• Әхбаратлар еқими
• 08 Мамыр, 2024

«Үмүт» хәлиқниң үмүтини ақлайду

Буниңдин 5 — 10 жил илгири ағриққа дучар болған сәралиқлар бир парчә қәғизини көтирип, шәһәрләргә қарап йол тутатти. Чүнки йезилардики ағриқханиларда бүгүнкидәк мүмкинчиликләр болмиған. Технологияләр бир чәттә турсун, дора-дәрмәк тапчиллиғиниң өзи турғунларни хелә аваригәрчиликкә салатти. Һә, медицина мәркизи дегинимиз тамамән йоқниң орнида еди. 

Сабирәм ӘНВӘРОВА, 
«Uiğur avazi»

Бирақ бүгүнки күнниң нәпәси башқичә. Дөләт тәрипидин медицина саһасиниң тәрәққиятиға алаһидә көңүл бөлүнүшиниң нәтиҗисидә һазир чоң шәһәрләрдин жирақ наһийәләрдиму саламәтликни сақлаш мәһкимилири қәд көтирип, йеза хәлқиниң хизмитигә яримақта. Арисида шәхсийләрму көп. Мәсилән, йеқиндила Уйғур наһийәсиниң мәркизи Чонҗа йезисида заманивий технологияләр билән җабдуқланған «Үмүт» медицина мәркизиниң лентиси қийилди. Уни тәҗрибилик дохтур Үмүтҗан Ваҗитов ачти. Униң аилиси өз күчи билән йеңи имарәтниң һулини тикләп, барлиқ керәк-ярақ билән тәминлиди. 
Үмүтҗан Әрвахуноғли С.Асфендияров намидики медицина университетини тамамлиған алий билимлик мутәхәссис. Әмгәк йолини Чонҗа йезисидики наһийәлик мәркизий ағриқханида балилар дохтури болуп башлап, кейинирәк балилар бөлүминиң йетәкчиси хизмитини атқурди. Билимини техиму йетилдүрүш мәхситидә ультраавазлиқ тәтқиқ (УЗИ) бойичә мәхсус курстин өтүп, ультраавазлиқ тәтқиқ дохтури вә маммолог болуп ишлиди. Қошумчә Чонҗидики «Батыр» клиникисида қошумчә хизмәт қилип, әмгиги билән көпкә тонулди.    
Өз алдиға шәхсий медицина мәркизини ечип, йеңи башланмини қолға алған ақхалатлиқ Үмүтҗан Ваҗитов он жилдин ошуқ вақит давамида топлиған иш-тәҗрибиси билән наһийә хәлқиниң саламәтлигини күзитидә йәң түрүп хизмәт қилмақта. «Үмүттә» УЗИ, маммография, шундақла альтернативлиқ медицина (хиджама, акупунктура в.б), физиотерапия кабинетлири ишқа қошулған. Алдики вақитта улар тәвлүк бойи хизмәт көрситидиған дорихана ечишни реҗиләватиду. 
Башта тәкитлигинимиздәк, Үмүтҗан Әрвахуноғли наһийәдики яш вә ихтидарлиқ дохтурларниң бири. Кәспий маһарити арқилиқ яшлиғиға қаримай, хәлиқниң ишәнчисигә еришкән мутәхәссис. Йолдишини һәртәрәплимә қоллап-қувәтләп келиватқан рәпиқиси Тахмина Ваҗитова болса, Чонҗидики 1-оттура мәктәптә муәллим болуп ишләйду. Яш аилиниң яхши йеңилиғи наһийә турғунлириниң көңлидин чиқиду, дәп үмүт қилимиз. Йәни, «Үмүт» хәлиқниң үмүтини ақлайду дегән үмүттә, уларға утуқлар тиләймиз. 

Алмута вилайити, 
Уйғур наһийәси