һосул елиш үчүн һава райи қолайлиқ, су һәм башқиму керәк-ярақлар йетәрлик болсун! 

Алмута вилайити,
Әмгәкчиқазақ наһийәси