• Әхбаратлар еқими
• 25 Сәуір, 2024

Палванлар күч синашти

Қедимий қазақ күриши – жилдин-жилға аммибаплиғи ешиватқан спорт түригә айланмақта. Чүнки униңға қизиққучиларла әмәс, бәлки қазақчә күрәш билән мәшғул болуватқан яшлар саниниң өсүватқанлиғи һәммини хошал қилиду. Йеқинда Яркәнт чегаричилири тәшәббускарлиғида спортниң ушбу түридин өткән турнир сөзүмизгә мисал болалайду. Тәкитләш керәкки, у Панфилов наһийәлик чегара башқармисиниң тәшкил қилинғанлиғиниң 100 жиллиғиға даир уюштурулди.

Гөһәрбүви ИСМАЙИЛҖАНОВА,
«Uigur avazi»

Жетису вилайити һәм Панфилов наһийәсиниң палванлири баш қошқан турнирға 30 спортчи қатнашти. Яркәнт чегара отряди, һазирқи Панфилов наһийәлик чегаричилар башқармисиниң тәвәллудлуқ мәрикисигә беғишланған «Жаркент шекара барысы» спорт мусабиқисиниң ечилиш тәнтәнисидә Панфилов наһийәсиниң һакими Марат Сағымбек тәбрик сөзгә чиқип, күч синишиш алдида турған палванларға утуқлар тилиди. Шуниңдин кейин тәнтәрбийә вә спорт башқармисиниң башлиғи Улан Рысқул, полковник Мухтар Қанабеков, наһийәлик уруш вә әмгәк ветеранлири кеңишиниң рәиси Тохтарбай Керимқулов қазақчә күрәш спортиниң тарихи вә униң яшлар тәрбийисидики әһмийити һәққидә тохталди.
Шундақ қилип, көптин күткән турнирда биринчи болуп алмутилиқ Бауыржан Исқақов, Яркәнттин Болат Рақишев челишқа чүшти. Оюнниң дәсләпки минутлирида яркәнтлик палван рәқиви үстидин ғалип чиқти. Тәвә чегаричиларниң спортқа болған қизиқиши һәм тинмай мәшиқлинишини намайиш қилған у финалдиму йеңишкә йәтти.
Бир күн бойи давамлашқан кәскин күрәштә палванлар арисидики әң күчлүкләр ениқланди. Әлвәттә, бу иш адил қазиларға оңайға чүшмиди. Чүнки жигитләр яхши оюн техникиси билән турнирға пухта тәйярлиқ билән кәлгәнлигини намайиш қилалиди. Шундиму Яркәнт шәһиридин қатнашқан Болат Рақишев — І, Алакөл наһийәсидин кәлгән Арман Ахметов — ІІ, «Қорғас» чегара отрядидин иштрак қилған Айбек Алпысбекулы ІІІ орунни йеңивалди. 

Панфилов наһийәси,
Жетису вилайити