Әхбаратлар еқими
25 Сәуір, 2024

Һәммә шәнбиликтә

Елимиз Президенти Қасым-Жомарт Тоқаевниң тәшәббуси билән қолға елинған «Таза Қазақстан» экологиялик акцияси Панфилов наһийәсидиму қизғин давамлашмақта. Тәкитләш керәкки, бәш һәптә давамлишидиған чарә-тәдбиргә мувапиқ наһийәдики шәһәр вә йеза-авулларда санитарлиқ-тазилиқ айлиғи елан қилинип, истираһәт бағлирида, кочиларда, иш вә оқуш орунлирида тазилиқ ишлири кәң қанат яймақта. Шундақла мәнзирилик дәл-дәрәқләр көчәтлирини көчириш ишлириму аммивий түс алмақта.

Гөһәрбүви ИСМАЙИЛҖАНОВА,
«Uiğur avazi»

Бу қетим наһийә турғунлири «Киелі мекен» һәптилигидә мәдәний ядикарлиқларни күтүш, тазилиқ, дәл-дәрәқләрни һаклаш, сирлаш ишлирини елип барди. Җүмлидин «Яркәнт мечити» бәдиий сәнъәт мирасгаһи, «Киелі ағаш» истраһәт беғида, Сәясий тәқипләш қурванлириға орнитилған ядикарлиқлар әтрапида һәм Өсәк дәрияси бойида тазилиқ-аватлаштуруш ишлири қизиди. Экологиялик акциягә 1000дин ошуқ турғун қатнишип, 10дин ошуқ һәрхил техникиларда 10 тоннидин ошуқ әхләт чиқирилди. Бу ишта Панфилов наһийәлик Анилар кеңиши рәиси Күлғайша Бердиғулова, наһийәлик мәслиһәт депутати Алмас Батирхан, наһийәлик Уйғур этномәдәнийәт мәркизиниң рәиси Азат Гайитов турғунларға мураҗиәт қилип, һечкимниң чәттә қалмай, чоң-кичикни бир кишидәк қатнишишқа чақирди.
Мәдәний ядикарлиқлар әтрапини тазилашни қолға алғанлиғидин хәвәр тапқан Яркәнт шәһириниң турғунлири, Панфилов наһийәлик Уйғур этномәдәнийәт мәркизи әзалири йәнә тәшәббус көтирип, Билал Назим намидики кочидики улуқ мутәпәккүргә орнитилған һәйкәл әтрапини тазилашқа жиғилди.
– Экологиялик акциядин хәвәрдар болған жутдашлар бу қетимму улуқ шаир һәйкили әтрапида жиғилишқа қарар қилдуқ. Чүнки шәһәрниң өзидила 40тин ошуқ жигитбеши бар. Мәһәллиләр турғунлири һәмкарлиқта шәнбилик уюштуруп, тазилиқ, аватлаштуруш ишлирини әмәлгә ашурдуқ, – дәйду баш жигитбеши Аблеким Қурбанов.
– Йошурушниң һаҗити йоқки, Билал Назим һәйкили әтрапида бәрпа болған истираһәт беғи җумһурийитимиздики барлиқ мәдәний ядикарлиқ вә бағлар охшаш дөләт тәрипидин күтүмгә елинған. Лекин бизгә һөкүмәт қарайду, дәп чәттә турувелиш яки қол қоштирип олтиришқа болмайду. Һәйкәл әтрапини һәр һәптидә бир тазилаш, аватлаштуруш ишлирини елип баридиғанға бизниң жутдашлар һәрқачан тәйяр, – деди жигитбешиниң тәшәббусини қоллап-қувәтлигән мәдәнийәт мәркизиниң рәиси Азат Гайитов.
Шуни тәкитләш лазимки, бу қетимқи шәнбиликтә йеши сәксәнгә тақиған чоң әвлат вәкиллириму, яшларму чәттә қалмиди.

Панфилов наһийәси,
Жетису вилайити