• Әхбаратлар еқими
• 08 Мамыр, 2024

Жүрәкниң әмри билән

Челәк медицина колледжида билим елип жүргинимдә таллавалған кәспимниң қир-сирини мукәммәл үгинишкә тириштим. Алий билимлик дохтурлар билән оттура мәхсус билими бар медицина хадимлириниң течлиқ һаяттики вә уруш, тәбиий апәтләр охшаш қийин вәзийәтләрдики ролини чүшәндим. Шуңлашқиму қолумға диплом алғандин кейин Әмгәкчиқазақ наһийәлик Мудапиә бөлүмигә йолуқуп, Вәтән алдидики һәрбий борчимни ада қилиш хаһишимни билдүрдүм вә Алмута вилайитиниң мәркизи – Қонаев шәһиридики десантлиқ-һуҗум бригадисиниң һәрбий бөлүмидә хизмәт қилдим. Һәрбий хизмәткә елиништин бурун пәвқуладдә әһваллар бөлүмидә ишлидим.
Армия сепидики бир жил ичидә көп нәрсини үгәндим. Бу йәрдики төмүрдәк тәртип мениң һаятимға болған көзқаришимни өзгәртип, җавапкәрлигимни ашурди. Болупму десантлиқ-һуҗум бригадисиниң һәрбий бөлүмидә хизмәткә әвәтилгәнлигим үчүн хошал болдум. Чүнки, мән парашютист болуп, көк асмандин йәрни вә униң гөзәллигини көрдүм.
Мошу йәрдә мән егизликтин сәкрәш алаһидиликлири һәққидә ейтқум келиду. Йеңи кәлгән һәрбийниң егизликтин парашют билән йәргә сәкриши үчүн 82 саатлиқ тәйярлиқтин өтүши һаҗәт. Мундақ шуғуллиниш икки һәптидин ошуқ вақитни тәләп қилиду. Бөлүмниң тренажерлирида күнигә 400гә йеқин солдат мәшиқлиниду. Пәқәт 10 — 12 қетим парашюттин сәкригән адәмла кәспий десант болуп һесаплиниду. Шуниң ичигә бир мәртә кечидә вә йәнә бир қетим суға қонуш кириду.
Алди билән бизни анчә егиз әмәс йәрдин йәргә сәкрәшни үгәтти. Шу чағда бир метр егизликтинму аяқ-қолға зәғмә кәлтүрүвалмай, дурус сәкрәшниң өзи үчүнму тәйярлиқ керәк екәнлигигә көз йәткүздуқ. Һәммидин бурун бехәтәрлик қаидилири билән тонуштуқ. Әң муһими, парашютист өзини әркин тутуши керәк. 
Хизмитимниң ахирида маңа солдат һаятиниң қир-сирини үгәткән командирлиримға миннәтдарлиғимни билдүрүп қайттим. Чүнки улардин алған тәлим-тәрбийәм маңа һаятимниң ахириғичә әсқатидиғанлиғини чоқум билимән.
Эльнур ЗИЯВДИНОВ,
Челәк йезисиниң турғуни
Алмута вилайити,
Әмгәкчиқазақ наһийәси