• Әхбаратлар еқими
• 08 Мамыр, 2024

Мәхсәт – ат спортини тәрәққий әткүзүш

Йеқинда Қазақ миллий тәтқиқат университетида «Қазақстан Җумһурийитидә ат спорти вә илқа чарвичилиғиниң һазирқи әһвали һәм тәрәққият истиқбали» мавзусида «дүгләк үстәл» болуп өтти. 

Мәшүр САСИҚОВ,
«Uiğur avazi»

V Дуниявий көчмәнләр оюнлириға тәйярлиқ һарписида – «Қазақстан Миллий спорт ассоциацияси» вә KazNARU (Қазақ миллий тәтқиқат университети – М.С.) бирлишип уюштурған баш қошушта ушбу мәсилә дөләт органлири вә мутәхәссис алимлар, җәмийәтлик тәшкилатлар вәкиллириниң иштракида иккинчи мәртә муһакимә қилинмақта. 
«Дүгләк үстәлгә» «Қазақстан Миллий спорт ассоциациясиниң» кативи, философия пәнлириниң доктори (PhD) Тастанбек Есентаев модераторлуқ қилди. Қазақстан Җумһурийити Парламенти Мәҗлисиниң депутати Аманжол Әлтай, ҚҖ Йеза егилиги министрлигиниң вице-министри Аманғали Бердалин, ҚҖ Туризм вә спорт министрлиги Миллий спорт түрлири башқармисиниң рәиси Еламан Махамбетов онлайн режимда өзлириниң пикирлирини йоллап, «дүгләк үстәл» ишиға утуқ тилиди.
Мәлумки, Улуқ даланиң пәрзәнтлири илқа өстүрүш билән уни пайдилиниш мәдәнийитини әзәлдин биринчи орунға қойған. «Ат – әр қанити» демәкчи, хәлқимиз уни баһалап, қәдрини билгән. Шуңлашқа «Йүздин жүгрүк – миңдин тулпар» дегән нәқил әйнә шундақ ат қулиғида ойниған жигитләргә ейтилған болса керәк. ҚҖ Миллий Пәнләр академиясиниң президенти, KazNARU Башқарма рәиси – Ректор, йеза егилиги пәнлириниң доктори Ақылбек Күришбаев өз сөзидә, Қазақстанда һазир ат спорти давамлиқ тәрәққий етип, атни күтүп баплаш бу өз алдиға илим екәнлигини вә қазақ илқисиниң нәсилини шәкилләндүрүш көплигән жиллар давамлишиватқанлиғини алаһидә тәкитлиди.
– Өзәңларға мәлумки, ат спортида илқиларниң саламәтлигини назарәт қилиш, рационал түрдә озуқландуруш, күтүп-баплашни тоғра йолға қоюш билән инфекциялик ағриқларға қарши дора-дәрмәкләр бериш беваситә ветеринар дохтурларниң вәзиписи болуп һесаплиниду, – деди Ақылбек Қажығулулы. – Ат спортини дуниявий дәриҗигә көтириш кәспий мутәхәссисләрни, шуларниң ичидә илқини баплаш бойичә ветеринарларни тәйярлашниң йетишмәслиги бүгүнки күндә муһим мәсилиләрниң бири болуватиду. Шуңлашқа 2024-2025-оқуш жилидин башлап, бизниң университетта «Ат спортидики ветеринария» мутәхәссислирини тәйярлаш дәсләпки қетим әмәлгә ашуруш алдида туриду.
 «Дүгләк үстәл» давамида Қазақстандики илқа заводлириниң һазирқи әһвали дуниявий ат спортиниң тәләплиригә лайиқ әмәслиги тоғрилиқ әтраплиқ сөз болди. Қатнашқучилар спорт илқилириниң санини көпәйтмигичә көкпар, бәйгә вә башқа спорт түрлирини тәрәққий әткүзүш мүмкин әмәслигини ейтип, спорт илими билән спорт медицинисиға дөләт дәриҗисидә көңүл бөлүнүши керәк, дегән қарарға кәлди.