• Әхбаратлар еқими
• 12 Сәуір, 2024

Супридин башланған тирикчилик

Ашханида тамаққа тутуш қиливатқан чоң апамниң суприси бирдин көзүмгә чүшти. Этностильда тикилгән униң заводтин әмәс, қолдин чиққанлиғи байқилип туриду. Шундақ чирайлиқ. Униң үстигә һазир, немишкиду, бу буюм көп өйдин тепилмайдиған болғачқиму, зор қизиқишимни ойғатти. Сорисам, уни чоң апам буйрутма билән тиктүргән екән. 

Сабирәм ӘНВӘРОВА, 
«Uiğur avazi»

– Бир оқуғучумниң аниси мошундақ буюмларни тикип сетиш билән шуғуллиниду. Өзи һәмширә, қараң. Қолидин кәлмәйдиғини йоқ. Чүшәк-көрпә, супра, пәртуқ, дәстихан дәмсиз, барлиғини уйғурчә стильда тикиду. Шундақ ишләмчан қиз, – дәп ағзи-ағзиға тәгмәй махтап кәтти чоң апам. 
Раст, бүгүнки заманда жиңнә тутуш һәркимниң қолидин келидиған иш әмәс. Тешилгәнни тикип, житилғанни ямап кийидиған заман кәлмәскә кәткәчкиму, жиңнигә жип өткүзүп көрмигән қизлиримизму йоқ әмәс. Һәр буюмиға уйғурчә пурақ бәргинигә қариғанда, бу аял һәм милләтпәр болса керәк. Қисқиси, йеқиндин тонушуп көрүш қарариға кәлдим. Телефон номерини елип, алақиға чиқтим. Бу чевәр келинчәк өзәмниң жутдиши, түви Уйғур наһийәлик болуп чиқти. 
Ләйлинур Илиясова һазир 31 яшта. У Кичик Дехан йезисида туғулуп, Мөрдүн Тейипов намидики оттура мәктәпни тамамлайду. Авал җумһурийәтлик алий медицина колледжида оқуса, 2012 — 2016-жиллар арилиғида Қазақ миллий қизлар педагогика университетиниң «биология» факультетида тәһсил көрүп, иккинчи дипломини қолиға алди. Алмута шәһиридики 15-шипаханида бәш жил мабайнида ишләп, һазир бала күтүмигә бағлиқ дәм елишида. Байқисиңиз, йеңи дәвир ханим-қизлири бала күтүми үчүн берилгән вақитниму бош өткүзүшни халимайду. Шу мүмкинчиликтин пайдилинип, өзини йеңи қиридин синап көрүватқан, очуғи, кәсип ечиватқан аяллар нурғун. Ләйлинур Илиясованиму шу қатарда десәк, хаталашмаймиз. 
– Немә қилсам бола, қандақ қилип қошумчә тапавәт тепишқа болиду, дәп көп ойландим. Өзәм тикинчиликкә қизиққачқиму, ахири мошу йолни таллидим. Бу қабилийәт маңа анамдин берилди десәм, дурус болар. Өйүмизниң төридә униң кона тикинчилик машинкиси туратти. Апам қоли бошисила, шуниң билән етишатти. Мән униң ишиға қизиқип, қарап олтириштин зерикмәттим. Бирақ апам маңа тикинчиликни зади үгәтмигән. «Болди қизим, уни немә қилаттиң, һәшими тола. Униңдин оқушуңни оқи...» дәп әқил ейтатти. Чоң болуп оқудум, таллиған кәспим бойичә ишлидим. Кониларниң «Алма – алма дәриғидин жираққа чүшмәйду» дегини расткән, бәрибир апам охшаш тикинчиликни қошумчә кәспимгә айландурдум, – дәп күлди у. 
Ишини авал бовақлар үчүн бөшүкниң көрпә-ястуқчилирини тикиштин башлиған Ләйлинур һәдә кейинирәк херидарлириниң илтимаслириға бенаән дәстихан, пәртуқ, яғлиқ, халта, көрпә вә һаказиларни тикишни қолға алди. 
– Башта қом-қериндаш, уруқ-туққанлардин буйрутма чүшти. Болупму супурни нураний анилиримиз көп буйрутма қилатти. Уни тикишниң алдида анамниң кона суприси ядимға чүшүп, шуни көз алдимға кәлтүрүп, ишни башлидим. Момилиримиз, анилиримиз суприни қәдирләп, мәхсус тикилгән халтисиға селип, егиз йәргә есип қойидиғанғу?! Шуңлашқиму кичик вақтимдинла суприниң хасийәтлик, әһмийәтлик екәнлигини яхши чүшәнгән едим. Бүгүндә әмгигимниң бәрикәтлик болуши – ишимни супра тикиштин башлиғанлиғимдинмекин дәп ойлаймән. Әндиликтә ноғучларни салидиған қап, япқуч, пәртуқ, чирайлиқ дәстихан, халтилар охшаш ашхана буюмлири вә йотқан-көрпиләрни тикиватимән. Уларни миллийлигимизгә хас рәхтләрдин яритимән. Бир сөз билән ейтқанда, һәрбир ишимда мәдәнийитимизниң, миллийлигимизниң изнасини қалдурушқа тиришимән, – деди миллий қәдрийәтлиримизни жуқури баһалайдиған келинчәк. 
У «Жанет» студиясидә конструктор-модельер кәспи бойичә мәхсус курс оқуп, билимини ашурди. Һазирқи вақитта ихчам цехида кәспини җанландуруп, өз ишидин бәһир алидиған қәһриманимизға Қазақстанниң шәһәр-шәһәрлирини ейтмиғанда, Өзбәкстан, Қирғизстан, Россия, Корея, Түркия, Швеция қатарлиқ жирақ-йеқин дөләтләрдинму буйрутма келип чүшидекән. Униң әмгигиниң Интернет қолланғучилири арисида кәң таралмақта. Униң үстигә, Ләйлинур торбәтлирини уйғур тилида елип маңиду. Һәр ясиған буюми аддий болғини билән, турмушта әң керәклик һәм этностильда болғачқиму, тез сетиливатиду. 

Алмута вилайити,
Талғир наһийәси