• Йеңилиқлар
  • 11 Қаңтар, 2013

Президентниң иш графиги: 2012-жилниң асасий йәкүнлири

2012-жил җумһурийитимиз үчүн кейинки жилларда қелиплашқан тәрәққиятниң иҗабий тенденциялириниң техиму өсүши билән нишанлинипла қалмай, шуниң билән бирқатарда «Қазақстан — 2050» Стратегиясиниң қобул қилинишиға бағлиқ йеңи узақ муддәтлик истиқбалға йол ачти. Дөләт рәһбириниң иш графигиму шуниңға мувапиқ зич болуп, җиддий ишларға толуп-ташти.   Бир жил мабайнида Президент Нурсултан Назарбаевниң чәт әлгә қилған сәпәрләрни, регионларға қилған иш бабидики сәпәрлирини, қатнашқан түрлүк мәҗлисләр билән кеңәшмиләрни, хәлиқара һәм җумһурийәтлик форумларни, конференцияләрни вә қурултайларни, чәт әллик дөләт һәм җәмийәт әрбаплирини қобул қилишини, җамаәтчилик вәкиллири вә әмгәк коллективлири билән болған учришишлирини, санаәт карханилири билән иҗтимаий объектларға қилған зиярәтлирини қошуп һесаплиғанда, 700дин ошуқ протоколлиқ чарә-тәдбир өткүзүлди. Дөләт рәһбири 11, шу җүмлидин Һөкүмәт әзалириниң, Президент Мәмурийити рәһбәрлигиниң, мәркизий дөләт органлири рәһбәрлириниң қатнишиши билән 8, вилайәтләр, Астана вә Алмута шәһәрлири һакимлириниң қатнишиши билән 1 кеңәшмә вә 2 көчмә кеңәшмә өткүзди. Президент йенидики консультатив-мәслиһәт органлириниң линияси бойичә Нурсултан Назарбаевниң рәислигидә Чәт әл инвесторлири кеңишиниң 1, Миллий фондни башқуруш кеңишиниң 2, Бехәтәрлик кеңишиниң 2 мәҗлиси өткүзүлди. Жил мабайнида Президент шундақла депутатлар корпуси билән турақлиқ асаста һәрикәт қилип, Парламент палатилириниң рәислири вә парламент фракциялириниң рәһбәрлири билән мунтәзим рәвиштә учришип турди. Дөләт рәһбири мәмликәт регионлирида 12 қетим иш бабидики сәпәрдә болди. Иккитәрәплимә мунасивәтләр даирисидә чәт әлләргә әмәлгә ашурулған 17 сәпәрни, шундақла 9 дөләтләр ара саммитни вә 4 хәлиқара форумни қошуп һесаплиғанда, униң қатнишиши билән хәлиқара характерға егә 170тин ошуқ учришиш вә чарә-тәдбир болуп өтти. Нурсултан Назарбаев 34 мәтбуат конференцияси вә брифинг өткүзди, чәт әлләрниң вә елимизниң йетәкчи аммивий әхбарат васитилиригә 10 қетим сөһбәт бәрди. Жил мабайнида Президент 6,5 миңға йеқин һөҗҗәтни, шу җүмлидин 106 қанунни, 237 пәрманни, 82 буйруқни, 11 кеңәшмиләр протоколини, 3 585 хизмәт бабидики һөҗҗәтни, 2 160 аналитикилиқ вә әхбарат-материалини, 276 гражданлар мураҗиитини қарап чиқти вә имзалиди. Мошу вақит давамида Дөләт рәһбири умумий алғанда 66 күн, шу җүмлидин чәт әлләрдә 45, Қазақстан регионлирида 21 күн командировкида болди.  Ички сәясәт саһасида өткән жил һәммидин авал, мәмликәт Президенти оттуриға қойған бирқатар тәшәббуслар билән нишанланди. Улар Қазақстан тәрәққиятиниң истиқбаллиқ йоллирини чүшинишкә вә дөләтниң йеңи дәриҗигә көчүшигә тәйярлиқ көрүшкә қаритилған. Бу иш Дөләт рәһбириниң 27-январь күни мәмликәт хәлқигә йоллиған «Иҗтимаий-ихтисадий йеңилиниш — Қазақстан тәрәққиятиниң асасий йөнилиши» намлиқ Мәктүби билән башланди. Нурсултан Назарбаевниң «Қазақстанниң иҗтимаий йеңилиниши: Умумға Ортақ Әмгәк Җәмийитигә қарап жигирмә қәдәм» сәрләвһилик  программилиқ мақалиси пәқәт дөләт сәяситиниң асаси болупла қалмай, бәлки Қазақстан җәмийити иҗтимаий тәрәққиятиниң йеңи философияси болди. Президентниң Мустәқиллик күни мунасивити билән 14-декабрьда болуп өткән тәнтәнилик жиғинда қазақстанлиқларға мураҗиәт қилған «Қазақстан — 2050» Стратегияси: қелиплашқан дөләтниң йеңи сәясий йоли» Мәктүбидә дөләтниң йеңилинишиниң стратегиялик йоли идеявий җәһәттин риваҗланди. Дөләт рәһбири «Қазақстан — 2030» Стратегиясиниң қаидилиригә баһа берип, Қазақстанниң 2050-жилғичә болған тәрәққиятини қандақ тәсәввур қилидиғанлиғини шәрһилиди. Мәзкүр йеңи программилиқ һөҗҗәт мәнтиқий рәвиштә мәмликәтниң узақ муддәтлик тәрәққиятиниң пәйда болуватқан йөнилишини стратегиялик мәзмун билән бейитти. 