• Әхбаратлар еқими
• 25 Сәуір, 2024

«Айдынды-Алакөлдики» шәнбилик

Елимиздә Президент тәшәббуси билән башланған «Таза Қазақстан» экологиялик акция давамлашмақта. Әйнә шу акция даирисидә Абай вилайити Мақаншы наһийәсиниң «Айдынды-Алакөл» қирғиғида умумнаһийәлик шәнбилик өтти. 
Мәзкүр шәнбиликкә наһийәниң 11 йеза округидин вә мәһкимиләрдин 500дин ошуқ адәм қатнашти. Бу күни 28 гектар көләмидики территория тазилинип, 40 тонна әхләт чиқирилди. Келәчәктиму «Айдынды-Алакөл» қирғиғидики язлиқ туристлиқ мәвсүмгә толуқ тәйяр болуш үчүн шәнбиликләр баһар ейидиму давамлишиду. Мошундақ шәнбиликләр билән бирқатарда наһийәдики коммуналлиқ мәһкимиләр хадимлири жил давамида Алакөл көлиниң қирғақлирида тазилиқ ишлирини дайимлиқ түрдә өткүзүп туридиған болиду. 
 Әнди Абай вилайитиниң Аягөз наһийәсидә 6 миң адәм шәнбиликә қатнашти. «Таза Қазақстан» экологиялик акцияси башланғандин бу ян наһийә турғунлири һәр күни өзлири туруватқан кочилардики ериқларни, тротуарларни әхләтләрдин тазилаватиду. Умумнаһийәлик шәнбиликкә 120 мәхсус техника җәлип қилинип, әхләтләр чиқирилди. Наһийә мәркизидә 500 түп көчәт тикилди. 
 Курчатов шәһиридә болса, «Таза шәһәрдин йешил сәйяриғичә» дегән нам билән «Таза Қазақстан» экологиялик акциясиниң «Йешил өлкә» һәптилиги өтти. Шәһәрдики Яшлар ресурслуқ мәркизиниң мудири Айжан Мусатаевниң ейтишичә, шәнбиликкә яшлар билән мәһкимиләр коллективлири билән биллә пенсионерларму қатнашти. Шәһәр турғунлири кочиларни, скверларни, паркларни вә башқиму җәмийәтлик орунларни тазилап, дәрәқләрни һаклиди. Шәһәрдики 42 тәшкилат вә мәһкиминиң хадимлири техника ярдими билән 40 тонна әхләтләрни чиқарди. Умумән, «Таза Қазақстан» җумһурийәтлик экологиялик акцияси башланғандин бу ян Курчатов шәһириниң активистлири тарихий-мәдәний ядикарлиқларниң территориялирини тазилиди. Шәнбиликкә бир күндә 1000дин ошуқ адәм қатнашти.