• Әхбаратлар еқими
• 25 Сәуір, 2024

Чарин чатқаллиғини тазилиди

Оқурмәнләргә мәлумки, гезитимизниң өткән санида «Таза Қазақстан» җумһурийәтлик экологиялик акциясиниң биринчи һәптилиги һәққидә язған едуқ. Мәзкүр акцияниң «Хасийәтлик макан» дәп атилидиған иккинчи һәптисидиму еғизға толтуруп ейтқидәк ишлар әмәлгә ашти. 

Сабирәм ӘНВӘРОВА, 
«Uiğur avazi»

Хош, намидин чиқип турғинидәк, бу қетим тарихий-мәдәний ядикарлиқларниң мәйдани тазиланди. Акцияниң мәхситигә мувапиқ Уйғур наһийәсиниң турғунлири бу новәт нами аләмгә мәшһур Чарин чатқаллиғиниң территориясини тазилап, туристларни тазилиққа көңүл бөлүшкә чақирди. Наһийә турғунлири Чарин дөләт миллий тәбиий паркиниң хадимлири билән бирликтә акциягә ат селишип, 5-6 чақирим йәрни аватлаштуруш ишлириға қатнашти. 
Миллий паркниң тәркивигә Чарин ерәнзарлиғи кириду. Тәбиий ядикарлиқниң умумий мәйдани 5014 гектарни тәшкил қилиду. Униң ичидә дәрәқ билән чәкләнгән мәйдан 2315 га, пәқәт ерән дәриғи өсидиған мәйдан 1015 га. Паркта өсүмлүкләрниң 940 түри бар. Бу йәрдики өсүмлүкләрниң 21 түри «Қазақстанниң Қизил китавиға» киргән. Сүтхорәкликләрниң — 60, қушларниң — 300, йәр беғирлиғучиларниң — 20, белиқларниң 10 түри учришиду. 
Наһийә территориясидә орунлашқан мошундақ тилсим макандики өсүмлүкләр билән җан-җаниварларни қоғдаш – муһим вәзипә. Бебаһа тәбиәт байлиқлириға егә Чарин чатқаллиғи елимиздики даңқи дуния чарлиған туристлиқ мәркәз һесаплиниду. Шундақ екән, униң һәрбир қум-тешини сақлаш һәм тазилаш – һәрбиримизниң борчи. 
Уйғур наһийәси,
Алмута вилайити