• Әхбаратлар еқими
• 25 Сәуір, 2024

Шаир ялғуз әмәс

Азнат ТАЛИПОВ,
«Uiğur avazi» 

Иҗадийәт дуниясида проза вә поэзия жанрида үнүмлүк қәләм тәвритип, уйғур әдәбиятида өзигә хас из-тамғиси бар язғучи, шаир Тельман Нурахунов бийил һаятиниң 60-даваниға көтирилди. 
 Қәләм саһибиниң «Қәлбим аһаңлири», «Көзләр һәм жүрәк», «Чин жүрәктин» шеирлар вә сонетлар, «Сәвда», «Сәрадин кәлгән жигит» повесть вә һекайиләр топламлири билән «Чоң Ақсу – қутлуқ йезам» һөҗҗәтлик әсәри һәм «Бейиштики дозақ», «Қалиғач угиси», «Кейин әсләнгән азап» романлири қәләм саһибиниң тинимсиз меһнитиниң мәһсули. Шуни алаһидә қәйт қилиш керәкки, язғучиниң бир роман билән бирнәчә һекайилирини өз ичигә алған «Қанлиқ өстәң» китави 2019-жили дөләт буйрутмиси бойичә 5000 нусха билән нәшир қилинған.
Йеқинда Әмгәкчиқазақ наһийәси Ават йезисида наһийәлик китапханиниң тәшәббуси вә Өмәр Муһәммәдий намидики мәктәпниң вә йезидики Мәдәнийәт өйиниң тәшкиллиши билән қәләм саһибиниң 60 яшлиқ тәвәллудиға беғишланған «Тельман Нурахунов – ұйғыр әдебиетінің қос қанатын тербеткен ақын» мавзусида язғучи билән учришиш өткүзүлди. Өмәр Муһәммәдий намидики мәктәпниң уйғур тили вә әдәбияти пәниниң муәллими Сәнәм Имрәмзиева риясәтчилик қилған мәрасимда йезилиқ китапханиниң хадими Рашидәм Қурбанова әдипниң иҗадий паалийити билән тәрҗимиһали һәққидә тохталди. Сөзгә тәклип қилинған натиқлар – Қазақстан Язғучилар иттипақи Уйғур әдәбияти кеңишиниң рәиси, шаирә Патигүл Мәхсәтова, шаирлар Җәмшит Розахунов, Дәулетбек Байтурсынулы, Вильям Молотов, филология пәнлириниң доктори Алимҗан Тиливалди, Әмгәкчиқазақ наһийәлик китапханиниң мудири Дариға Жанабилова, Өмәр Муһәммәдий намидики мәктәп мудириниң вәзиписини атқурғучи Гүлүм Секлибаева қәләм билән иззәт-һөрмәт тапқан тәвәллуд егиси һәққидә изгү тиләклирини изһар қилди. Шундақла улар Президентимиз Қасым-Жомарт Тоқаев бийил Миллий қурултайда тәкитлигән «...Биз әң алди билән яшларни китап оқушқа үгитишимиз керәк. Шу вақитта аммивий рәвиштә китап оқуйдиған милләткә айлинимиз...» дегән сөзлиридин нәқил кәлтүрүп, яш әвлатни тәрбийиләштә мәнивий дуния яритиватқан сөз зәргарлири билән болған учришишларниңму муһим роль ойнайдиғанлиғини алаһидә қәйт қилди. 
Мәктәп оқуғучилири билән устазлири тәрипидин шаирниң қәлимигә мәнсүп шеирлар ипадилик оқулуп, нахшилар яңриди. Мәдәнийәт өйиниң мудири Долқун Розахунов билән яш сәнъәткар Абдрим Низировниң орунлиған нахшилири мәрасимға көңүллүк дәмләрни һәдийә қилди. 
Йеза хәлқи өзиниң зиялилири билән учришишни тәқәзалиқ билән күтидиғанлиғини изһар қилған Ақсақаллар кеңишиниң рәиси Савутҗан Иминов билән жигитбеши Абдусалам Тохтақулиев жут намидин язғучиға чапан кийгүзди. Мәрасим ахирида учришиш қәһримани Тельман Нурахунов һаятта вә иҗадийәттә устазлиқ қилған, язғучи болуп шәкиллинишидә муһим роль ойниған Қазақстан хәлқи язғучиси Зия Сәмәди, филология пәнлириниң доктори, академик Махмут Абдрахманов, «Молодая гвардия» журнали мукапитиниң лауреати Турған Тохтәмов қатарлиқ әдипләрниң вапатидин кейин өзини йәккә-йеганә қалғандәк һис қилип, җудалиқ изтираплири илкидә язған «Мән ялғуз» шеирини оқуп бәрди.