• Һечким вә һечнәрсә унтулмайду
• 08 Мамыр, 2024

Вәтән қоғдап, бала тәрбийилигән ақсақал

Инсанийәт тарихидики әң еғир иккинчи дуния урушиға Әмгәкчиқазақ наһийәсидин 5881 адәм қатнашти. Уларниң ичидә 13 әр-жигит Кеңәш Иттипақиниң Қәһримани унваниға егә болуп, иккиси “Шөһрәт” ордениниң саһиби аталди. Әпсус, һаят қануни шундақки, адәм дунияға келиду һәм уни тәрк етиду. Бийил тәвәдә Улуқ Ғалибийәтниң 79 жиллиғини уруш ветеранлиридин Солтанбай Жарықбасов тәнһа қарши еливатиду.

Рашидәм РӘҺМАНОВА,
«Uiğur avazi»

Әлвәттә, Вәтән азатлиғи үчүн қан кәчкән қәһриман атилиримиз билән анилиримизниң әрлиги – биз үчүн дайим үлгә вә ибрәт болуп қалиду. Уруштин кейинки барлиқ аңлиқ һаятини бала тәрбийисигә беғишлиған Солтайбай ата бийил 99 яшқа кәлди. У 1925-жили 17-һот күни һазир өзи истиқамәт қиливатқан Алға йезисида туғулған. 1943-жили қәһританда һәрбийгә чақиртилип, Өзбәкстанниң Ташкәнт шәһиридики мәргәнләр курсида оқуп, үмүт ейида фронтқа атлиниду. У Забайкалье майданиниң 25-қизил туғлуқ механика бригадисини тәркивидики 1-батальониниң 1-ротисиниң пулемет бөлүмчисиниң командири болған. Андин Япония урушиға иштрак қилип, пәқәт 1950-жили әтиязда ана жутиға қайтип кәлгән.
Солтайбай ата уруштин кейин бир жил колхозда һесават комиссиясиниң рәиси болуп ишләп, андин Түрген педагогика училищесида ишләп жүрүп, Қазақ педагогика институтиниң тарих факультетида тәһсил көрди. 1951 — 1971-жиллар арилиғида бирнәччә мәктәпләрдә муәллим, илмий мудир хизмәтлирини атқурса, 1985 — 1992-жиллар, йәни һөрмәтлик дәм елишқа чиққичә, Алға оттура мәктивиниң мудири болди. Андин җәмийәтлик ишларға арилишип, узун жиллар давамида Бәйтерек йеза округи Ақсақаллар кеңишини башқуруп, әлгә болған хизмитини давамлаштурди.
Вәтән азатлиғи үчүн қан мәйданлирида от кәчкән Солтанбай Жарықбасов І дәриҗилик «Вәтән уруши» ордени, онлиған медальлар билән тәғдирләнди. Сәккиз пәрзәнт тепип, қатарға қошти. Һазир ақсақаллар балилиридин тариған әвладиниң хошаллиқлириға бөлинип яшаватиду.
Һечким вә һечнәрсә унтулмайду. Әл азатлиғи, хәлқиниң течлиқ һаяти үчүн күришип, бизгә бәхтияр һаят һәдийә қилған атилар әрлиги мәңгү ядлиниду. Уларниң қәһриманлиғини әвлаттин-әвлатқа йәткүзүш – бизниң есил пәрзимиз. 

Алмута вилайити,
Әмгәкчиқазақ наһийәси