15-январьда болуп өткән новәттин ташқири Мәҗлис сайлимида «Нур Отан» Хәлиқ-демократик партиясиниң, Қазақстанниң «Ақ жол» Демократик партиясиниң вә Қазақстанниң Коммунистик хәлиқ партиясиниң вәкиллиридин ибарәт көп партиявийлик парламент тәшкил қилинди. Дөләт рәһбири 20-январьда V қетим сайланған Парламентниң биринчи сессиясиниң ечилишида депутатлар алдида сөзгә чиқип, болуп өткән сайламниң мәмликәтниң сәясий системисини йеңилаштики йәнә бир муһим қәдәм болғанлиғини тәкитлиди. Сентябрьда Һөкүмәт тәркивидә йүз бәргән өзгиришләрму мошу җәриянларға түрткә бәрди. Буниңға шундақла 2012-жили йеңи күч-қувәткә егә болған мәмурий ислаһатниму қошушқа болиду. Шундақла миллий-диний разимәнлик мәсилилириму Президентниң диққәт нәзәридә болди. Бир жил мабайнида Нурсултан Назарбаевниң рәислигидә Қазақстан хәлқи Ассамблеясиниң 2 сессияси болуп өтти. Ассамблеяниң январь ейида болуп өткән новәттин ташқири, XVІІІ сессиясидә Дөләт рәһбири Ассамблеясиниң 9 әзасини Парламент мәҗлисигә сайлаш җәрияниға қатнашти. Ассамблеяниң «Қазақстан йоли: турақлиқ, бирлик, йеңилиниш» мавзусида апрель ейида болуп өткән XІX сессиясидә Президент Қазақстан вәтәнпәрвәрлигини техиму күчәйтишкә диққәт ағдурди. Көпмилләтлик талланма командиниң Лондонда болуп өткән ХХХ язлиқ Олимпиада оюнлирида 205 миллий команда арисида 12-орунни егилиши Қазақстан вәтәнпәрвәрлигиниң ярқин испати болди. Жил ахирида қазақстанлиқлар йеңи дөләт мәйримини — Қазақстан Җумһурийити Тунҗа Президентиниң Күнини, пайтәхтниң Астанаға көчирилгининиң 15 жиллиғини вә мәмликәт мустәқиллигиниң 21 жиллиғини нишанлиди. Мустәқиллик күни һарписида Президент қелиплашқан әнъәнә бойичә «Ақорда» резиденциясидә көрнәклик мәдәнийәт, илим-пән, маарип, саламәтликни сақлаш әрбаплириға, ишләпчиқириш, тиҗарәт саһалириниң вәкиллиригә, һоқуқ қоғдаш органлириниң хадимлириға, һәрбий хизмәтчиләргә, спортчиларға, уруш вә әмгәк ветеранлириға дөләт мукапатлирини тапшурди. Иҗтимаий-ихтисадий тәрәққиятта Қазақстан 2012-жили дуния ихтисадида сақлинип қалған ениқсизлиқларға қаримай, ихтисатниң барлиқ саһалирида дегидәк җошқун өсүшни ишәшлик намайиш қилди. Қазақстан регионлириниң иҗтимаий-ихтисадий тәрәққият мәсилилири дайим Дөләт рәһбириниң диққәт мәркизидә болди. Шәһәр қурулуши вә мәмликәт пайтәхтини тәрәққий әткүзүш мәсилилири Дөләт рәһбириниң алаһидә назаритидә болди. Бу мәсилә «ЭКСПО — 2017» Хәлиқара ихтисаслаштурулған көргәзмисини өткүзүшкә тәйярлиқ көрүшкә бағлиқ техиму актуаллиққа егә болди. 2012-жили Сүръәтлик индустриал вә инновациялик тәрәққият дөләт программисини әмәлгә ашурушниң новәттики йәкүнлири чиқирилди. Уларни тонуштуруш Нурсултан Назарбаевниң қатнишиши билән 3-июльда вә 25-декабрьда болуп өткән икки умуммиллий телекөрүк даирисидә уюштурулди. Ноябрьда «Хәлиқ ІPOси» программисиниң ишқа қошулуши, сөзсизки, жилниң хатимиси болди. 