• Әхбаратлар еқими
• 25 Сәуір, 2024

Йешил өлкигә – 5000 көчәт тикилди

«Таза Қазақстан» акцияси Әмгәкчиқазақ наһийәсидиму утуқлуқ давамлашмақта. Униң «Хасийәтлик макан» вә «Йешил өлкә» һәптиликлиригә барлиқ округлар паал иштрак қилди. Ишиктә шәһиридики Жамбул Жабаев намидики яшлар паркида өткән шәнбиликкә 1500дин ошуқ адәм қатнишип, 10 техника пайдилинилди. 

Рашидәм РӘҺМАНОВА,
«Uiğur avazi»

Наһийәлик, шәһәрлик хизмәтләр хадимлири, депутатлар, барлиқ дәриҗидики билим дәргаһлириниң коллективлири вә башқиму мәһкимиләр хизмәткарлири, чоң һәм кичикләр, яшлар, пидаийлар, җәмийәтлик ишларниң активистлири, җүмлидин наһийә вә униң мәркизи – гөзәл вә тарихий Ишиктә шәһирини сөйидиған барлиқ әмгәкчиқазақлиқлар Жамбул Жабаев намидики яшлар парки территориясини пак-пакизә қилип, 100 хил дәрәқ көчитини тикти. Дәрвазиси вә орундуқларни сирлиди. 40 тонна әхләт чиқарди. 
– Бийил елимиздә әҗайип әһмийәтлик «Таза Қазақстан» акцияси қолға елинип, Вәтинимиз йеңи түс алмақта. Әлвәттә, ушбу паалийәткә җумһурийәтлик Уйғур этномәдәнийәт мәркизиниң җай-җайлардики шөбилириму паал арилишиватиду. Умумий өйүмизниң таза болуп, гүллиниши вә риваҗлиниши – бизниң, барлиқ қазақстанлиқларниң, өз қолида. Шуңлашқиму мән ҖУЭМниң Әмгәкчиқазақтәк чоң наһийәдики шөбиси рәисиниң орунбасари ретидә Жамбул Жабаев намидики яшлар парки территориясини тазилаш ишлириға қолумға қурал-яриғимни елип келип, тәвәдики барлиқ қериндашлиримни ушбу акциягә биркишидәк қатнишишқа чақиримән, – дәйду сөзи һәм иши билән башқиларға үлгә болған Нурбүви Насирова.
Демисиму, ушбу акция җәриянида нурғунлиған яхши ишлар әмәлгә ешиватиду. Тазилиқ – күндики диққитимизни тәләп қилидиған оқәт. Бирақ әл вә әвлат келәчиги үчүн буниңдинму чоң ишларни қилиш қолумиздин келидиғанлиғи, шүбһисиз. Чүнки бу йәрдики мәхситимиз – экологиялик мәдәнийәткә вә тәбиәткә ғәмхорлуқни тәшвиқат қилиш.
Шәнбиликтә сөз алған наһийә һакими Талғат Байедилов, ушбу чарә-тәдбирләрниң пәқәт җисманий әмгәкла әмәс, бәлки хәлиқни бириктүрүшниң әң яхши амили екәнлигини атап өтти.
– Ишиктиниң әң чирайлиқ орунлириниң бири – Жамбул Жабаев намидики Яшлар парки. Бу йәрдә пәқәт ишиктиликләрла әмәс, бәлки шәһәр вә наһийә меһманлириму келип, дәм елип кетиду. Улар униң әһвалиға қарап, бизниң қандақ ғоҗайин екәнлигимизни баһалайду. Барлиғимизниң күч чиқиришида парк техиму гөзәллишип кәтти. Өз қолумиз билән кәлтүргән тазилиқ билән тәртипни буниңдин кейин бузмайли, – деди наһийә рәһбири.
Умумән, «Хасийәтлик макан» акцияси давамида 53 мәхсус техника вә 91 жүк транспортиниң ярдими билән әхләтхана полигонлириға 636 тонна әхләт чиқирилди. 187 тарихий-мәдәний ядикарлиқлар тазилинип, уларни қорчиған 10 квадрат метр мәйдан ремонттин өтти.
Әнди «Таза Қазақстанниң» «Йешил өлкә» акцияси давамида Әмгәкчиқазақ наһийәсидә 5000 дәрәқ көчитини олтарғузуш реҗилинип, әтрапни йешилзарлиққа айландуруш ишлири йезиларни аватлаштуруш билән биллә һәрбир әмгәкчиқазақлиқ қәлбидә экологиялик җавапкәрлик һис-туйғулирини ойғатти. Чүнки наһийә һакими Талғат Байедилов «Йешил өлкә» акциясини наһийә турғунлирини униңға түгәл қатнишиш чақириғи билән башлиди. Бу тәшәббусни наһийәлик мәслиһәтниң рәиси Бекет Ахметов дәсләпкиләрдин болуп қоллиди.
Атап кетиш керәкки, дәл-дәрәқ тикиш ишлириға аилиләр бала-чақилири билән қатнишип, әвлатлар варислиғи орун тапти.

Әмгәкчиқазақ наһийәси,
Алмута вилайити