• Әхбаратлар еқими
• 12 Сәуір, 2024

Хәлиқниң аманитини тапшурди

Йеқинда Или наһийәси Ашибулақ йезисиниң турғунлири Данияр вә Зарина Юнусовларниң өйигә от кетип, әр-аял төрт пәрзәнди билән талада қалди. Буниңдин учур тапқан көпчилик уларға өзлириниң ярдәм қолини сунушқа башлиди. Җүмлидин, Алмута шәһири Достлуқ мәһәллисиниң баш жигитбеши Азат Ибрагимов билән Талғир наһийәсиниң баш жигитбеши Октябрь Қурбанниязов башлиған жут активистлири бешиға күн чүшкән аилигә әл-жутниң аманитини тапшурди.

Мәшүр САСИҚОВ,
«Uiğur avazi»

Төрт темидин айрилған яшларниң ғәм-қайғусиға ортақлашқан улар, өй егилиригә сәвирлик тилигәч, һаятниң хошаллиғи вә шатлиғидин сирт, еғир-йенигиму болидиғанлиғини ейтти. Юнусовларниң аилисигә  Достлуқ мәһәллисиниң турғунлири 3 160 000 тәңгә, Талғир наһийәсиниң жут-җамаәтчилиги 526 000 тәңгә жиғип бәргән. Әлвәттә, улуқ күн, улуқ ай Роза-Рамзанда бешиға күн чүшкәнләрниң һалидин хәвәр елиш соваплиқ ишлардин һесаплиниду. Мана шуни нәзәрдә тутқан бу инсанлар тилсиз йеғиниң зәрдавиға учриған аилә әзалириға һәрдайим ярдәм қолини сунушқа тәйяр екәнлигини ейтти. Болупму пәрзәнтлири әндила тәй-тәй бесип, өй тутуп, тирикчилигини башлиған яшларға чоңларчә мәслиһитини бәргән жут егилири бу өйләрдә келәчәктә чоң яхшилиқларниң, йәни тойларниң болидиғанлиғиға ишәнчә билдүрди.