2011-жили февральда «Нур Отан» Хәлиқ-демократик партиясиниң XІІІ қурултийида Президент оттуриға қойған программиниң мәхсити мәмликәтниң фонд базирини тәрәққий әткүзүштин вә аһалини миллий ихтисатни башқурушқа кәң җәлип қилиштин ибарәт. 2012-жили Қазақстанниң хәлиқара мәйдандики абройиниң өсүши техиму тәстиқләнди. Биринчидин, бу Дөләт рәһбириниң 27-мартта Сеулда болуп өткән Ядро бехәтәрлиги бойичә ІІ саммитқа қатнишиши. Униңда дуния дөләтлири Қазақстанниң аләмшумул ядро бехәтәрлигини мустәһкәмләштики лидерлиғини яңливаштин етирап қилди. Иккинчидин, 12-сентябрьда Астанада Азиядики Өз ара һәрикәт вә ишәнчә чарилири кеңәшмисиниң юбилейлиқ сессиясиниң өткүзүлүши Қазақстан лидериниң мошу хәлиқара тәшәббусини тәрәққий әткүзүштики йеңи басқуч болуп нишанланди. Үчинчидин, Қазақстанниң 2017-жили Астанада «ЭКСПО — 2017» Хәлиқара ихтисаслаштурулған көргәзмисини вә Алмутида Дуниявий Қишлиқ универсиадини өткүзүш һоқуқиға егә болуши. Дуниявий әһмийәткә егә мошундақ чарә-тәдбирләрни өткүзүш һоқуқини йеңивелиш дөлитимиз утуқлириниң жуқури баһаланғанлиғи тоғрилиқ гувалиқ қилиду вә униң тәрәққият истиқбалини көрситиду. Бир жил мабайнида җумһурийәт территориясидә болуп өткән чоң хәлиқара форумларму мәмликәтниң хәлиқара абройиниң күчийишигә ярдәм қилди. 30-майда болуп өткән Дуниявий вә әнъәнивий динлар рәһбәрлириниң ІV қурултийиға 40 дөләттин 85 делегация кәлди. Қазақстан Президентиниң қатнишиши билән болуп өткән V Астана ихтисадий форуми дунияниң тәрәққият йоллирини әқлий издәшкә йеңи күч-қувәт бәхш әтти. Нурсултан Назарбаевниң қатнишиши билән 7-июньда Беҗинда болуп өткән Шанхай һәмкарлиқ тәшкилатиға әза дөләтләр рәһбәрлири кеңишиниң кәңәйтилгән мәҗлиси тәшкилатниң әмәлий паалийитини тәрәққий әткүзүшкә чоң һәссә қошти. Илгәрки кеңәш кәңлигидики мәмликәтләр билән өз ара һәрикәт көптәрәплимә һәмкарлиқниң муһим йөнилиши болуп қалди. Бажхана иттипақиниң, Евразия ихтисадий бирләшмисиниң бирпүтүн ихтисадий кәңлигиниң вә Евразия ихтисадий комиссиясиниң паалийитини техиму мукәммәлләштүрүш мәсилилири 19-мартта вә 19-декабрьда Москвада болуп өткән Евразия ихтисадий бирләшмиси дөләтләр ара кеңишиниң вә Алий Евразия ихтисадий кеңишиниң мәҗлислиридә муһакимә қилинди. 2015-жили январьдин тартип Евразия ихтисадий иттипақиниң паалийитини Россия вә Беларусь билән биллә башлаш тоғрилиқ келишим мәҗлисләрниң асасий йәкүни болди. Европа йөнилишлиридә Дөләт рәһбириниң Германиягә, Австриягә, Бүйүк Британиягә, Франциягә вә Чехиягә қилған сәпәрлири муһим вақиә болди. Жил давамида Президент шундақла иккитәрәплимә сәпәрләр даирисидә Қазақстанға кәлгән Россия, Өзбәкстан, Қирғизстан, Корея Җумһурийити, Македония, Вьетнам, Шри-Ланка Җумһурийитиниң Президентлири — Владимир Путин, Ислам Кәримов, Алмазбек Атамбаев, Ли Мен Бак, Георгий Иванов, Чыонг Тан Шанг, Махинда Раджапексе, Монако князи Альбер ІІ билән учрашти. Умумән, жилниң сәясий йәкүнлирини хуласиләп шуни тәкитләшкә болидуки, Қазақстан шәкилләнгән демократик әнъәниләргә вә онлиған жилларға бәлгүләнгән ениқ стратегиялик нишанларға егә қелиплашқан дөләт сүпитидә өз тәрәққиятиниң йеңи басқучиға ишәшлик қәдәм ташлиди.

228 рет

көрсетілді

0

пікір
Алдыңғы мақала Биз тоғра йолни таллавалдуқ
Келесі мақала Течлиқ вә муһәббәт мәйрими

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

28 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы