• Әхбаратлар еқими
• 25 Сәуір, 2024

Премьер-министр Атыравға кәлди

Премьер-министр Олжас Бектенов су кәлкүниниң иккинчи долқуни һарписида Атырав вилайити әтрапидики турушлуқ өй массивлирини кәлкүндин қоғдаш ишлирини тәкшүрди.
 Премьер-министр вилайәт мәркизидики турушлуқ өй массивлирини қоғдаш тосмилирини тәкшүрүш давамида Атырав шәһириниң су кәлкүниниң тәхмин қилиниватқан долқуниға тәйярлиқ ишлири билән тонушти. Ғәрбий өлкидә Россия Федерациясиниң Ириклин су қоймисидин суниң келишигә мунасивәтлик, шундақла Жайық дәриясиға қуюлидиған җайда су көләминиң көтирилиши ақивитидин әһвал җиддий петичә қалмақта.
 Мәлумки, Ғәрбий Қазақстан вилайитидики чоң су кәлкүнидин кейин су өз қини билән Атырав вилайитигә қарап еқип, Каспий деңизиға кетиду. Ахирқи тәвлүктә Ғәрбий Қазақстан вилайити тәрипидин кәлгән су еқимидин Атырав шәһиридә су көләми 6 сантиметрға көтирилди. 
 Турушлуқ өй массивлириниң қоғдаш иқтидарини күчәйтиш үчүн дәрия түвини чоңқурлитиш ишлириниң җәрияни тәкшүрүлди. О.Бектенов һаҗәт күчләрниң нурғун суниң келишигә тәйярлиғи дәриҗисини көрди. Һөкүмәт рәһбири Атырав вилайитигә су кәлкүни әһвали турақланған регионлардин һәрбийләрни дәрһал кәлтүрүшни тапшурди. 
 Мошу күнгә қәдәр су кәлкүниниң алдини елиш чарилириниң 92 пайизи әмәлгә ашурулди. Ишларни нәтиҗидар әмәлгә ашуруш үчүн шәһәр 111 секторға бөлүнгән. Узунлуғи 482 чақирим қоғдаш тосмилири селинди, ишлар аяқлашқан участкилар техникилиқ назарәт арқилиқ тәкшүрүлди. Буниңға Пәвқуладдә ишлар министрлиги, Ички ишлар министрлиги, Мудапиә министрлиги, Миллий гвардияниң 6 миңға хадими, һакимийәт хадимлири, 2 миңға йеқин техника сәпәрвәрликкә кәлтүрүлди. Пидаийларму ярдәм көрситиватиду. Өткән шәнбидә қирғақларни бәкитиш ишлириға 9 миңға йеқин пидаий қатнашти. 
 Шуниң билән биллә Жайық дәриясидин Каспий деңизиға су өткүзүш иқтидарини ашуруш үчүн дәрия қинини чоңқурлитиш ишлири әмәлгә ашурулуватиду. Ериқларни тазилаш, чоңқурлитиш вә кәңәйтиш мәхситидә мәхсус техникилиқ флотлуқ кемиләр, гидравликилиқ экскаваторлар пайдилиниливатиду. 
 Шундақла суғириш вә су билән тәминләш системилирида су кәлкүнигә қарши ишлар жүргүзүлмәктә. Атырав вилайитидики 15 каналниң 14 Жайық дәрияси бойида орунлашқан. Төрт системида (Соколок, Нарын, Черная речка» Бақсай) суниң өзи еқишиға имканийәт бар. Мошуниңға мунасивәтлик суниң еқимини өзгәртиш үчүн йәр рельефини пайдилиниш мәхситидә каналниң қирғақлири кәңәйтилмәктә.