• Әхбаратлар еқими
• 12 Сәуір, 2024

Һәр биримизниң һойлисидин башлиниду

Мәлумки, 15-норуздин тартип елимиз бойичә әтиязлиқ санитарлиқ тазилиқ ейи башланди. Шуниңға бағлиқ Әмгәкчиқазақ наһийәсидә чоң ишлар қолға елинди. Мәһкимиләр рәһбәрлири вә Ишиктә шәһәрлик һәм 25 йеза округлириниң һакимлири наһийәниң барлиқ 79 йезисида мәхсәтлик жиғинлар өткүзүп, санитарлиқ тазартиш, һәрхил гүл вә дәрәқләрниң көчәтлирини тикип, әтрапни йешилзарлиққа айландуруш ишлирини өткүзүш һәққидә чүшәнчә вә тапшурмилар бәрди. 

Рашидәм РӘҺМАНОВА,
«Uiğur avazi»

Шуниң билән аммивий түрдә башланған иш техила давамлишиватиду. Чүнки наһийәниң бәзибир йезилири Улуқ Ипәк йолиниң бойи вә униң төвинигә җайлашқанлиқтин етиз-ериқ вә һойла-арам түгәл қуруп кәтсә, тағ бағридики қар вә ямғур-йешинлиқ тәрипидә техичила патқақчилиқ орун алмақта. Шуниңға қаримай, барлиқ йезиларниң турғунлири өз һойлиси вә өйиниң әтрапи билән биллә көпчиликкә тегишлик кочилар вә җәмийәтлик орунлардики тазилиқ ишлирини пааллиқ билән жүргүзүватиду. Қошумчилаш керәкки, айлиқ давамида өстәң вә су қоймилириниң яқилиридики рухсәтсиз төкүлгән әхләтләр елинип, су ақидиған ериқлар тазилинип вә әхләт жиғилған полигонлар рәткә кәлтүрүлүп, аватлаштуруш ишлири әмәлгә ешиватиду. Йеза округлири һакимлири билән участкилиқ инспектор турғунлар тәрипидин қанунсиз ташланған әхләт, күл вә башқиму қалдуқларни ениқлап, җәмийәтлик орунларда санитарлиқ тазилиққа риайә қилинмиған фактлар бойичә җазалаш ишлирини әмәлгә ашуруватиду.
Шундақла мәһкимиләр билән һәрқандақ иш орунлиридики хадимларни акцияға җәлип қилиш мәхситидә наһийә бойичә 19-вә30-норуз, шундақла 6-үмүт күнлири «Таза шәнбә» санитарлиқ шәнбиликләр өткүзүлди.
Ахирқи шәнбиликкә 9317 адәм қатнишип, 68 техника пайдилинилди. 710 тонна әхләт чиқирилип, умумий мәйдани 613,5 га йәр тазиланди. 22 га йәргә 1002 түп дәрәқ олтурғузулди. Әнди пүтүн әтиязлиқ санитарлиқ айлиғиға барлиғи болуп 27 миң адам қатнишип, йеза-йезилардики җумһурийәтлик, вилайәтлик вә наһийәлик әһмийәткә егә 382 коча, улардики 11 668 һойла күл вә әхләттин, 356 чақирим ериқ вә 448 чақирим автотранспорт йоллири тазиланди. 4094 түп көк терәк, туя, ақ қейин, қариғай, павлония, елка вә башқиму дәл-дәрәқләр тикилди. 
Әлвәттә, пүтүн хәлиқ болуп, қорчиған муһитни таза тутсақ, әһвал башқичә болар еди. Бизниң балилиқ чеғимизда мәктәптики муәллимлиримиз дайим: «Тәбиәтни сақлайли, уни таза тутайли!» дәйдиған. Синип ичидики тазилиқниму өзимиз бәрпа қилаттуқ. Өйдиму ата-анимиз шундақ дәп қахшатти. Апилиримиз: «Қизи бар өй пиялидәк пакиз болуш керәк» дәп ейтиштин һәргиз һарматти. Буниң барлиғиға қошумчә, тазилиқ бар йәрдә саламәтликму болиду. Шундақ екән, өзимизгә вә өйүмизгә пухта болайли!

Алмута вилайити,
Әмгәкчиқазақ наһийәси